మహిళలకు అలర్ట్.. జూన్ 2 తర్వాత ఉచిత బస్సులో ఆధార్ చెల్లదు. మరేం చేయాలంటే.?
TSRTC: తెలంగాణ ప్రభుత్వం మహాలక్ష్మి పేరుతో ఉచిత బస్సు ప్రయాణం అందిస్తోన్న విషయం తెలిసిందే. ఆధార్ కార్డు చూపించి ఫ్రీ టికెట్ పొందే వారు. అయితే ఇప్పుడు ఈ విధానంలో మార్పులు చేసేందుకు ప్రభుత్వం సిద్ధమైంది.
మహాలక్ష్మి పథకంలో కొత్త మార్పులకు శ్రీకారం
తెలంగాణ ప్రభుత్వం మహిళల కోసం అమలు చేస్తున్న మహాలక్ష్మి ఉచిత బస్సు ప్రయాణ పథకంలో కీలక మార్పులు తీసుకురానుంది. ఇప్పటి వరకు మహిళలు ఆధార్ కార్డు చూపించి జీరో టికెట్ తీసుకుని ప్రయాణిస్తున్నారు. అయితే ఈ విధానానికి బదులుగా త్వరలో ప్రత్యేక మహాలక్ష్మి స్మార్ట్ కార్డులు అందుబాటులోకి రానున్నాయి. ప్రయాణ ప్రక్రియను మరింత వేగంగా, పారదర్శకంగా మార్చడమే ఈ నిర్ణయం వెనుక ప్రధాన ఉద్దేశం.
జూన్ 2 నుంచే స్మార్ట్ కార్డుల అమలు ప్రారంభం
తెలంగాణ రాష్ట్ర అవతరణ దినోత్సవమైన జూన్ 2 నుంచి ఈ కొత్త విధానాన్ని దశలవారీగా అమలు చేయాలని అధికారులు ప్రణాళిక రూపొందిస్తున్నారు. అయితే ఒకేసారి రాష్ట్రవ్యాప్తంగా కాకుండా ముందుగా కొన్ని ఎంపిక చేసిన ప్రాంతాల్లో పైలట్ ప్రాజెక్టుగా ప్రారంభించనున్నారు. అక్కడ ఎదురయ్యే సాంకేతిక సమస్యలను పరిష్కరించిన తర్వాత రాష్ట్రంలోని అన్ని జిల్లాలకు విస్తరించే అవకాశం ఉంది. అయితే మహిళలు ఆందోళన చెందాల్సిన అవసరం లేదు. స్మార్ట్ కార్డులు అందరికీ చేరే వరకు ప్రస్తుతం అమలులో ఉన్న ఆధార్ ఆధారిత ఉచిత ప్రయాణ విధానం కొనసాగుతుందని అధికారులు చెబుతున్నారు.
స్మార్ట్ కార్డు ఎలా పనిచేస్తుంది?
ఈ కార్డులు ఆధునిక చిప్ ఆధారిత సాంకేతికతతో రూపొందిస్తున్నారు. కార్డులో లబ్ధిదారురాలి పేరు, ఫోటో, చిరునామా, ప్రత్యేక గుర్తింపు సంఖ్య, క్యూఆర్ కోడ్ వంటి వివరాలు నమోదు చేస్తారు. బస్సు ఎక్కిన తర్వాత మహిళలు తమ స్మార్ట్ కార్డును కండక్టర్ వద్ద ఉన్న టికెట్ ఇష్యూయింగ్ మెషీన్ (TIM)కు చూపిస్తే లేదా స్కాన్ చేస్తే వెంటనే జీరో టికెట్ జారీ అవుతుంది. దీంతో ఆధార్ కార్డు తీసుకెళ్లాల్సిన అవసరం ఉండదు. అలాగే కండక్టర్లు కూడా వివరాలను మాన్యువల్గా తనిఖీ చేయాల్సిన పని తగ్గుతుంది.
ఈ కొత్త విధానం ఎందుకు తీసుకొస్తున్నారు?
ప్రస్తుతం ప్రతి ప్రయాణికురాలి ఆధార్ వివరాలను పరిశీలించి టికెట్ జారీ చేయాల్సి వస్తోంది. రద్దీ సమయాల్లో ఇది సమయం ఎక్కువ తీసుకుంటోంది. దీంతో ప్రయాణికులు, కండక్టర్లు ఇద్దరికీ ఇబ్బందులు ఎదురవుతున్నాయి. అంతేకాకుండా కొందరు అక్రమంగా నకిలీ గుర్తింపు పత్రాలతో ఉచిత ప్రయాణ సదుపాయాన్ని వినియోగిస్తున్నారనే ఆరోపణలు కూడా ఉన్నాయి. స్మార్ట్ కార్డు వ్యవస్థ ద్వారా నిజమైన లబ్ధిదారులను గుర్తించడం సులభమవుతుంది. దీంతో పథకం అమలులో పారదర్శకత పెరుగుతుంది.
మహిళలకు మరింత సౌకర్యవంతమైన ప్రయాణం
విద్యార్థులకు బస్ పాస్లు, ఉద్యోగులకు సీజన్ పాస్లు ఉన్నట్లే మహిళలకు ప్రత్యేక మహాలక్ష్మి స్మార్ట్ కార్డులు ఇవ్వనున్నారు. దీంతో ప్రతిరోజూ ఆధార్ కార్డు వెంట తీసుకెళ్లాలనే టెన్షన్ ఉండదు. బస్సు ఎక్కగానే కార్డు స్కాన్ చేసి వెంటనే టికెట్ పొందే అవకాశం ఉంటుంది. ప్రభుత్వం అమలు చేయబోతున్న ఈ కొత్త విధానం వల్ల ఉచిత ప్రయాణ పథకం మరింత సులభంగా, వేగంగా మారే అవకాశం ఉంది. ముఖ్యంగా ప్రతిరోజూ ఉద్యోగాలు, వ్యాపారాలు, విద్య కోసం ప్రయాణించే మహిళలకు ఇది పెద్ద ఊరటగా మారనుంది.
