Goa Trip: గోవా అంటే కేవలం బీచ్లు మాత్రమే కాదండోయ్.. మరో ప్రపంచం కూడా ఉంది
Goa Trip: గోవా అనగానే చాలా మందికి బీచ్లు, పార్టీలు, నైట్లైఫ్ గుర్తుకు వస్తాయి. కానీ గోవాలో అంతకంటే ఎన్నో అద్భుతమైన ప్రదేశాలు ఉన్నాయి. ప్రకృతి అందాలు, చారిత్రక కట్టడాలు, పాత సంస్కృతి, అడవులు, జలపాతాలు ఇలా ఎన్నో విశేషాలు కూడా ఉన్నాయని మీకు తెలుసా.?
బసిలికా ఆఫ్ బోమ్ జీసస్ – గోవా చరిత్రకు ప్రతీక
బసిలికా ఆఫ్ బొమ జీసస్ గోవాలోని అత్యంత ప్రసిద్ధ చర్చిలలో ఒకటి. 1594లో నిర్మించిన ఈ చర్చి యునెస్కో ప్రపంచ వారసత్వ సంపద జాబితాలో కూడా చోటు దక్కించుకుంది. ఇక్కడ ప్రముఖ క్రైస్తవ మిషనరీ సెయింట్ ఫ్రాన్సిస్ జేవియర్ మృతదేహాన్ని భద్రపరిచారు. పోర్చుగీస్ శైలిలో నిర్మించిన ఈ చర్చి గోవా వలస పాలన చరిత్రను ప్రతిబింబిస్తుంది. పాత గోవాలో ఉన్న ఈ ప్రాంతం చారిత్రక కట్టడాలతో నిండిపోయి ఉంటుంది.
దూద్సాగర్ జలపాతం – పాల సముద్రంలా కనిపించే అద్భుతం
దూద్సాగర్ జలపాతం భారతదేశంలోనే అత్యంత ఎత్తైన జలపాతాలలో ఒకటి. “దూద్సాగర్” అంటే “పాల సముద్రం” అనే అర్థం. సుమారు 300 మీటర్ల ఎత్తు నుంచి జాలువారే ఈ జలపాతం చూడటానికి అద్భుతంగా ఉంటుంది. ఈ జలపాతం భగవాన్ మహావీర్ వైల్డ్ లైఫ్ సాంక్చుయెరీ అడవుల్లో ఉంటుంది. ట్రైన్ ప్రయాణం, జీప్ సఫారీ లేదా ట్రెక్కింగ్ ద్వారా ఈ ప్రాంతానికి చేరుకోవచ్చు. పచ్చని అడవుల మధ్య ప్రవహించే ఈ జలపాతం ప్రకృతి ప్రేమికులకు స్వర్గంలా అనిపిస్తుంది.
ఫొంటైనాస్ లాటిన్ క్వార్టర్ – చిన్న పోర్చుగల్ అనిపించే వీధులు
ఫొంటైనాస్ ప్రాంతంలో నడుస్తుంటే పోర్చుగల్ వీధుల్లో తిరుగుతున్న భావన కలుగుతుంది. రంగురంగుల ఇళ్లు, పాతకాలపు బాల్కనీలు, వీధి దీపాలు ఈ ప్రాంతానికి ప్రత్యేక అందాన్ని ఇస్తాయి. ఇక్కడ చిన్న చిన్న కేఫేలు, ఆర్ట్ గ్యాలరీలు, హెరిటేజ్ హోమ్ స్టేలు ఎక్కువగా కనిపిస్తాయి. ఫోటోగ్రాఫర్లకు, కళాకారులకు ఇది చాలా ఇష్టమైన ప్రదేశం. దగ్గర్లోనే ఉన్నచర్చ్ ఆఫ్ అవర్ లేడీ ఆఫ్ ది ఇమాక్యులేట్ కన్సెప్షన్ కూడా పర్యాటకులను ఆకట్టుకుంటుంది.
దివార్, చోరావో దీవులు – ప్రశాంతమైన గోవా అందాలు
దివార్ దీవులు గోవాలో దాగి ఉన్న అందమైన ప్రదేశాలలో ఒకటి. పంజిమ్ నుంచి చిన్న పడవ ప్రయాణం చేస్తే ఈ దీవికి చేరుకోవచ్చు. పాత ఇళ్లు, చర్చిలు, గ్రామీణ వాతావరణం ఇక్కడ ప్రత్యేక ఆకర్షణ. ప్రతి సంవత్సరం ఆగస్టులో జరిగే బొండేరం ఫెస్టివల్ సమయంలో ఈ ప్రాంతం రంగురంగుల వేడుకలతో కళకళలాడుతుంది. అలాగే సమీపంలోని చోరా ఐల్యాండ్ ప్రకృతి ప్రేమికులకు ఎంతో నచ్చుతుంది. ఇక్కడ ఉన్న డాక్టర్ సలీమ్ అలీ బర్డ్ సాంచ్యూరీలో వలస పక్షులు, మాంగ్రోవ్ అడవులు చూడొచ్చు.
సె కేథడ్రల్ – ఆసియాలోనే భారీ చర్చిలలో ఒకటి
సె కేథడ్రల్ ఆసియాలోనే అతిపెద్ద చర్చిలలో ఒకటిగా గుర్తింపు పొందింది. 1562లో నిర్మించిన ఈ చర్చి పోర్చుగీస్-గోతిక్ శైలిలో అద్భుతంగా నిర్మించారు. ఈ చర్చి సెయింట్ కేథరిన్కు అంకితం చేశారు. పాత గోవాలోని ఇతర చారిత్రక చర్చిలతో కలిసి ఈ ప్రాంతం గోవా వలస పాలన కాలాన్ని గుర్తు చేస్తుంది.
అడవులు, వన్యప్రాణి అభయారణ్యాలు – గోవాలో మరో ప్రపంచం
గోవాలో దాదాపు మూడో వంతు ప్రాంతం అడవులతో నిండి ఉంటుంది. యునెస్కో గుర్తింపు పొందిన వెస్ట్రన్ ఘాట్స్లో అనేక వన్యప్రాణి అభయారణ్యాలు ఉన్నాయి. బాండ్లా వైల్డ్ లైఫ్ సాంచ్యూరీ, కాటిగో వైల్డ్ సాంచ్యూరీ, నెత్రావలీ వైల్డ్ లైఫ్ సాంచ్యూరీ వంటి ప్రాంతాల్లో జింకలు, నెమళ్లు, అరుదైన పక్షులను చూడొచ్చు. ఇక్కడ ట్రెక్కింగ్, ఎకో టూర్స్, అడవి సఫారీలు కూడా అందుబాటులో ఉంటాయి. గోవా అంటే కేవలం బీచ్లు మాత్రమే కాదు.. ప్రకృతి, చరిత్ర, సంస్కృతి కలిసిన అద్భుతమైన టూరిస్ట్ డెస్టినేషన్ అని ఈ ప్రదేశాలు నిరూపిస్తాయి.
