FIFA World Cup: ఫుట్‌బాల్ అభిమానుల‌కు ఉచిత టీవీల పంపిణీ చేస్తున్న కంపెనీ.. ఎందుకో తెలుసా.?

FIFA World Cup: 2026 ఫిఫా వరల్డ్ కప్‌ను ప్రత్యక్షంగా చూడాలన్న కలతో అమెరికా వెళ్లేందుకు ప్రయత్నించిన పలువురు అర్జెంటీనా ఫుట్‌బాల్ అభిమానులకు వీసా నిరాకరణ ఎదురైంది. అయితే వారికి ఉప‌శ‌మ‌నం క‌ల్పించేందుకు ఓ ఎలక్ట్రానిక్స్ సంస్థ వినూత్న ఆఫర్ ప్రకటించింది 

Image Credit : Reuters/X

వీసా తిరస్కరణకు బదులుగా టీవీ గిఫ్ట్

అర్జెంటీనాకు చెందిన ప్రముఖ సంస్థ న్యూసాన్ (Newsan) ఈ ప్రత్యేక కార్యక్రమాన్ని చేపట్టింది. తమ ఎలక్ట్రానిక్స్ బ్రాండ్ "నోబ్లెక్స్" (Noblex) పేరుతో అభిమానులకు ఉచిత టీవీలను ఇవ్వనున్నట్లు ప్రకటించింది. అమెరికా టూరిస్ట్ వీసా కోసం దరఖాస్తు చేసి తిరస్కరణ పొందినట్లు ఆధారాలు చూపించిన వారికి ఈ అవకాశం కల్పించింది. ఈ ప్రకటన వెలువడిన వెంటనే సోషల్ మీడియాలో వైరల్ అయింది. "మీ వీసా తిరస్కరణ పత్రం తీసుకురండి.. ఉచిత టీవీ తీసుకెళ్లండి" అనే ప్రకటన అభిమానులను ఆకట్టుకుంది.

Image Credit : Reuters/X

టీవీల కోసం భారీ క్యూలు

ఈ ఆఫర్ ప్రకారం 2025 జనవరి నుంచి జూన్ మధ్యకాలంలో అమెరికా వీసా తిరస్కరణ పొందిన మొదటి 100 మందికి ఉచిత టెలివిజన్లు అందజేశారు. దీంతో బ్యూనస్ ఐరీస్‌లోని కంపెనీ కార్యాలయం ముందు అభిమానులు పెద్ద ఎత్తున క్యూలలో నిలబడ్డారు. వీసా రాకపోవడంతో వరల్డ్ కప్‌ను స్టేడియంలో చూసే అవకాశం కోల్పోయిన వారికి ఈ టీవీలు ఓదార్పుగా మారాయి. చాలా మంది అభిమానులు తమ నిరాశను పక్కన పెట్టి ఈ ఆఫర్‌ను వినియోగించుకున్నారు.

Image Credit : Reuters/X

మెస్సీ చివరి వరల్డ్ కప్ కావొచ్చనే భావన

టీవీ పొందిన వారిలో 24 ఏళ్ల ప్రొఫెషనల్ వీడియో గేమ్ ప్లేయర్ టోమాస్ వాగెల్లర్ కూడా ఉన్నాడు. అతను అమెరికా వెళ్లి అర్జెంటీనా మ్యాచ్‌లను ప్రత్యక్షంగా చూడాలని భావించాడు. "ఇది మెస్సీ చివరి వరల్డ్ కప్ కావొచ్చని అందరం అనుకుంటున్నాం. అందుకే వీసా కోసం ప్రయత్నించాను" అని అతను తెలిపాడు. ప్రపంచ ఫుట్‌బాల్ దిగ్గజం లియోనెల్ మెస్సీకి ఇది చివరి వరల్డ్ కప్ కావచ్చనే అంచనాలు అభిమానుల్లో భావోద్వేగాన్ని పెంచుతున్నాయి. దీంతో చాలా మంది అతని ఆటను ప్రత్యక్షంగా చూడాలని ఆశపడ్డారు.

Argentine soccer fans whose US tourist visas were rejected lined up in Buenos Aires to receive free televisions from an electronics brand, a day before the start of the World Cup. Follow our #WorldCup2026 coverage here ➡️ https://t.co/j0CHJ6H6Uhpic.twitter.com/YDQwxCIPyg

— Reuters (@Reuters) June 11, 2026

Image Credit : Reuters/X

కల నెరవేరకపోయినా గిఫ్ట్ దక్కింది

వీసా రాకపోవడంతో అమెరికా ప్రయాణం సాధ్యం కాలేదని టోమాస్ తెలిపాడు. అయినప్పటికీ ఉచిత టీవీ దక్కడంతో కొంత ఆనందంగా ఉందన్నాడు. "మ్యాచ్‌లను ప్రత్యక్షంగా చూడలేకపోవడం బాధగా ఉంది. కానీ కనీసం ఒక బహుమతి తీసుకుని వెళ్తున్నాను" అని చెప్పాడు. ఇలాంటి పరిస్థితి చాలా మంది అభిమానులకు ఎదురైంది. అయితే టీవీ గిఫ్ట్ రూపంలో వారికి చిన్న సాంత్వన లభించింది.

Image Credit : Reuters/X

2022తో పోలిస్తే ఈసారి తక్కువ హడావిడి

అర్జెంటీనా ఇప్పటివరకు మూడు సార్లు వరల్డ్ కప్ గెలిచిన విజయవంతమైన జట్లలో ఒకటి. అయినప్పటికీ 2022 ఖతార్ వరల్డ్ కప్ సమయంలో కనిపించిన ఉత్సాహం ఈసారి అంతగా కనిపించడం లేదని పరిశీలకులు చెబుతున్నారు. 2022లో మెస్సీ నాయకత్వంలో అర్జెంటీనా మరోసారి ప్రపంచకప్ గెలిచే అవకాశం ఉందనే నమ్మకంతో అభిమానులు భారీ ఉత్సాహం చూపించారు. ఈసారి కూడా ఆసక్తి ఉన్నప్పటికీ ఆ ఉత్సాహం కొంత తగ్గినట్లు కనిపిస్తోంది. అయితే అమెరికా, కెనడా, మెక్సికో సంయుక్తంగా నిర్వహిస్తున్న 2026 ఫిఫా వరల్డ్ కప్ కోసం ప్రపంచవ్యాప్తంగా అభిమానులు ఆసక్తిగా ఎదురుచూస్తున్నారు. అమెరికా వెళ్లే అవకాశం కోల్పోయిన అర్జెంటీనా అభిమానులు ఇప్పుడు తమ కొత్త టీవీల ముందు కూర్చొని మెస్సీ మ్యాజిక్‌ను ఆస్వాదించేందుకు సిద్ధమవుతున్నారు.