Facts: అమెరికాలో ఇళ్లపై నీటి ట్యాంకులు ఎందుకు కనిపించవో తెలుసా.?
Facts: భారత్లోని చాలా ఇళ్లపై నీటి ట్యాంకులు కనిపించడం సాధారణ విషయం. కానీ అమెరికాలో మాత్రం ఇళ్ల పైకప్పులపై ట్యాంకులు దాదాపు కనిపించవు. ఇంతకీ దీనికి కారణం ఏంటో ఎప్పుడైనా ఆలోచించారా.? అమెరికా, భారత్ల మధ్య ఉన్న తేడాలు ఇప్పుడు తెలుసుకుందాం.
భారత్లో ట్యాంకులు ఎందుకు అవసరం?
భారత్లో చాలా నగరాలు, గ్రామాల్లో మున్సిపాలిటీలు రోజులో కొన్ని గంటల పాటు మాత్రమే నీటిని సరఫరా చేస్తాయి. అంతేకాకుండా పైపుల్లో నీటి ఒత్తిడి (ప్రెషర్) కూడా తక్కువగా ఉంటుంది. దీంతో ఇళ్లలో నీటిని నిల్వ చేసుకోవడం తప్పనిసరి అవుతుంది. సాధారణంగా ఇంటి కింద అండర్గ్రౌండ్ ట్యాంక్ ఏర్పాటు చేసి, మోటార్ సహాయంతో నీటిని పైకప్పుపై ఉన్న ఓవర్హెడ్ ట్యాంక్లోకి పంపిస్తారు. అక్కడి నుంచి ఇంటి మొత్తం నీటి అవసరాలు తీరుతాయి. నీటి సరఫరా ఆగిపోయినా కొంతకాలం అవసరాలు తీర్చుకోవడానికి ఈ ట్యాంకులు ఎంతో ఉపయోగపడతాయి.
అమెరికాలో 24 గంటల నిరంతర నీటి సరఫరా
అమెరికాలో పరిస్థితి పూర్తిగా భిన్నంగా ఉంటుంది. అక్కడ సంవత్సరంలో 365 రోజులు, రోజుకు 24 గంటలు నిరంతరంగా నీటి సరఫరా అందుబాటులో ఉంటుంది. అమెరికాలోని ప్రతి ఇంటికి ప్రధాన భూగర్భ పైపులైన్ నెట్వర్క్ ద్వారా నేరుగా నీరు చేరుతుంది. పైపుల్లో ఎల్లప్పుడూ అధిక ఒత్తిడి ఉండేలా వ్యవస్థను రూపొందించారు. అందువల్ల నీరు నేరుగా ఇంటి నళ్లకు చేరుతుంది. ఇంటి యజమానులు నీటిని నిల్వ చేసుకోవాల్సిన అవసరం లేకపోవడంతో పైకప్పుపై ట్యాంకులు ఏర్పాటు చేయరు.
అమెరికా వాటర్ సిస్టమ్ ఎలా పనిచేస్తుంది?
అమెరికా నీటి సరఫరా వ్యవస్థకు వందేళ్లకు పైగా చరిత్ర ఉంది. నగరాల అభివృద్ధితో పాటు అక్కడి ఇంజినీర్లు పెద్ద స్థాయిలో కేంద్రీకృత నీటి పంపిణీ వ్యవస్థను అభివృద్ధి చేశారు. మొదట భారీ పంపుల సహాయంతో నీటిని నగరంలోని ఎత్తైన ప్రాంతాలు, కొండలు లేదా పెద్ద ప్రభుత్వ వాటర్ టవర్లలో నిల్వ చేస్తారు. ఆ తర్వాత గురుత్వాకర్షణ శక్తి (గ్రావిటీ) ద్వారా నీరు మొత్తం నగరానికి సరఫరా చేస్తారు. దీనివల్ల ప్రతి ఇంటికి ఒకే విధమైన ప్రెషర్తో నీరు అందుతుంది. అంతేకాకుండా విద్యుత్ సరఫరాలో అంతరాయం వచ్చినా నీటి ఒత్తిడి తగ్గకుండా ఉండేలా బలమైన బ్యాకప్ వ్యవస్థలు కూడా ఉంటాయి.
నీటి నాణ్యతను కాపాడడంలో అమెరికా విధానం
అమెరికాలో నీటి నాణ్యత విషయంలో చాలా కఠినమైన నిబంధనలు అమలులో ఉన్నాయి. పైపుల్లో ఎల్లప్పుడూ నీరు ప్రవహిస్తుండటంతో వాటిలో ఖాళీ స్థలం ఏర్పడదు. ఫలితంగా బయట ఉన్న మురికి నీరు లేదా కలుషిత పదార్థాలు పైపుల్లోకి చొరబడే అవకాశం చాలా తక్కువగా ఉంటుంది. భారత్లో మాత్రం నీటి సరఫరా మధ్య మధ్యలో ఆగిపోవడం వల్ల పైపులు ఖాళీ అవుతుంటాయి. అప్పుడు భూగర్భంలోని మురికి నీరు పైపుల్లోకి చేరే ప్రమాదం ఉంటుంది. అందుకే ఇళ్లలో నిల్వ వ్యవస్థకు ఎక్కువ ప్రాధాన్యం ఉంటుంది.
అమెరికా ఇళ్లపై ట్యాంకులు లేకపోవడానికి నిర్మాణ శైలీ కూడా కారణమే
భారత్లో ఎక్కువ ఇళ్లు ఇటుకలు, సిమెంట్, కాంక్రీట్తో నిర్మిస్తారు. అందువల్ల పైకప్పుపై భారీ నీటి ట్యాంకులను భరించే సామర్థ్యం ఉంటుంది. అమెరికాలో మాత్రం చాలా ఇళ్లు చెక్క ఫ్రేమ్లతో నిర్మిస్తారు. ఇవి తేలికగా ఉంటాయి. అలాంటి నిర్మాణాలపై వేల లీటర్ల నీరు ఉన్న భారీ ట్యాంకులు ఏర్పాటు చేయడం ఖర్చుతో కూడుకున్నదే కాకుండా భద్రత పరంగా కూడా అనుకూలం కాదు. అదనంగా ట్యాంకులు లేకపోవడం వల్ల
పైకప్పులపై అదనపు బరువు ఉండదు, లీకేజీల సమస్య తగ్గుతుంది, నిర్వహణ ఖర్చులు ఉండవు, భూకంపాలు, తుఫాన్ల సమయంలో భద్రత మెరుగ్గా ఉంటుంది, ఇళ్ల జీవితకాలం పెరుగుతుంది.
