Miss World 2025 : విశ్వ సుందరుల కోసం వీధికుక్కలు పట్టేస్తున్నారా..? ఎందుకిలా?

తెలంగాణ రాజధాని హైదరాబాద్ మిస్ వరల్డ్ 2025 ఫోటీలకోసం సిద్దమయ్యింది. ఈ క్రమంలోనే ఇవాళ ఛార్మినార్ వద్ద హెరిటేజ్ వాక్ నిర్వహించనున్నారు. ఇందుకోసం ఇప్పటికే అన్ని ఏర్పాట్లు చేసారు అధికారులు. 

Miss Wolrd 2025

Miss World 2025 : ప్రపంచ సుందరీమణులతో తెలంగాణ రాజధాని హైదరాబాద్ నగరం మరింత అందాన్ని సంతరించుకుంది. అందాల పోటీల నేపథ్యంలో హైదరాబాద్ నగరాన్ని కూడా ముస్తాబు చేసారు. వందకు పైగా దేశాలనుండి వచ్చిన అందగత్తెలు మిస్ వరల్డ్ కిరీటం కోసం పోటీపడనున్నారు.

అయితే తెలంగాణ సంస్కృతి, సాంప్రదాయాలను ప్రపంచానికి తెలియజేసేందుకు ఈ మిస్ వరల్డ్ పోటీలను వేదికగా చేసుకుంటామని రేవంత్ సర్కార్ స్పష్టం చేసింది. ఇందులో భాగంగానే నేడు (మంగళవారం) అన్నిదేశాల మద్దుగుమ్మలు  చారిత్రాత్మక ప్రాంతం ఓల్డ్ సిటీలో సందడి చేయనున్నారు. 

Miss World 2025

హైదరాబాద్ లోని ప్రముఖ పర్యాటక కేంద్రం ఛార్మినార్ వద్ద ప్రపంచ సుందరాంగులు హెరిటేజ్ వాక్ నిర్వహించనున్నారు. నిత్యం బిజిబిజీగా ఉండే పాతబస్తీ వీధుల్లో అందాల భామల క్యాట్ వాక్ కోసం అన్నిఏర్పాట్లు చేసారు అధికారులు. ఇప్పటికే ప్రపంచ సుందరుల హెరిటేజ్ వాక్ కు ఎలాంటి ఇబ్బందులు తలెత్తే అవకాశముందో తెలుసుకునేందుకు అధికారులు ట్రయల్ వాక్ నిర్వహించారు. ఇందులో ఆసక్తికర విషయం బైటపడింది. 

వీధుల్లోకి ఎవరైనా కొత్తవాళ్లు వస్తేనే వీధికుక్కలు అరుస్తుంటాయి.. అప్పుడప్పుడు వెంటపడి తరుముతుంటాయి. ఇదే సమస్య ప్రపంచ సుందరుల హెరిటేజ్ వాక్ కు ఎదురయ్యే అవకాశం ఉందని అధికారులు గుర్తించారు. పాతబస్తీలో కుక్కల బెడద ఎక్కువగా ఉండటంతో ఫ్యాషన్ దుస్తుల్లో క్యాట్ వాక్ చేసే మిస్ వరల్డ్ ఫోటీదారులకు ఇబ్బందులు తలెత్తే అవకాశం ఉందని అధికారులు గుర్తించారు. దీంతో వెంటనే జిహెచ్ఎంసి సిబ్బంది సహాయంతో ఛార్మినార్ ప్రాంతంలో విధికుక్కలను పట్టించారు. 

గత రెండురోజులుగా ఛార్మినార్ ప్రాంతంలో కనిపించిన వీధికుక్కను పట్టుకుని తరలించారు. ఇలా మొత్తం 50 కి పైగా కుక్కలను అక్కడినుండి తరలించినట్లు సమాచారం. వాటికి యాంటీరేబిస్ వ్యాక్సిన్ ఇచ్చి జనావాసాలకు దూరంగా తరలించినట్లు తెలుస్తోంది. ఇప్పుడు కుక్కల బెడద లేదు కాబట్టి అందగత్తెల హెరిటేజ్ వాక్ సజావుగా సాగుతుందని అధికారులు భావిస్తున్నారు. 

ఇదిలావుంటే 109 దేశాలకు చెందిన సుందరాంగుల హెరిటేజ్ వాకింగ్ నేపథ్యంలో ఛార్మినార్ వద్ద కట్టుదిట్టమైన భద్రతా చర్యలు చేపట్టారు. భారీ పోలీసుల రక్షణలో ఈ కార్యక్రమం జరగనుంది.. ఓల్డ్ సిటీ సంస్కృతిలో భాగమైన మార్ఫా వాయిద్యాలతో మిస్ వరల్డ్ కంటెస్టెంట్స్ కి స్వాగతం పలకనున్నారు. ఛార్మినార్ ను వీక్షించి చుట్టుపక్కల ప్రాంతాల్లో వీళ్లు సందడి చేయనున్నారు. చుడీ బజార్ లో ముద్దుగుమ్మలు షాపింగ్ చేయనున్నారు.