కేటీఆర్ సంచలన వ్యాఖ్యలు: టార్గెట్ ఈటల రాజేందర్

ఈటల రాజేందర్ వ్యాఖ్యలు టీఆర్ఎస్ లో కలకలం రేపుతున్నట్లే ఉన్నాయి. కేటీఆర్ ఈటల రాజేందర్ ను లక్ష్యం చేసుకుని తీవ్ర వ్యాఖ్యలు చేశారు. పార్టీ పల్లనే పదవులు వచ్చాయని గుర్తు పెట్టుకోవాలని ఆయన హితవు పలికారు.

హైదరాబాద్: తాజా పరిణామాలపై తెలంగాణ రాష్ట్ర సమితి (టీఆర్ఎస్) వర్కింగ్ ప్రెసిడెంట్ కేటీ రామారావు సంచలన వ్యాఖ్యలు చేశారు. పదవులు రాగానే కొందరు నేతలు పెద్ద మాటలు మాట్లాడుతున్నారని ఆయన అన్నారు. పదవులు వచ్చింది పార్టీ వల్లనే అని గుర్తుంచుకోవాలని ఆయన అన్నారు. 

ప్రజలే బాసులనే విషయాన్ని గుర్తుంచుకోవాలని కేటీఆర్ వ్యాఖ్యానించారు. మంత్రి ఈటల రాజేందర్ ను లక్ష్యంగా చేసుకుంటూ కేటీ రామారావు ఆ వ్యాఖ్యలు చేశారని భావిస్తున్నారు. మున్సిపల్ ఎన్నికల నేపథ్యంలో జరిగిన పార్టీ సమావేశంలో ఆయన మంగళవారం మాట్లాడారు. 

పార్టీకి ఓనర్లం తామేనని ఈటల రాజేందర్ ఇటీవల హుజూరాబాద్ సభలో వ్యాఖ్యానించిన విషయం తెలిసిందే.. తనకు మంత్రి పదవి ఎవరి బిక్షా కాదని, కులం పేరుతో తాను మంత్రి పదవి పొందలేదని ఆయన అన్నారు. 

ప్రజల అండతోనే తాను విజయం సాధించి, మంత్రినయ్యానని, తెలంగాణ ఉద్యమమే తనను మంత్రిని చేసిందని ఈటల అన్నారు. ఈ స్థితిలో కేటీఆర్ చేసిన వ్యాఖ్యలు కలకలం రేపుతున్నాయి. ఈటల వ్యాఖ్యలను దృష్టిలో పెట్టుకుని ఆయన ఆ వ్యాఖ్యలు చేసినట్లు భావిస్తున్నారు.

సంబంధిత వార్తలు