రాహుల్ గాంధీ చేసిన వ్యాఖ్యలపై భారత అత్యున్నత ధర్మాసనం ఆగ్రహం వ్యక్తం చేసింది. చైనా విషయంలో ఆయన చేసిన వ్యాఖ్యలపై తీవ్రంగా స్పందించింది. వివరాల్లోకి వెళితే..
2022లో అరుణాచల్ ప్రదేశ్లోని యాంగ్సీ ప్రాంతంలో భారత్-చైనా సైన్యాల మధ్య జరిగిన ఘర్షణ తరువాత, కాంగ్రెస్ నేత రాహుల్ గాంధీ చేసిన వ్యాఖ్యలపై సుప్రీంకోర్టు ఆక్షేపణ వ్యక్తం చేసింది. రాహుల్ గాంధీ చేసిన వ్యాఖ్యలపై దాఖలైన పరువు నష్టం కేసు నేపథ్యంలో ఇలా స్పందించింది.
రాహుల్ వ్యాఖ్యలపై సుప్రీంకోర్టు ఆక్షేపణ
సుప్రీంకోర్టు జస్టిస్ డిపంకర్ దత్తా, జస్టిస్ ఆగస్టిన్ జార్జ్ మసీహ్లతో కూడిన బెంచ్ రాహుల్ గాంధీ వ్యాఖ్యలపై ప్రశ్నలు లేవనెత్తింది. రాహుల్ గాంధీ చైనా 2,000 చ.కి.మీ భారత భూమి ఆక్రమించిందని ఎలా తెలుసుకున్నారో న్యాయమూర్తులు అడిగారు. జస్టిస్ దత్తా మాట్లాడుతూ.. "మీకు 2,000 చ.కి.మీ భారత భూభాగాన్ని చైనా ఆక్రమించిందని ఎలా తెలిసింది? మీ వద్ద ఏ ఆధారాలు ఉన్నాయి? నిజమైన భారతీయుడు అయితే ఇలాంటి వ్యాఖ్యలు చేయరాదు. సరిహద్దుల్లో ఘర్షణలు ఉన్నప్పుడు ఇలాంటి మాటలు అనడం సరికాదు" అని వ్యాఖ్యానించారు.
పార్లమెంట్లో కాకుండా సోషల్ మీడియాలో ఎందుకు?
సుప్రీంకోర్టు, రాహుల్ గాంధీ తరఫున హాజరైన సీనియర్ అడ్వకేట్ అభిషేక్ మనుసింగ్వీని ప్రశ్నించింది. “మీరు చెప్పాల్సినవి పార్లమెంట్లో ఎందుకు చెప్పలేదు? సోషల్ మీడియాలో ఎందుకు చెబుతున్నారు?” అని కోర్టు అడిగింది. అదే సమయంలో ట్రయల్ కోర్టులో కొనసాగుతున్న కేసు విచారణపై తాత్కాలికంగా స్టే విధించి, ఫిర్యాదు దారుడికి నోటీసు జారీ చేసింది.
Related Articles
అలహాబాద్ హైకోర్టు తీర్పు నేపథ్యం
ఇదే కేసులో రాహుల్ గాంధీ వేసిన పిటిషన్ను అలహాబాద్ హైకోర్టు 2025 మే 29న తిరస్కరించింది. లక్నోలోని ఎంపీ-ఎంఎల్ఏ కోర్టు 2025 ఫిబ్రవరిలో ఇచ్చిన సమన్లను రద్దు చేయాలని రాహుల్ కోరగా, హైకోర్టు అంగీకరించలేదు.
రాహుల్ వ్యాఖ్యల వివాదం
2022 డిసెంబర్ 16న భారత్ జోడో యాత్రలో రాహుల్ గాంధీ మాట్లాడుతూ.. మీడియా చైనా భారత్ భూభాగం 2,000 చ.కి.మీ ఆక్రమించడం, 20 మంది భారత సైనికులు చనిపోవడం, అరుణాచల్ ప్రదేశ్లో మా సైనికులను చైనా దెబ్బతీయడం గురించి ప్రశ్నించదు. దేశం చూస్తోంది, ప్రజలు తెలియనట్లు నటించకండి" అని అన్నారు. ఈ వ్యాఖ్యలు చైనాతో జరిగిన డిసెంబర్ 9 యాంగ్సీ ఘర్షణపై వివాదాస్పదంగా మారాయి.
ఫిర్యాదు దారుడి ఆరోపణలు
బోర్డర్ రోడ్స్ ఆర్గనైజేషన్ మాజీ డైరెక్టర్ ఉదయ్ శంకర్ శ్రీవాస్తవ ఈ వ్యాఖ్యలపై పరువు నష్టం కేసు వేశారు. ఆయన ఆరోపణల ప్రకారం.. రాహుల్ గాంధీ చేసిన వ్యాఖ్యలు అసత్యం, ఆధారరహితం. భారత సైన్యాన్ని అవమానించే ఉద్దేశ్యంతో ఈ వ్యాఖ్యలు చేశారని ఆరోపించారు. యాంగ్సీ ప్రాంతంలో జరిగిన ఘర్షణలో భారత సైన్యం చైనా సైన్యాన్ని వెనక్కు తరిమేసిందని, చైనా భూభాగం ఆక్రమించలేదని పేర్కొన్నారు.
మొత్తం మీద రాహుల్ గాంధీ వ్యాఖ్యలు చైనాతో సరిహద్దు సమస్యలపై మళ్లీ రాజకీయ వాదనలకు దారితీశాయి. సుప్రీంకోర్టు ఈ వ్యాఖ్యలపై తీవ్ర ఆక్షేపణ వ్యక్తం చేస్తూ, జాతీయ భద్రతా అంశాల్లో బాధ్యతాయుతమైన వ్యాఖ్యలు చేయాలని సూచించింది.