Tatkal Passport : కేవలం మూడు రోజుల్లోనే మీ చేతికి పాస్ పోర్ట్... ఎలాగో తెలుసా?
మీరు అర్జెంట్గా విదేశాలకు వెళ్లాల్సి ఉందా? కానీ మీ దగ్గర పాస్ పోర్ట్ లేదా? ఏం కంగారుపడకండి. కేవలం 3 రోజుల్లోనే పాస్పోర్ట్ మీ చేతికి వచ్చే అద్భుతమైన ప్లాన్ ఒకటి ఉంది. అదేంటో ఇక్కడ తెలుసుకుందాం.
ఏమిటీ తత్కాల్ పాస్ పోర్ట్?
పాస్ పోర్ట్... విదేశాలకు వెళ్లాలంటే ఇది తప్పనిసరి. కానీ ఈ పాస్ పోర్ట్ పొందేందుకు లాంగ్ ప్రాసెస్ ఉంటుంది... అందుకే చాలామంది విదేశీ ప్రయాణాలు లేకున్నా ముందుజాగ్రత్తగా దీన్ని తీసిపెట్టుకుంటారు. ఉన్నత చదువులు, ఉద్యోగ పనులు లేదా మరేదైనా కారణంతో అత్యవసరంగా విదేశాలకు వెళ్లాల్సి రావచ్చు... ఇలాంటప్పుడు చేతిలో పాస్ పోర్ట్ ఉంటే ఎలాంటి ఇబ్బంది ఉండదు. కానీ పాస్ పోర్ట్ లేకుంటే పరిస్ధితి ఏంటి? అయినా ఆందోళన చెందాల్సిన పనిలేదు. అత్యవసర సమయాల్లో జెట్ స్పీడ్ లో పాస్ పోర్ట్ అందించేందుకు కేంద్ర ప్రభుత్వం ప్రత్యేక ఏర్పాటు చేసింది... అదే తత్కాల్ పాస్ పోర్ట్.
తత్కాల్ పాస్ పోర్ట్ ఎన్నిరోజులకు జారీ చేస్తారు?
విదేశాల్లో ఉద్యోగం, చదువు, వైద్యం, వ్యాపారం లేదా మరేదైనా అత్యవసర పని మీద వెళ్లాల్సి వస్తే తత్కాల్ పాస్పోర్ట్ పొందవచ్చు. సాధారణంగా అయితే పాస్ట్ పోర్ట్ జారీకి 30 నుండి 45 రోజులు పడుతుంది... కానీ ఈ తత్కాల్ పాస్ పోర్ట్ ను కేవలం మూడు రోజుల్లోనే పొందవచ్చు. ఒకేరోజులో తత్కాల్ పాస్ పోర్ట్ జారీచేసిన సందర్భాలు కూడా ఉన్నాయి. ఈ తత్కాల్ పాస్ పోర్ట్ పొందాలంటే అవసరమైన డాక్యుమెంట్లు, ప్రాసెస్, నియమాల గురించి కచ్చితంగా తెలిసి ఉండాలి... లేదంటే అప్లికేషన్ రిజెక్ట్ అయ్యే ప్రమాదం ఉంది.
తత్కాల్ పాస్ పోర్ట్ కు ఎలా దరఖాస్తు చేసుకోవాలి?
ఈ ఫాస్ట్ ట్రాక్ పాస్పోర్ట్ కోసం దరఖాస్తుదారులు అన్ని డాక్యుమెంట్లను సరైన సమాచారంతో సబ్మిట్ చేయాలి. పాస్పోర్ట్ సేవా కేంద్రంలో మీ అప్లికేషన్ ఆమోదం పొందాక కేవలం 3 పనిదినాల్లోనే పాస్పోర్ట్ జారీ చేస్తారు. ఇలా అత్యవసర సమయాల్లో ఈ తత్కాల్ పాస్ పోర్ట్ స్కీమ్ ఆదుకుంటుంది.
