Cow Ghee vs Buffalo Ghee: ఆవు నెయ్యి Vs గేదె నెయ్యి.. ఆరోగ్యానికి ఏది మంచిదో తెలుసా?
నెయ్యి వంటలకు రుచిని పెంచడమే కాదు.. ఆరోగ్యానికి కూడా మేలు చేస్తుంది. రోజూ ఒక చెంచా నెయ్యి తింటే ఆరోగ్యానికి మంచిదని ఆయుర్వేదం చెబుతోంది. మరి మెరుగైన ఆరోగ్యానికి.. ఆవు నెయ్యి మంచిదో.. గేదె నెయ్యి మంచిదో ఇక్కడ తెలుసుకుందాం.
ఆవు నెయ్యి Vs గేదె నెయ్యి
ఆవు నెయ్యి: ఆవు నెయ్యి సాధారణంగా పసుపు రంగులో ఉంటుంది. దీనికి కారణం.. ఆవు తినే ఆహారంలో ఉండే 'బీటా కెరోటిన్'. ఇది మన శరీరంలో విటమిన్ A గా మారుతుంది. ఈ బీటా కెరోటిన్ ఒక సహజమైన వర్ణద్రవ్యం, యాంటీఆక్సిడెంట్.
గేదె నెయ్యి: గేదె నెయ్యి తెలుపు రంగులో ఉంటుంది. గేదె పాలలో బీటా కెరోటిన్ తక్కువగా ఉండటం వల్ల నెయ్యి తెలుపు రంగులో ఉంటుంది.
ఆవు నెయ్యిలో ఉండే పోషకాలు
ఆవు నెయ్యిలో విటమిన్ A, D, E, K లాంటి పోషకాలు పుష్కలంగా ఉంటాయి. ముఖ్యంగా విటమిన్ A, E ఎక్కువగా ఉంటాయి. జీర్ణక్రియకు సహాయపడే 'బ్యూట్రిక్ యాసిడ్' ఎక్కువగా ఉంటుంది. ఇది పేగు ఆరోగ్యానికి సహాయపడుతుంది. పేగు గోడలను బలోపేతం చేసి, మంచి బాక్టీరియా పెరుగుదలను ప్రోత్సహిస్తుంది.
అంతేకాదు ఆవు నెయ్యిలో 'కాంజుగేటెడ్ లినోలెయిక్ యాసిడ్' (CLA) అనే ఆరోగ్యకరమైన కొవ్వు ఆమ్లం ఎక్కువగా ఉంటుంది. ఇది జీవక్రియను మెరుగుపరచడానికి, బరువును నియంత్రించడానికి సహాయపడుతుంది. కాబట్టి ఆవునెయ్యిని పిల్లలు, వృద్ధులు సహా అన్ని వయసుల వారు తినచ్చు. ఇది సులభంగా జీర్ణమవుతుంది.
గేదె నెయ్యిలో ఉండే పోషకాలు:
గేదె నెయ్యిలో ఫాస్ఫరస్, మెగ్నీషియం, కాల్షియం వంటి ఖనిజాలు ఎక్కువగా ఉంటాయి. ముఖ్యంగా కాల్షియం, ఫాస్ఫరస్.. ఆవు నెయ్యిలో కంటే గేదె నెయ్యిలో ఎక్కువగా ఉంటాయి. కొవ్వు, కేలరీలు కూడా ఎక్కువే. బరువు పెరగాలనుకునే వారికి గేదె నెయ్యి చక్కగా ఉపయోగపడుతుంది. కీళ్లు, ఎముకల ఆరోగ్యానికి ఈ నెయ్యి మంచిది. ఇందులోని కొవ్వు.. ఎముకలను బలోపేతం చేయడానికి సహాయపడుతుంది.
గుండె ఆరోగ్యానికి ఏ నెయ్యి మంచిది?
తక్కువ కొవ్వు: ఆవు నెయ్యిలో గేదె నెయ్యి కంటే కొవ్వు తక్కువ. సులభంగా జీర్ణమవుతుంది. శరీరంలో అనవసర కొవ్వులు పేరుకుపోవడాన్ని తగ్గించి, పేగుల ఆరోగ్యాన్ని మెరుగుపరుస్తుంది. ఈ నెయ్యి గుండె ఆరోగ్యానికి కూడా మంచిది.
