- Home
- Feature
- India's Wettest Village: 365 రోజులూ వర్షం పడే ఇండియన్ విలేజ్.. అక్కడ గొడుగులు ఎందుకు వాడరో తెలిస్తే షాక్ అవుతారు !
India's Wettest Village: 365 రోజులూ వర్షం పడే ఇండియన్ విలేజ్.. అక్కడ గొడుగులు ఎందుకు వాడరో తెలిస్తే షాక్ అవుతారు !
India's Wettest Village : ప్రపంచంలోనే అత్యధిక వర్షపాతం నమోదయ్యే గ్రామం మన ఇండియాలోనే ఉంది. అదే మేఘాలయలోని 'మావ్సిన్రామ్. అయితే, 365 రోజులు వర్షం పడినా అక్కడ గొడుగులు మాత్రం ఉపయోగించరు. ఈ గ్రామం ఆసక్తికరమైన విషయాలు ఇక్కడ తెలుసుకుందాం.
365 రోజులు వానలే వానలు.. అసలు ఏమిటీ మావ్సిన్రామ్ మ్యాజిక్?
మన ఊర్లో రెండు రోజులు గ్యాప్ లేకుండా వర్షం పడితేనే చాలు.. అబ్బా ! ఏంట్రా ఈ వాన అంటూ విసిగిపోతాం. కానీ, సంవత్సరంలో 365 రోజులూ ఏదో ఒక రూపంలో వర్షం పడుతూనే ఉండే ఊరు ఒకటి మన ఇండియాలోనే ఉందంటే నమ్ముతారా? అవును, మేఘాలయ రాష్ట్రంలోని మావ్సిన్రామ్ (Mawsynram) అనే చిన్న గ్రామంలో ప్రకృతి చేసే వింతలు చూస్తే ఎవరైనా నోరెళ్లబెట్టాల్సిందే.
ఒకప్పుడు ప్రపంచంలోనే అత్యధిక వర్షపాతం నమోదయ్యే ప్రాంతంగా మనకు చిరపుంజి మాత్రమే తెలుసు. కానీ, ఇప్పుడు ఆ రికార్డును మావ్సిన్రామ్ బ్రేక్ చేసింది. చిరపుంజికి కేవలం 16 కిలోమీటర్ల దూరంలో ఉండే ఈ గ్రామం, ఇప్పుడు ప్రపంచంలోనే అత్యంత తేమతో కూడిన ప్రాంతంగా గిన్నిస్ బుక్ ఆఫ్ రికార్డ్స్లోకెక్కింది. కానీ, ఇక్కడ గొడుగులు ఉపయోగించరు.
గిన్నిస్ రికార్డుల కెక్కిన వాన.. ఆకాశానికి చిల్లు పడిందా అన్నట్లు కుండపోత వర్షం
భౌగోళికంగా చూస్తే మావ్సిన్రామ్ గ్రామం మేఘాలయ రాజధాని షిల్లాంగ్కు దాదాపు 60 కిలోమీటర్ల దూరంలో, సముద్ర మట్టానికి 1,491 మీటర్ల ఎత్తులో తూర్పు ఖాసీ హిల్స్ జిల్లాలో ఉంది. ఇక్కడ ఏడాదికి సగటున 11,871 మిల్లీమీటర్ల వర్షపాతం నమోదవుతుంది. సాధారణ ప్రాంతాల్లో ఒక ఏడాది మొత్తం కురిసే వర్షం, ఈ విలేజ్లో జస్ట్ ఒక్క వారంలోనే కురిసేస్తుంది. ముఖ్యంగా జూన్ నుండి సెప్టెంబర్ వరకు వచ్చే మాన్సూన్ సీజన్లో ఇక్కడ వానలు దంచికొడతాయి. బంగాళాఖాతం నుండి వచ్చే తేమతో కూడిన రుతుపవన గాలులు ఇక్కడి ఖాసీ కొండలను ఢీకొట్టడం వల్లే ఇక్కడ ఇంత భారీగా వర్షాలు కురుస్తాయని శాస్త్రవేత్తలు చెబుతున్నారు.
