హెచ్-1బీ వీసాదారులకు గుడ్ న్యూస్ చెప్పిన కెనడా.. అదేంటంటే ?

అమెరికా హెచ్ -1బీ వీసా కలిగి ఉన్న వారికి కెనడా ఓ శుభవార్త అందించింది. హెచ్ -1 బీ వీసా హోల్డర్లు తమ దేశానికి వచ్చి పని చేసేందుకు నిబంధనల్లో మార్పు తీసుకొస్తున్నట్టు ప్రకటించింది. కెనడా తాజా నిర్ణయం వల్ల ఆ వీసా కలిగి ఉన్న కుటుంబ సభ్యులు కూడా కెనడాకు సులభంగా వెళ్లొచ్చు.

h 1 b visa

హెచ్-1బీ వీసాదారులకు, వారి కుటుంబ సభ్యులకు కెనడా ప్రభుత్వం గుడ్ న్యూస్ చెప్పింది. 10,000 మంది అమెరికన్ హెచ్-1బీ వీసా హోల్డర్లు తమ దేశానికి వచ్చి పనిచేయడానికి వీలుగా ఓపెన్ వర్క్ పర్మిట్ స్ట్రీమ్ ను ఏర్పాటు చేయనున్నట్లు కెనడా ఇమ్మిగ్రేషన్ మంత్రి సీన్ ఫ్రేజర్ మంగళవారం ప్రకటించారు. హెచ్-1బీ వీసాదారుల కుటుంబ సభ్యులకు స్టడీ లేదా వర్క్ పర్మిట్లను కూడా ఈ ప్రోగ్రామ్ కల్పిస్తుందని కెనడా ఇమ్మిగ్రేషన్, రెఫ్యూజీస్ అండ్ సిటిజన్షిప్ మంత్రిత్వ శాఖ ఒక అధికారిక ప్రకటనలో తెలిపింది.

కెనడా, అమెరికా రెండింటిలోనూ పెద్ద ఎత్తున కార్యకలాపాలు నిర్వహిస్తున్న కంపెనీల్లో హైటెక్ రంగాల్లో వేలాది మంది కార్మికులు పనిచేస్తున్నారని, అమెరికాలో పనిచేసే వారు తరచూ హెచ్-1బీ స్పెషాలిటీ ఆక్యుపేషన్ వీసాను కలిగి ఉంటారని తెలిపారు. జూలై 16, 2023 నాటికి అమెరికాలోని హెచ్-1బీ స్పెషాలిటీ ఆక్యుపేషన్ వీసా హోల్డర్లు, వారితో పాటు వచ్చే కుటుంబ సభ్యులు కెనడాకు రావడానికి దరఖాస్తు చేసుకోవడానికి అర్హులని పేర్కొన్నారు.

కాగా.. కొత్త నిర్ణయం ప్రకారం ఆమోదం పొందిన దరఖాస్తుదారులకు మూడేళ్ల వరకు ఓపెన్ వర్క్ పర్మిట్ లభిస్తుంది. వారు కెనడాలో ఎక్కడైనా, ఏ యజమాని వద్దనైనా పనిచేసేందుకు అవకాశం ఉంటుంది. వారి జీవిత భాగస్వాములు, డిపెండెంట్లు కూడా వర్క్ లేదా స్టడీ పర్మిట్ తో తాత్కాలిక రెసిడెంట్ వీసాకు దరఖాస్తు చేసుకోవడానికి అర్హత పొందుతారు.

కెనడాకు చెందిన సీబీసీ న్యూస్ ప్రకారం.. ఈ సంవత్సరం చివరి నాటికి ఫెడరల్ ప్రభుత్వం ప్రపంచంలోని అత్యంత ప్రతిభావంతులైన వ్యక్తుల కోసం ఇమ్మిగ్రేషన్ స్ట్రీమ్ ను అభివృద్ధి చేస్తుందని, వారు ఉద్యోగం ఉన్నా లేకపోయినా టెక్ కంపెనీలలో పనిచేయడానికి కెనడాకు రాగలుగుతారని ఇమ్మిగ్రేషన్ మంత్రి సీన్ ఫ్రేజర్ చెప్పారు. అయితే ఈ స్ట్రీమ్ లో ఎవరెవరు అర్హత సాధిస్తారో, ఎంతమందిని చేర్చుకుంటారో ఆయన వివరించలేదు.

టెక్నాలజీ రంగంతో సహా కొన్ని ప్రత్యేక వృత్తుల్లో విదేశీయులు తాత్కాలికంగా అమెరికాలో పనిచేయడానికి హెచ్-1బీ వీసాలు అనుమతిస్తాయి. మహమ్మారి సమయంలో టెక్ కంపెనీలు నియామకాలు చేపట్టాయి, కానీ తరువాత పెద్ద సంఖ్యలో ఉద్యోగులను తొలగించడం ప్రారంభించాయి. దీంతో చాలా మంది హెచ్-1బీ వీసాదారులు కొత్త ఉద్యోగాల కోసం నానా తంటాలు పడుతున్నారు.