ఆరోగ్యకర కొవ్వులు: ఆవు నెయ్యిలో ‘మోనో అన్శాచురేటెడ్ ఫ్యాటీ యాసిడ్స్’, 'పాలీ అన్శాచురేటెడ్ ఫ్యాటీ యాసిడ్స్' వంటి ఆరోగ్యకర కొవ్వు ఆమ్లాలు ఉన్నాయి. ఇవి చెడు కొలెస్ట్రాల్ (LDL)ని తగ్గించి, మంచి కొలెస్ట్రాల్ (HDL)ని పెంచుతాయి. గుండె జబ్బులు వచ్చే అవకాశాన్ని తగ్గిస్తాయి.
CLA పాత్ర: ఆవు నెయ్యిలోని CLA.. శరీరంలో కొవ్వును తగ్గించి జీవక్రియను మెరుగుపరుస్తుంది. బరువును నియంత్రణకు, ఇన్సులిన్ స్థాయిలను సమతుల్యం చేయడానికి సహాయపడుతుంది.
వాపు తగ్గించే లక్షణాలు: నెయ్యిలోని బ్యూట్రిక్ యాసిడ్, కొన్ని కొవ్వు ఆమ్లాలు వాపు తగ్గించే లక్షణాలను కలిగి ఉంటాయి. ఈ లక్షణాలు గుండె ఆరోగ్యానికి మేలు చేస్తాయి.
విటమిన్ K2: ఆవు నెయ్యిలో విటమిన్ K2 ఉంటుంది. ఈ విటమిన్ ధమనుల్లో కాల్షియం పేరుకుపోవడాన్ని నిరోధిస్తుంది. ధమనుల్లో కాల్షియం పేరుకుపోవడం గుండె జబ్బులకు కారణమవుతుంది.
ఆయుర్వేదం ప్రకారం..
ఆవు నెయ్యి: ఆవు నెయ్యి… మానసిక ప్రశాంతత, జ్ఞాపకశక్తి, మొత్తం శారీరక ఆరోగ్యాన్ని మెరుగుపరుస్తుందని నిపుణులు చెబుతున్నారు. ఆయుర్వేద మందులు, చికిత్సల కోసం కూడా ఆవు నెయ్యిని ఉపయోగిస్తారని అంటున్నారు.
గేదె నెయ్యి: గేదె నెయ్యి.. శారీరక బలం, కండరాల పెరుగుదల, శక్తిని పెంచుతుంది. ఎక్కువ శారీరక శ్రమ చేసేవారికి, బరువు పెరగాలనుకునే వారికి ఇది మంచిది. అయితే ఆయుర్వేదంలో దీని ఔషధ గుణాలు ఆవు నెయ్యి కంటే తక్కువగా ఉంటాయి.
నిల్వ కాలం:
గేదె నెయ్యిలో కొవ్వు ఎక్కువగా ఉండటం వల్ల.. ఆవు నెయ్యి కంటే ఎక్కువ కాలం నిల్వ ఉంటుంది.
ఆవు నెయ్యి, గేదె నెయ్యి రెండూ వాటి ప్రత్యేక ప్రయోజనాలను కలిగి ఉంటాయి. గుండె ఆరోగ్యం, బరువు నియంత్ర, ఆయుర్వేద ఔషధ గుణాల కోసం ఆవు నెయ్యి మంచిదని నిపుణులు సూచిస్తున్నారు. గేదె నెయ్యి బరువు పెరగడానికి, ఎక్కువ శక్తి అవసరమైన వారికి మంచిదట.
ఏ నెయ్యిని అయినా మితంగా తీసుకోవడం ముఖ్యం. రోజుకు 1 నుంచి 2 టీ స్పూన్ల నెయ్యి తీసుకోవడం మంచిది. మీ ఆరోగ్యం, అవసరాలను బట్టి వైద్యుల సలహాతో నెయ్యిని తీసుకోవడం మంచిది.
