సముద్రంపై అతి పొడవైన బ్రిడ్జి: అటల్ సేతు విశేషాలివీ....

మహారాష్ట్రలో పలు కార్యక్రమాల్లో ప్రధాన మంత్రి నరేంద్ర మోడీ ఇవాళ పాల్గొంటారు. దేశంలో సముద్రంపై అతి పొడవైన వంతెనను మోడీ ప్రారంభిస్తారు.  

సముద్రంపై అతి పొడవైన బ్రిడ్జి: అటల్ సేతు విశేషాలివీ....

దేశంలో  సముద్రంపై అతి పొడవైన  అటల్ సేతు బ్రిడ్జిని  ప్రధాన మంత్రి నరేంద్ర మోడీ  శుక్రవారం నాడు ప్రారంభించనున్నారు.  ఈ బ్రిడ్జి ద్వారా ప్రజలకు ట్రాఫిక్ కష్టాలు తీరనున్నాయి. అంతేకాదు దక్షిణాది రాష్ట్రాలకు కూడ  ప్రయాణించే  సమయం కూడ తక్కువ కానుంది.  దివంగత ప్రధాన మంత్రి అటల్ బిహారీ వాజ్ పేయ్ స్మారకార్ధం ఈ బ్రిడ్జికి అటల్ సేతుగా నామకరణం చేశారు. 

ప్రధానంగా ముంబై నగరంలోని ముంబై  నుండి నవీ ముంబై మధ్య ప్రయాణించే  సాధారణ ప్రయాణీకుల కష్టాలు తీర్చనుంది. అటల్ సేతు బ్రిడ్జి   పొడవు 21.8 కి.మీ. ఆరు లేన్లతో ఈ బ్రిడ్జిని నిర్మించారు.  ఇది సముద్రంలో  16.5 కి.మీ. భూమిపై 5.5 కి.మీ. పొడవు ఉంటుంది.  భారత దేశంలో సముద్రంపై  ఉన్న అత్యంత పొడవైన వంతెన ఇదే.

ముంబై నుండి నవీ ముంబై మధ్య ప్రయాణ సమయం కూడ గణనీయంగా తగ్గనుంది.ప్రస్తుతం రద్దీ ఎక్కువగా ఉండడంతో  ఈ ప్రాంతం మధ్య ప్రయాణానికి  రెండు గంటల సమయం పడుతుంది.  అటల్ సేతుపై ప్రయాణం చేస్తే  20 నిమిషాల్లో గమ్యస్థానం చేరుకోవచ్చు.  అంతేకాదు నిరంతరం ట్రాఫిక్ జామ్ ల నుండి ఉపశమనం కలగనుంది. ఈ వంతెనపై  100 కి.మీ. వేగంతో  ప్రయాణం చేయవచ్చు.

ఎంఎంఆర్‌డీఏ, జేఐసీఏ నిర్వహించిన అధ్యయనం మేరకు  ఎంటీహెచ్ఎల్ సెర్వీ, చిర్లే మధ్య ప్రయాణం 61 నిమిషాల నుండి  16 నిమిషాలకు తగ్గనుంది.ప్రతి రోజూ కనీసం 40 వేల వాహనాలు ఈ బ్రిడ్జిపై నుండి ప్రయాణించనున్నాయని అధికారులు అంచనా వేస్తున్నారు.

పుణె, అలిబాగ్, గోవా, పన్వేల్ లను కూడ కలిపేందుకు  ఈ బ్రిడ్జి దోహద పడుతుంది.  నవీ ముంబైలో ఉన్న అంతర్జాతీయ  విమానాశ్రయం, ముంబై పుణె ఎక్స్‌ప్రెస్ వే, ముంబై గోవా హైవే ల మధ్య ఈ బ్రిడ్జి కనెక్టివిటిని గణనీయంగా మెరుగుపర్చనుంది.

ముంబైని ప్రధాన భూభాగానికి కలిపే బే క్రాసింగ్ ఆలోచనను 1963లో  అమెరికన్ కన్‌స్ట్రక్షన్ కన్సల్టెన్సీ సంస్థ  విల్బర్ స్మిత్ అసోసియేట్స్ తొలిసారిగా రూపొందించింది.ఆ తర్వాత ఈ ప్రతిపాదనలో ఎలాంటి కదలిక రాలేదు. అయితే  1990లో  ఈ ప్రణాళిక  పునరుద్దరించబడింది.  2006లో ఈ బ్రిడ్జి నిర్మాణానికి టెండర్లు పిలిచారు.

2008 ఫిబ్రవరిలో అనిల్ అంబానీ  రిలయన్స్ ఇన్‌ఫ్రాస్ట్రక్చర్స్ పబ్లిక్ ప్రైవేట్ పార్ట్‌నర్‌షిప్ మోడల్ ద్వారా  11 నెలల్లో  రూ. 6 వేల కోట్ల బ్రిడ్జి నిర్మాణానికి ముందుకు వచ్చింది. అయితే కొన్ని నెలల తర్వాత ఈ ప్రాజెక్టు నుండి అంబానీకి చెందిన రిలయన్స్ కంపెనీ తప్పుకుంది.  ఆ తర్వాత  నోడల్ ఏజెన్సీని మహారాష్ట్ర స్టేట్ రోడ్ డెవలప్ మెంట్ కార్పోరేషన్ నుండి ముంబై  మెట్రోపాలిటిన్ రీజియన్ డెవలప్ మెంట్ అథారిటీకి మార్చారు.

జపాన్ ఇంటర్నేషనల్ కో ఆపరేటివ్ ఏజెన్సీ (జేఐసీఏ)తో ఎంఎంఆర్‌డీఏ ఒప్పందం కుదుర్చుకుంది.  దీంతో ప్రాజెక్టు వ్యయంలో 80 శాతం రాష్ట్ర, కేంద్ర ప్రభుత్వాలు భరిస్తాయి.  2017 డిసెంబర్ లో  టెండరింగ్ పూర్తైంది.  2018లో  ఈ బ్రిడ్జి పనులు ప్రారంభమయ్యాయి.  ఈ బ్రిడ్జి నిర్మాణానికి  రూ. 21, 200 కోట్లు ఖర్చు చేశారు. ఇందులో రూ. 15, 100 జైకా నుండి రుణం తీసుకున్నారు.