అరుదైన ఘనతకు అర్థ సెంచరీ దూరంలో వార్నర్.. పంజాబ్ తో మ్యాచ్ లో సాధిస్తే ఐపీఎల్ లో రెండో ఆటగాడిగా రికార్డు

TATA IPL 2022- DC vs PBKS: ఢిల్లీ క్యాపిటల్స్ ఓపెనర్ డేవిడ్ వార్నర్ ఐపీఎల్ లో  ఇప్పటికే పలు రికార్డులు నెలకొల్పాడు. అయితే తాజాగా అతడు అరుదైన ఘనతకు అర్థ సెంచరీ దూరంలో ఉన్నాడు. ఆ రికార్డు ఏంటంటే... 

ఆస్ట్రేలియా వెటనర్ ఆటగాడు, ఐపీఎల్ లో ఢిల్లీ క్యాపిటల్స్ తరఫున ఆడుతున్న  డేవిడ్ వార్నర్.. నేడు పంజాబ్ కింగ్స్ తో మ్యాచ్ ఆడనున్నాడు. ఈ నేపథ్యంలో అతడిని ఓ అరుదైన రికార్డు ఊరిస్తున్నది. 

పంజాబ్ కింగ్స్ పై మరో 55 పరుగులు చేస్తే వార్నర్ భాయ్.. ఆ ఫ్రాంచైజీపై  వెయ్యి పరుగులు చేసిన ఆటగాడిగా రికార్డులకెక్కుతాడు. ఇప్పటివరకు ఐపీఎల్ లో పంజాబ్ తో 21 ఇన్నింగ్స్ లు ఆడిన వార్నర్.. 945 పరుగులు చేశాడు. 

ఒకవేళ  వార్నర్ భాయ్ ఈ మ్యాచ్ లో  గనక హాఫ్ సెంచరీ చేసి ఈ ఘనతను సాధిస్తే ఐపీఎల్ లో  ఇలా ఒక జట్టుపై వెయ్యి పరుగులు చేసిన రెండో ఆటగాడవుతాడు. గతంలో ఈ రికార్డు ముంబై ఇండియన్స్ సారథి రోహిత్ శర్మ పేరిట ఉండేది. 

హిట్ మ్యాన్.. ఐపీఎల్ లో కోల్కతా నైట్ రైడర్స్ పై  వెయ్యి పరుగులు పూర్తి చేశాడు.ఐపీఎల్ లో ఒక ఫ్రాంచైజీ పై వెయ్యి రన్స్ కొట్టిన తొలి ఆడగాడు హిట్ మ్యానే కావడం గమనార్హం.  

ఇక దీంతో పాటు మరికొన్ని రికార్డులు కూడా వార్నర్  పేరిట నమోదు కావడానికి సిద్ధంగా ఉన్నాయి. ఈ మ్యాచ్ లో అతడు మరో 61 పరుగులు చేస్తే టీ20లలో 10,500 పరుగులు పూర్తి చేస్తాడు. 

అంతేగాక..  మరో నాలుగు సిక్సర్లు బాదితే టీ20లలో 400 సిక్సర్లు కొట్టిన ఆటగాడిగా వార్నర్ చేరుతాడు. తాజాగా వార్నర్ ఫామ్ చూస్తుంటే ఈ రికార్డులను బ్రేక్ చేయడం పెద్ద సాధ్యమేమీ కాదు. ఈ సీజన్ లో  అతడు మూడు మ్యాచులాడి 131 పరుగులు చేశాడు. 

లక్నో తో  ఆడిన మ్యాచ్ లో నాలుగు పరుగులే చేసినా.. తర్వాత కోల్కతా తో మ్యాచ్ లో 45 బంతుల్లో 61 పరుగులు చేయగా.. తర్వాత బెంగళూరుతో 38 బంతుల్లోనే 66 రన్స్ చేశాడు. ఇప్పటికే రెండు హాఫ్ సెంచరీలను పూర్తి చేసుకున్న వార్నర్.. పంజాబ్ తో మ్యాచ్ లో కూడా చెలరేగాలని ఢిల్లీ అభిమానులు కోరుకుంటున్నారు.