తత్కాల్ పాస్ పోర్ట్ కోసం అప్లై చేసేవారికి, సాధారణ పద్ధతిలో అప్లై చేసేవారికంటే అపాయింట్మెంట్ త్వరగా దొరుకుతుంది. ఈ స్కీమ్కు ప్రత్యేక ప్రాధాన్యం ఇస్తారు కాబట్టి, పనులు వేగంగా జరుగుతాయి. చాలా సందర్భాల్లో ముందుగా ఈ తత్కాల్ పాస్పోర్ట్ జారీ చేసి, ఆ తర్వాతే పోలీస్ వెరిఫికేషన్ చేస్తారు. ఇది దరఖాస్తుదారుల సమయాన్ని బాగా ఆదా చేస్తుంది.
ఈ విషయాలు మర్చిపోవద్దు
తత్కాల్ పాస్పోర్ట్ కోసం అప్లై చేసేముందు అవసరమైన అన్ని డాక్యుమెంట్లు సరిగ్గా ఉన్నాయో లేవో చెక్ చేసుకోండి. తప్పుడు సమాచారం, అసంపూర్ణ డాక్యుమెంట్లు లేదా అప్లికేషన్లోని తప్పుల వల్ల మీ దరఖాస్తు తిరస్కరణకు గురయ్యే అవకాశం ఉంది. కాబట్టి అప్లికేషన్ ఫామ్ నింపేటప్పుడు అన్ని నియమ నిబంధనలను జాగ్రత్తగా పాటించడం ముఖ్యం. ఒకటికి రెండుసార్లు వివరాలన్ని సరిచూసుకున్నాకే ఈ తత్కాల్ పాస్ పోర్ట్ అప్లికేషన్ సబ్మిట్ చేయండి… అర్జెంటుగా పాస్ పోర్ట్ కావాలంటే ఈమాత్రం జాగ్రత్తగా ఉండటం అవసరం.
పాస్ పోర్ట్ ఛార్జీలు పెంపు
భారత ప్రభుత్వం ఇటీవల పాస్ పోర్ట్ ఛార్జీలను పెంచుతున్నట్లు కీలక ప్రకటన చేసింది. ఇలా సాధారణ పాస్ పోర్ట్ తో పాటు తత్కాల పాస్ పోర్ట్ ఛార్జీలు కూడా పెరగనున్నాయి. జూలై 1 నుండి ఈ పెరిగిన ఛార్జీలు అమలులోకి రానున్నాయి... ఈ మేరకు విదేశాంగ మంత్రిత్వ శాఖ అధికారిక ఉత్తర్వులు జారీ చేసింది.
ఇప్పటివరకు 36 పేజీల సాధారణ పాస్ పోర్ట్ కోసం కేవలం రూ.1500 చెల్లిస్తే సరిపోయేది. కానీ జూలై 1 నుండి మరో వెయ్యి ఎక్స్ట్రాగా చెల్లించాలి... అంటే రూ.2,500 వసూలు చేస్తారన్నమాట. అదే 60 పేజీల సాధారణ పోర్ట్ కు గతంలో రూ.2000 చెల్లించాల్సి ఉండేది... దీన్ని రూ.3500 కు పెంచారు. అంటే ఈ పాస్ట్ పోర్ట్ పై రూ.1500 పెంచారన్నమాట.
ఇక తత్కాల్ పాస్ పోర్ట్ ఛార్జీల విషయానికి వస్తే 36 పేజీల పాస్ పోర్ట్ కు రూ.5000 చెల్లించాలి. ఇప్పటివరకు ఈ ఛార్జీలు కేవలం రూ.3500 మాత్రమే. 60 పేజీల తత్కాల్ పాస్ట్ పోర్ట్ ఛార్జీలు రూ.4000 నుండి రూ.6000 పెంచారు. ఇలా సాధారణ, తత్కాల్ పాస్ పోర్ట్ ఛార్జీలు రూ.1000 నుండి 2000 పెరిగాయి.