ఈ ఊర్లో గొడుగులు ఎందుకు పని చేయవు?
ఇంత భారీ వర్షాలు పడే చోట ప్రతి ఒక్కరి చేతిలో గొడుగు ఉండాలి కదా? కానీ ఈ గ్రామంలో ఎవ్వరూ గొడుగులు వాడరు. ఎందుకంటే మావ్సిన్రామ్లో కేవలం వర్షమే కాదు, కొండల మధ్య నుండి విపరీతమైన వేగంతో బలమైన ఈదురుగాలులు వీస్తాయి. అలాంటి గాలుల్లో మనం మామూలుగా వాడే గొడుగులు పట్టుకుంటే, అవి కాసేపు కూడా తట్టుకోలేవు. క్షణాల్లో రివర్స్ అయిపోయి, విరిగిపోయి గాల్లో ఎగిరిపోతాయి.
పైగా ఇక్కడి స్థానిక ఖాసీ తెగ ప్రజలు ఎక్కువగా వ్యవసాయం, తోటల పెంపకం పనులపైనే ఆధారపడి జీవిస్తారు. పొలాల్లో బురదలో పని చేసేటప్పుడు ఒక చేత్తో గొడుగు పట్టుకుని, ఇంకో చేత్తో పని చేయడం సాధ్యం కాదు కదా. అందుకే వీరు గొడుగులకు గుడ్ బై చెప్పేసి, ఒక అద్భుతమైన దేశీ ఐడియాతో తమను తాము కాపాడుకుంటున్నారు.
క్నుప్స్ కథే వేరు.. తాబేలు వీపు లాంటి క్రేజీ వాన కవచం ఇది
గొడుగులు ఫెయిల్ అయిన చోట స్థానికులు కనిపెట్టిన పర్యావరణ అనుకూల ఆయుధమే క్నుప్స్. చూడటానికి ఇది అచ్చం ఒక పెద్ద తాబేలు వీపు పెంకు లాగా కనిపిస్తుంది. స్థానికంగా దొరికే వెదురు బద్దలు, అడవిలో లభించే దట్టమైన ఆకులను ఉపయోగించి చేతితో దీనిని అల్లుతారు.
దీనిని రెయిన్కోట్లాగా ఒంటికి తగిలించుకుంటే తల నుండి మోకాళ్ల వరకు శరీరం మొత్తం కవర్ అయిపోతుంది. చేతులతో పట్టుకోవాల్సిన అవసరం వుండదు. రైతులు హ్యాపీగా పొలం పనులు చేసుకోవచ్చు. తాబేలు చిప్ప ఆకారంలో ఉండటం వల్ల ఎంత పెద్ద గాలి వీచినా ఇది అస్సలు పాడవదు, గాలికి కొట్టుకుపోదు.
ప్రకృతితో దోస్తీ.. వాన పడినా ఆగని లైఫ్ స్టైల్
నిత్యం వర్షం పరిస్థితులకు అలవాటుపడిన ప్రజలు ప్రకృతితో దోస్తీ చేస్తూ తమ లైఫ్ స్టైల్ ను కొనసాగిస్తున్నారు. వాన పడుతున్నా క్నుప్స్ తగిలించుకుని తమ పనులు పూర్తి చేసుకుంటారు. ఇక్కడి ఇళ్లకు పెంకులు గానీ, గడ్డి గానీ వాడితే ఆ వర్షానికి కొట్టుకుపోతాయని, అందరూ మందపాటి రేకుల షీట్లను మాత్రమే పైకప్పులుగా వాడుతుంటారు. ఇక్కడ నేల చాలా సారవంతంగా ఉండటం వల్ల తేయాకు, నారింజ వంటి తోటలను స్థానిక రైతులు సాగు చేస్తున్నారు.
