సీనియర్ సిటిజన్లకు ఇండియన్ రైల్వే ఇన్ని సౌకర్యాలు కల్పిస్తోందా?

14

ప్రపంచంలోనే అతిపెద్ద ప్రజాస్వామ్య దేశమైన భారతదేశానికి రైలు రవాణా వెన్నెముక లాంటిది. ముఖ్యంగా  దూర ప్రాంతాలకు ప్రయాణం చేయాలంటే తక్కువ ఖర్చులో సౌకర్యవంతంగా, అలసట లేకుండా ప్రయాణించడానికి రైలు ప్రయాణం బెస్ట్ ఛాయిస్. అందుకే రైళ్లలో ప్రతిరోజూ లక్షలాది మంది ప్రయాణిస్తుంటారు. రైళ్లే శాఖకు కూడా నిత్యం వందల కోట్ల రూపాయల ఆదాయం వస్తుంది. అందుకే ప్రయాణికులకు ఇండియన్ రైల్వే అనేక రాయితీలను కూడా అందిస్తోంది. రైల్వేలో సీనియర్ సిటిజన్లకు అందించే 5 ప్రయోజనాల గురించి ఇప్పుడు తెలుసుకుందాం. 

24

1. లోయర్ బెర్త్ సౌకర్యం

60 ఏళ్లు దాటిన పురుషులు, 58 ఏళ్లు పైబడిన మహిళలకు రైలులో మొదటి ప్రాధాన్యంగా లోయర్ బెర్త్ సౌకర్యాన్ని అందిస్తోంది. స్లీపర్, ఏసీ 3 టైర్, ఏసీ 2 టైర్ బోగీలలో ఈ సౌకర్యం లభిస్తుంది. రైలు బయలుదేరిన తర్వాత కూడా కింది సీట్లు ఖాళీగా ఉంటే అవి సీనియర్ సిటిజన్లకు కేటాయిస్తారు.

2. వీల్ చైర్ సౌకర్యం

రైల్వే స్టేషన్లలో ఉచిత వీల్ చైర్లు అందుబాటులో ఉంటాయి. నడవడానికి ఇబ్బంది పడే వృద్ధులకు ఈ సౌకర్యం ఉపయోగకరంగా ఉంటుంది. వీల్ చైర్లతో పాటు సహాయకులైన పోర్టర్లు కూడా ఉంటారు. వారి సహాయం కూడా ఉచితంగా తీసుకోవచ్చు.

34

3. ప్రత్యేక టికెట్ కౌంటర్లు

వృద్ధులు, దివ్యాంగులైన ప్రయాణికుల కోసం రైల్వే స్టేషన్లలో ప్రత్యేక టికెట్ బుకింగ్ కౌంటర్లు ఏర్పాటు చేశారు. వీటి వల్ల క్యూలలో వేచి ఉండి టికెట్లు తీసుకోవాల్సిన అవసరం లేదు. త్వరగా టికెట్లను పొందవచ్చు.

4. బ్యాటరీతో నడిచే వాహనాలు

పెద్ద రైల్వే స్టేషన్లలో వృద్ధులు, దివ్యాంగులు ఎక్కువగా నడవవలసిన అవసరం ఉండదు. అక్కడ బ్యాటరీతో నడిచే వాహనాలు (గోల్ఫ్ కార్ట్‌లు) ఉచితంగా అందుబాటులో ఉంటాయి. రైల్వే స్టేషన్ ప్లాట్‌ఫారమ్‌ల నుండి ప్రవేశ ద్వారం వరకు బ్యాటరీ కార్ల ద్వారా వృద్ధులు, దివ్యాంగులను ఉచితంగా తీసుకెళ్తారు.

44

5. లోకల్ ట్రైన్స్ లో ప్రత్యేక సీట్లు

ముంబై, ఢిల్లీ, కోల్‌కతా, చెన్నై వంటి నగరాల్లోని సబర్బన్ లోకల్ ట్రైన్స్‌లో సీనియర్ సిటిజన్లకు ప్రత్యేక సీట్లు కేటాయిస్తారు. ప్రయాణంలో వారు నిలబడకుండా సౌకర్యవంతమైన సీటులో కూర్చుని ప్రయాణించవచ్చు.