పరగడుపునే ఒక స్పూన్ నెయ్యి తింటే ఇన్ని లాభాలా? గుండెకు కూడా మంచిదేనట
నెయ్యిలో కొలెస్ట్రాల్ ఉంటుందని చాలామంది దాన్ని తినడం మానేస్తారు. కానీ ప్రతిరోజూ ఒక చెంచా నెయ్యి తినాలని ఆయుర్వేదం చెబుతోంది. ప్రతిరోజూ ఉదయం ఖాళీ కడుపుతో ఒక చెంచా నెయ్యి తింటే కలిగే లాభాలు తెలిస్తే మీరు వెంటనే నెయ్యి తినడం ప్రారంభిస్తారు. నెయ్యి వల్ల లాభాలు తెలుసుకుందాం రండి.
మీకు తెలుసా? నెయ్యిలో బ్యూట్రిక్ ఆమ్లం చాలా ఎక్కువగా ఉంటుంది. ఇది పేగుల్లో మంచి బాక్టీరియా పెరగడానికి సహాయపడుతుంది. పేగులు ఆరోగ్యంగా ఉంటే రోగనిరోధక శక్తి ఆటోమెటిక్ గా పెరుగుతుంది. నెయ్యిలో విటమిన్ ఎ, డి, ఇ, కె వంటి విటమిన్లు కూడా ఉంటాయి. ఇవి శరీరంలోని రోగనిరోధక వ్యవస్థను బలోపేతం చేస్తాయి.
యాంటీఆక్సిడెంట్లు పుష్కలంగా ఉండటం వల్ల శరీరంలో హానికరమైన ఫ్రీ రాడికల్స్తో పోరాడటానికి నెయ్యి సహాయపడుతుంది. నెయ్యిలోని కాంజుగేటెడ్ లినోలెయిక్ ఆమ్లం (CLA) రోగనిరోధక శక్తిని పెంచే లక్షణాలను కలిగి ఉందని కొన్ని అధ్యయనాలు కూడా చెబుతున్నాయి.
ఖాళీ కడుపుతో నెయ్యి తినడం జీర్ణవ్యవస్థకు చాలా మంచిది. ఇది పేగు గోడలను స్మూత్ గా చేస్తుంది. ఆహారం సులభంగా జీర్ణం కావడానికి సహాయపడుతుంది. నెయ్యిలోని బ్యూట్రిక్ ఆమ్లం పేగు కదలికలను నియంత్రిస్తుంది.
పరగడుపునే ఒక స్పూన్ నెయ్యి తినడం వల్ల మలబద్ధకం వంటి సమస్యలు తగ్గుతాయి. ఇది కడుపులో యాసిడ్ లెవల్స్ ను సమానం చేయడంలో సహాయపడుతుంది. తద్వారా గుండెల్లో మంట, అజీర్తి వంటి సమస్యలు తగ్గుతాయి.
నెయ్యిలో కొవ్వు ఎక్కువగా ఉన్నప్పటికీ అది గుండెకు హానికరం కాదు. కాని చాలా మంది నెయ్యి తింటే కొవ్వు పెరిగిపోయి గుండె వాల్వ్ మూసుకుపోతాయని భయపడుతుంటారు.
నెయ్యిలోని షార్ట్ చైన్ ఫ్యాటీ యాసిడ్స్, మీడియం చైన్ ట్రైగ్లిజరైడ్స్ (MCTలు) గుండె ఆరోగ్యానికి మేలు చేస్తాయి. ఇవి శరీరంలో మంచి కొలెస్ట్రాల్ (HDL) స్థాయిలను పెంచడానికి, చెడు కొలెస్ట్రాల్ (LDL) స్థాయిలను నియంత్రించడానికి సహాయపడతాయి. అయితే ఎక్కువ నెయ్యి తినడం కూడా మంచిది కాదు. అవసరమైన మేరకు తినడం గుండెకు మంచిది.
ఖాళీ కడుపుతో నెయ్యి తినడం ఆశ్చర్యంగా అనిపించవచ్చు.. కానీ ఇది బరువును కంట్రోల్ చేయడానికి కూడా సహాయపడుతుంది. నెయ్యిలోని ఆరోగ్యకరమైన కొవ్వులు ఎక్కువసేపు ఆకలిని దూరం చేస్తాయి. దీనివల్ల మీరు తక్కువ ఆహారం తీసుకుంటారు. ఇది బరువు తగ్గడానికి సహాయపడుతుంది. నెయ్యిలోని MCTలు జీవక్రియను పెంచుతాయి. ఇది శరీరంలో కేలరీలు కరగడాన్ని వేగవంతం చేస్తుంది.