వచ్చే ఆర్థిక సంవత్సరానికి బడ్జెట్ ప్రతిపాదనలను సమర్పించే టైం దగ్గర పడుతోంది. రెండేళ్ల క్రితం మాంద్యంతో ప్రపంచ దేశాలు అల్లాడిపోతూ ఉంటే.. మన దేశ వ్రుద్ధిరేటు ఎనిమిది శాతంగా నమోదైంది. కానీ రెండేళ్లలోనే పరిస్థితి తిరగబడింది. నోట్ల రద్దు, జీఎస్టీ అమలు కూడా ఒక కారణమేనన్న అభిప్రాయం వినిపిస్తున్నది. నోట్ల రద్దు తర్వాత స్థిరాస్తి రంగం, జీఎస్టీ అమలులోకి వచ్చాక చిన్న వ్యాపారులు చేతులెత్తేశారు. ఉపాధి లేక డిమాండ్ కొరవడడంతో ఆర్థిక వ్యవస్థ స్తంభించింది. ఈ నేపథ్యంలో వచ్చే ఆర్థిక సంవత్సరం బడ్జెట్ ప్రతిపాదనలను పార్లమెంట్‌కు విత్త మంత్రి నిర్మలా సీతారామన్ సమర్పించడం సవాలే.

 ఇందిరాగాంధీ తర్వాత ఆర్థిక శాఖ మంత్రిగా  నిర్మలా సీతారామన్‌ బాధ్యతలు స్వీకరించిన తొలి మహిళగా ఘనత సాధించారు. నరేంద్ర మోదీ తొలి ప్రభుత్వంలో రక్షణశాఖ మంత్రిగా కూడా  నిర్మలా సీతారామన్‌ పనిచేశారు. 
 

ఆర్థిక మందగమనంలో చిక్కుకున్న భారత ఆర్థిక వ్యవస్థ ఇప్పట్లో కోలుకునే అవకాశాలు కనిపించడం లేదని నోబెల్ అవార్డు గ్రహీత అభిజిత్ బెనర్జీ ఆందోళన వ్యక్తం చేశారు. సంపన్నులపై పన్నులేసి, పేదల సంక్షేమానికి ఖర్చు చేయాలని సూచించారు.

కేంద్రంలో నరేంద్రమోదీ అధికారం చేపట్టిన తర్వాత గత ఆరేళ్లలో పలు మార్పులు జరిగాయి. ప్రత్యేకించి బడ్జెట్ సమర్పణ పాలసీలోనూ సమూల మార్పులు తెచ్చారు. ఆదాయం పన్ను శ్లాబ్‌ల్లో చాలా సవరణలు చేశారు. బడ్జెట్ సమర్పణ తేదీని ఫిబ్రవరి 28 నుంచి ఒకటో తేదీకి తీసుకొచ్చారు. బ్రిటిష్ కాలం నాటి సూట్ కేసు సంస్క్రుతికి తెర దించి ఎర్రని బట్ట సంచిలో బడ్జెట్ ప్రతిపాదనలను పార్లమెంట్‌కు సమర్పించారు.

కేంద్రంలో నరేంద్రమోదీ సర్కార్ కొలువు దీరినప్పటి నుంచి ఇప్పటి వరకు నిపుణులు ఉద్యోగాలు కోల్పోవడమే తప్ప.. కొత్త ఉద్యోగాలిచ్చిన దాఖలాలే లేవు. తాజాగా ఆర్థిక మందగమనం వల్ల మరికొన్ని ఉద్యోగాలు కోల్పోయారు. ప్రస్తుత పరిస్థితుల్లో వచ్చే బడ్జెట్‌లో ఉపాధి కల్పనకు అవకాశాలు కల్పించాలని కోరతున్నారు. ఉన్న కొలువులు కాపాడు కోవాలని, కొత్త ఉద్యోగాల కల్పనకు సరికొత్త బాటలు వేయాలని విశ్లేషకులు కోరుతున్నారు.

రోజురోజుకు ప్రభుత్వ ఆదాయం పడిపోతున్నది. ఈ నేపథ్యంలో ప్రస్తుత ఆర్థిక సంవత్సరంలో పన్ను వసూళ్లు రూ.2.5 లక్షల కోట్లు క్షీణిస్తాయని అంచనా వేస్తున్నారు. ఇక ఐటీ, కార్పొరేట్‌, జీఎస్టీ రాబడి కూడా నిరాశపరుస్తున్నది. ఈ నేపథ్యంలో వచ్చే ఏడాది బడ్జెట్‌లో వేతన జీవులకు ఆదాయం పన్ను (ఐటీ)పై ఆశించిన రీతిలో కోతలుండకపోవచ్చన్న అంచనాలు వెలువడుతున్నాయి.

రూ.7 లక్షల వరకు వార్షిక ఆదాయం గల వారికీ 5 శాతం పన్ను మాత్రమే ప్రతిపాదించే వీలుందని సమాచారం. ప్రస్తుతం రూ.2.5 లక్షలదాకా వార్షిక ఆదాయం ఉన్నవారికి ఎలాంటి పన్నులు లేవన్న విషయం తెలిసిందే. 

ఆర్బిఐ గవర్నర్ శక్తికాంత దాస్ వృద్ధిని పునరుద్ధరించడానికి మరింత నిర్మాణాత్మక సంస్కరణల అవసరాన్ని నొక్కి చెప్పారు.వృద్ధి రేటును పెంచే విధంగా సంస్కరణలను అమలు చేయాలని ఆర్‌బీఐ గవర్నర్‌ శక్తికాంత దాస్‌ తెలిపారు. 

సంస్కరణలను అమలు చేయడంపైనే కేంద్రీకరించాలని విత్త మంత్రి నిర్మలా సీతారామన్‌ను విశ్లేషకులు, మదుపర్లు కోరుతున్నారు. దీర్ఘ కాలిక పెట్టుబడులపై పన్ను తొలిగించడంతోపాటు సూక్ష్మ చిన్నతరహా పరిశ్రమలకు అన్ని వసతులు కల్పించాలని అభ్యర్థిస్తున్నారు. విద్యా ఆరోగ్య రంగాలకు బడ్జెట్ కేటాయింపులు పెంచాలని, రియాల్టీకి బూస్ట్ ఇచ్చే చర్యలు చేపట్టాలని సూచిస్తున్నారు.

రూ.5 లక్షల వరకు ఆదాయ పరిమితి పెంచి, రూ.7 లక్షల్లోపు ఆదాయం కల వారిపై ఐదు శాతం రూ.7 లక్షలు-10 లక్షల వార్షిక ఆదాయంపై పన్ను 10 శాతం అమలు చేయనున్నారు. అదే జరిగితే మధ్యతరగతి, వేతన జీవులకు గొప్ప ఊరట లభించినట్లే. ఇక ఈ ఏడాది ఐదు ఐటీ శ్లాబ్ లు అమలులోకి వస్తాయని భావిస్తున్నారు. కొత్తగా రూ. 10 కోట్ల పై చిలుకు ఆదాయం కల వారిపై 35 శాతం పన్ను విదించే అవకాశాలు ఉన్నాయి.