నాన్‌బెయిలబుల్ కేసులతో కోడెలను హింసించారు: చంద్రబాబు

కోడెల శివప్రసాదరావుపై నాన్ బెయిలబుల్ కేసులు పెట్టడంతో పాటు.. ఒకదాని వెంట మరో కేసులో అరెస్ట్ చేస్తూ వచ్చారని బాబు ఎద్దేవా చేశారు. సాక్షి మీడియాలో కోడెలకు వ్యతిరేకంగా విషప్రచారం చేశారని చంద్రబాబు ఆరోపించారు

కోడెల ఆత్మహత్య నేపథ్యంలో వైఎస్ జగన్ ప్రభుత్వంపై టీడీపీ అధినేత చంద్రబాబు మండిపడ్డారు. కోడెల శివప్రసాదరావుపై నాన్ బెయిలబుల్ కేసులు పెట్టడంతో పాటు.. ఒకదాని వెంట మరో కేసులో అరెస్ట్ చేస్తూ వచ్చారని బాబు ఎద్దేవా చేశారు.

సాక్షి మీడియాలో కోడెలకు వ్యతిరేకంగా విషప్రచారం చేశారని చంద్రబాబు ఆరోపించారు. దేశం మొత్తం మీద జరిగే అవినీతిని ఒక్క వ్యక్తి చేశాడని.. ఆయనే ముఖ్యమంత్రి జగన్ అన్నారు.

అటువంటి వ్యక్తి వేరే వాళ్లపై బురద జల్లే కార్యక్రమం పెట్టుకున్నారని.. దీనిపై సాక్షిలో ప్రతిరోజు హైలైట్ చేశారని చంద్రబాబు ధ్వజమెత్తారు.

కోడెల తరపు న్యాయవాదులు పోలీస్ స్టేషన్‌కు వెళ్లి.. 41, 41 ఏ సీఆర్‌పీసీ సెక్షన్ల కింద స్టేషన్ బెయిల్ ఇవ్వొచ్చు కదా అని అడిగితే.. పోలీసులు ఇవ్వమని ఖరాఖండిగా చెప్పారని చంద్రబాబు గుర్తు చేశారు.

అక్కడితో ఆగకుండా న్యాయవాదుల పట్ల అసభ్యకరంగా ప్రవర్తించారని బాబు మండిపడ్డారు. స్వయంగా కోడెల జిల్లా ఎస్పీని కలిస్తే అక్కడ కూడా ఇదే తరహా సమాధానం వచ్చిందని ఎద్దేవా చేశారు.