గంగా జమ్నా స్కూల్ హిజాబ్ వివాదం : ప్రిన్సిపల్ తో పాటు మరో ఇద్దరి అరెస్ట్.. అసలేం జరిగిందంటే ?

మధ్యప్రదేశ్ లోని దామోహ్ జిల్లాలో ఉన్న గంగా జమ్నా హయ్యర్ సెకండరీ స్కూల్ ప్రిన్సిపాల్ ను, ఆ స్కూల్ కు సంబంధించిన మరో ఇద్దరిని పోలీసులు అరెస్టు చేశారు. హిజాబ్ వివాదం నేపథ్యంలోనే వారి అరెస్టు జరిగింది. 

hijab issue.. Ganga-Jamuna School

మధ్యప్రదేశ్ లోని దామోహ్ లోని గంగా జమ్నా హయ్యర్ సెకండరీ స్కూల్ లో తలెత్తిన హిజాబ్ వివాదం నేపథ్యంలో ఆ స్కూల్ ప్రిన్సిపల్ తో పాటు మరో ఇద్దరిని పోలీసులు అరెస్టు చేశారు. ఆ స్కూల్ కు చెందిన హిందూ విద్యార్థినులు హిజాబ్ లాంటి కండువా ధరించిన ఫొటోల్లో కనిపించడంతో చెలరేగిన హిజాబ్ వివాదం వల్ల ఈ ముగ్గురిని అరెస్టు చేసినట్టు పోలీసులు తెలిపారు.

దామోహ్ లోని గంగా జమ్నా హయ్యర్ సెకండరీ స్కూల్ లో ప్రతిభావంతులైన విద్యార్థుల ఫొటోలు, సాధించిన మార్కులతో కూడిన పోస్టర్లను ఏర్పాటు చేశారు. ఆ పోస్టర్లలో పలువురు విద్యార్థినులు తలకు హిజాబ్ లాంటి కండువా ధరించి కనిపించడంతో వివాదం చెలరేగింది. ఈ ఘటనకు సంబంధించి ముగ్గురు పిల్లల వాంగ్మూలాలను పరిగణనలోకి తీసుకున్న పోలీసులు పాఠశాల యాజమాన్య కమిటీకి చెందిన 10 మందిపై సంబంధిత సెక్షన్ల కింద కేసు నమోదు చేశారు. 

అయితే ఈ వివాదం నేపథ్యంలో మధ్యప్రదేశ్ ప్రభుత్వం దామోహ్ లోని పాఠశాల గుర్తింపును రద్దు చేసింది. అంతేకాకుండా ఈ పాఠశాలకు చెందిన పలువురు ఉపాధ్యాయులు మతమార్పిడులకు పాల్పడ్డారనే ఆరోపణలు కూడా ఉన్నాయి. వాస్తవానికి ఆ ఆరోపణల్లో కొంత వాస్తవం ఉందని కొందరు ఉపాధ్యాయులు అంగీకరించారు. అంతేకాకుండా, నమాజ్ చేయమని బలవంతం చేశారని, ఇస్లామిక్ వచనాలను పఠించమని బలవంతం చేశారని చాలా మంది పిల్లలు ఆరోపించారు.

రాష్ట్ర రాజధాని భోపాల్ కు 250 కిలోమీటర్ల దూరంలోని ఉన్న ఈ స్కూల్ యాజమాన్యం హిందూ విద్యార్థులను హిజాబ్ ధరించాలని పాఠశాల యాజమాన్యం ఒత్తిడి చేస్తోందని వీహెచ్ పీ, ఏబీవీపీతో పాటు పలు మితవాద సంస్థలు ఆందోళన చేపట్టాయి. హిందూ విద్యార్థులు కూడా హిజాబ్ ధరించిన ఆ పోస్టర్ సోషల్ మీడియాలో విస్తృతంగా షేర్ అయింది. ఈ విషయాన్ని జాతీయ బాలల హక్కుల పరిరక్షణ కమిషన్ (ఎన్సీపీసీఆర్) చైర్మన్ ప్రియాంక్ కనూంగో దామోహ్ జిల్లా కలెక్టర్ దృష్టికి తీసుకెళ్లారు. దీంతో ఈ ఘటనపై అధికారులు దర్యాప్తు చేపట్టారు. అయితే పాఠశాలకు అనుకూలంగా రిపోర్టు ఇచ్చారని ఆరోపిస్తూ దామోహ్ జిల్లా విద్యాధికారిపై ముగ్గురు బీజేపీ కార్యకర్తలు సిరా విసిరారు. ఈ చర్యకు పాల్పడిన ముగ్గురు బీజేపీ నేతలపై పోలీసులు కేసు నమోదు చేశారు.