మహారాష్ట్రలో ఓ ట్రక్కు గొర్రెల మందపైకి దూసుకెళ్లింది. ఈ ఘటనలో 50 జీవాలు అక్కడికక్కడే మరణించాయి. మరో 15 గొర్రెలు తీవ్రంగా గాయపడ్డాయి. నాగపూర్ సమీపంలో ఈ ప్రమాదం జరిగింది.
మహారాష్ట్రలో దారుణం జరిగింది. ఓ ట్రక్కు వేగంగా వచ్చి గొర్రెలపైకి దూసుకెళ్లింది. దీంతో ఆ మూగ జీవులు టైర్ల కింద నగిలిపోయి ప్రాణాలు కోల్పోయాయి. మంగళవారం తెల్లవారు జామున ఈ ఘటన నాగ్ పూర్ సమీపంలో చోటు చేసుకుంది. ఈ ప్రమాదంలో 50 గొర్రెలు మరణించగా.. మరో 15 గొర్రెలు తీవ్రంగా గాయపడ్డాయి.
వివరాలు ఇలా ఉన్నాయి. గుజరాత్ లోని కచ్ ప్రాంతానికి చెందిన రబ్బానీ అనే గొర్రెల కాపరి తన గొర్రెల మందను తీసుకొని భండారా-నాగ్ పూర్ రహదారిపై వెళ్తున్నాడు. వాటిని ఆయన చాపెగాడి కుహి ప్రాంతానికి తీసుకెళ్లాల్సి ఉంది. అయితే ఆ మంద మంగళవారం తెల్లవారుజామున 3.15 గంటల సమయంలో నాగ్ పూర్ సమీపానికి చేరుకుంది. అదే సమయంలో ఓ ట్రక్కు వేగంగా వచ్చి ఆ గొర్రెల మందను ఢీకొట్టింది. దీంతో వాటిలో అనేకం టైర్ల కింద నలిగిపోయాయి.
నాగపూర్ జిల్లా మౌదా పోలీస్ స్టేషన్ పరిధిలో జరిగిన ఈ ప్రమాదంలో 50 గొర్రెలు అక్కడికక్కడే మృతి చెందగా, మరో 15 గొర్రెలు తీవ్రంగా గాయపడ్డాయి. అయితే ఈ ప్రమాదం జరిగిన తరువాత డ్రైవర్ తన వాహనంతో పరారయ్యాడు. దీనిపై సమాచారం అందిన వెంటనే పోలీసులు అక్కడికి చేరుకున్నారు. ఈ ప్రమాదంలో గొర్రెల కాపరికి రూ.5 లక్షల నష్టం వాటిల్లినట్లు పోలీసులు తెలిపారు. ఇండియన్ పీనల్ కోడ్, మోటారు వాహనాల చట్టం కింద పోలీసులు కేసు నమోదు చేశారు. తదుపరి దర్యాప్తు కొనసాగుతోంది.
