గుంటూరు చేరుకున్న కోడెల భౌతికకాయం

టీడీపీ సీనియర్ నేత, ఏపీ అసెంబ్లీ మాజీ స్పీకర్ కోడెల శివప్రసాదరావు భౌతిక కాయం గుంటూరు లోని ఆంధ్రప్రదేశ్ తెలుగుదేశం పార్టీ కార్యాలయానికి చేరుకుంది. ఈ సందర్భంగా చంద్రబాబు, నారా లోకేశ్‌లు కోడెలకు నివాళులర్పించారు.

తమ అభిమాన నేతను కడసారి చూసేందుకు అభిమానులు, టీడీపీ కార్యకర్తలు వర్షాన్ని సైతం లెక్కచేయకుండా పెద్ద సంఖ్యలో అక్కడికి చేరుకున్నారు.. వారిని అదుపు చేయడం పోలీసులకు కష్టంగా మారింది.

ఈ క్రమంలో కార్యకర్తలకు, పోలీసులకు వాగ్వాదం జరిగింది. కోడెల పార్థివదేహాన్ని ప్రజల సందర్శనార్ధం అక్కడే వుంచి అనంతరం ఊరేగింపుగా నరసరావుపేటకు తీసుకెళ్లనున్నారు.

ఉదయం హైదరాబాద్‌లోని ఎన్టీఆర్ ట్రస్ట్ భవన్ నుంచి రోడ్డు మార్గంలో కోడెల మృతదేహాన్ని గుంటూరు తీసుకొచ్చారు. అంబులెన్స్ వెంట తెలుగుదేశం అధినేత చంద్రబాబు, ఇతర నేతలు ఉన్నారు.