సోమ కుటుంబానికి పరామర్శ: అండగా ఉంటానని చంద్రబాబు భరోసా

మావోయిస్టుల చేతిలో ప్రాణాలు కోల్పోయిన అరకు మాజీ ఎమ్మెల్యే సివేరి సోమ కుటుంబ సభ్యులను ఏపీ సీఎం చంద్రబాబు నాయుడు పరామర్శించారు. శుక్రవారం అరకులో సివేరి సోమ నివాసానికి వెళ్లిన చంద్రబాబు ఆయన చిత్రపటానికి పూలమాలలు వేసి నివాళులర్పించారు. 

విశాఖపట్నం: మావోయిస్టుల చేతిలో ప్రాణాలు కోల్పోయిన అరకు మాజీ ఎమ్మెల్యే సివేరి సోమ కుటుంబ సభ్యులను ఏపీ సీఎం చంద్రబాబు నాయుడు పరామర్శించారు. శుక్రవారం అరకులో సివేరి సోమ నివాసానికి వెళ్లిన చంద్రబాబు ఆయన చిత్రపటానికి పూలమాలలు వేసి నివాళులర్పించారు. వారి కుటుంబ సభ్యులను అక్కున చేర్చుకుని ఓదార్చారు. తానున్నానంటూ కుటుంబ సభ్యులకు భరోసా ఇచ్చారు. 

తెలుగుదేశం పార్టీ బలోపేతానికి సివేరి సోమ ఎంతో కృషి చేశారని చంద్రబాబు కొనియాడారు. నిరంతరం గిరిజన సంక్షేమమే ధ్యేయంగా సోమ పనిచేశారని తెలిపారు. అరకు అభివృద్ధికి ఎంతో పాటుపడ్డారని గుర్తు చేశారు. కనీసం ఇళ్లు కూడా నిర్మించుకోకుండా ప్రజా సేవ చేసిన అజాతశత్రువు సోమ అని చంద్రబాబు అభిప్రాయపడ్డారు. ఏజెన్సీలో పేదరికాన్ని నిర్మూలించేందుకు సోమ ప్రయత్నించారని తెలిపారు. 

సివేరి కుటుంబం ఇంకా స్థిరపడలేదన్నారు. ఎవరైతే సివేరిని హతమార్చారో వారు కూడా ఆలోచించాల్సిన అవసరం ఉందన్నారు. ఇంతటి గొప్ప వ్యక్తిని కోల్పోవడం బాధాకరమన్నారు. సమాజంలో హింసకు తావులేదన్న చంద్రబాబు మావోయిస్టుల చర్యను ఖండించారు. అలాంటి వ్యక్తులను మావోయిస్టులు కాల్చి చంపడం బాధాకరమన్నారు. 

మరోవైపు సివేరి కుటుంబ సభ్యులను ప్రభుత్వం ఆదుకుంటుందని హామీ ఇచ్చారు. సివేరి కుటుంబ సభ్యులకు విశాఖపట్నంలో ఇంటి స్థలంతోపాటు కుటుంబ సభ్యుల్లో ఒకరికి ప్రభుత్వ ఉద్యోగం కల్పిస్తామని హామీ ఇచ్చారు. అటు పార్టీ తరపున కూడా సివేరి కుటుంబానికి అండగా ఉంటామన్నారు. సివేరి కుటుంబ రాజకీయ భవిష్యత్ పార్టీ చూసుకుంటుందని తెలిపారు. 

సంబంధిత వార్తలు