ముంబై దాడుల ఉగ్రవాది రాణాను భారత్‌కు తీసుకొచ్చేందుకు ఎంత ఖర్చయిందో తెలుసా? విచారణలో ఏం చెప్తున్నాడు?

భారత ఆర్థిక రాజధాని ముంబైపై జరిగిన ఉగ్రదాడుల సూత్రధారి తహవ్వూర్ రాణాను ఎట్టకేలకు భారత ప్రభుత్వం దేశానికి తీసుకొచ్చింది. ప్రస్తుతం 18 రోజుల పాటు NIA కస్టడీలో ఉన్న రాణాను అధికారులు విచారిస్తున్నారు. ఈ నేపథ్యంలో తహవ్వూర్‌ రాణాను అమెరికా నుంచి భారత్‌కు తీసుకొచ్చేందుకు భారత ప్రభుత్వం ఎంత ఖర్చు చేసింది.? విచారణలో రాణా ఎలాంటి సమాధానలు చెప్తున్నాడు? లాంటి ఆసక్తికర విషయాలు తెలుసుకుందాం..  

26/11 ముంబై దాడులు జరిగిన తర్వాత దాదాపు 16 ఏళ్ల తర్వాత తహవ్వూర్‌ రాణాను అమెరికా నుంచి భారతదేశానికి తిరిగి తీసుకువచ్చారు. కోర్టు తెహ్వ్వూర్‌ను 18 రోజుల పాటు NIA కస్టడీకి పంపింది. ఇప్పుడు ఈ ఏజెన్సీ 2008 దాడుల మొత్తం కుట్ర గురించి నిందితుడిని విచారిస్తోంది. రాణాను భారతదేశానికి తీసుకురావడానికి భారత ప్రభుత్వం ఎంత డబ్బు ఖర్చు చేసిందో ఇప్పుడు తెలుసుకుందాం. 

నివేదికల ప్రకారం, ఈ ఉగ్రవాదిని భారతదేశానికి గల్ఫ్ స్ట్రీమ్ G-550 అనే లగ్జరీ చార్టర్ విమానంలో తీసుకొచ్చారు. ఇందులో ప్రయాణించాలంటే గంటకు సుమారు రూ. 9 లక్షలు ఖర్చు చేయాల్సి ఉంటుంది. ఈ చార్టర్ జెట్ విమానాన్ని ఎయిర్‌క్రాఫ్ట్ చార్టర్ సర్వీస్ ద్వారా అద్దెకు తీసుకున్నారు. ఈ వాహనంలో రాణాను అమెరికాలోని మయామి నుంచి భారతదేశానికి తీసుకువచ్చారు. ఆ విమానం బుధవారం తెల్లవారుజామున 2:15 గంటలకు (స్థానిక సమయం) మయామి నుంచి బయలుదేరి అదే రోజు సాయంత్రం 7 గంటలకు రొమేనియా రాజధాని బుకారెస్ట్ చేరుకుంది. 

ఇక్కడ 11 గంటలు విరామం తీసుకున్నారు. మరుసటి రోజు అంటే గురువారం మళ్లీ టేకాఫ్ అయి సాయంత్రం 6:22 గంటలకు ఢిల్లీలోని పాలం విమానాశ్రయంలో ల్యాండ్ అయ్యారు. ఈ మొత్తం ప్రయాణాన్ని పూర్తి చేయడానికి దాదాపు 40 గంటలు పట్టింది. దీంతో విమానం కోసం భారత ప్రభుత్వం సుమారు రూ. 4 కోట్లు ఖర్చు చేసిందన్నమాట. అయితే ఎవరైనా మయామి నుంచి ఢిల్లీకి సాధారణ బిజినెస్ క్లాస్ టికెట్ బుక్ చేసుకుంటే దాని ధర రూ.4 లక్షలు అవుతుంది. ఈ విధంగా చూస్తే, తహవ్వూర్‌ను తిరిగి తీసుకురావడానికి భారత ప్రభుత్వం 100 రెట్లు ఎక్కువ డబ్బు ఖర్చు చేసిందన్నమాట. 

Tahawwur Rana

ఉగ్రవాది కోసం అంత డబ్బు ఎందుకు ఖర్చు చేశారు?

ఒక ఉగ్రవాది కోసం ఇంత ఎందుకు ఖర్చు చేశారన్న ప్రశ్న సహజంగానే వస్తుంది. అయితే కేవలం భద్రతా కోసమే ఇంత ఖర్చు చేశారని చెప్పాలి. సాధారణ పౌరుడిలా రాణాను ఇతర ప్రయాణికులతో విమానంలో తీసుకురావడం వీలు పడదు. హై ప్రొఫైల్ ఉగ్రవాది కావడంతో దాడులు జరిగే అవకాశం ఉంటుంది. హైజాక్‌ చేసే అవకాశాలు ఉంటాయి. ఇలా ఎన్నో భద్రతాపరమైన ఇబ్బందులు ఉంటాయి కాబట్టే ఖర్చు ఎక్కువైనా రాణాను ప్రత్యేక విమానంలో ఇండియాకు తీసుకొచ్చారు. 

విచారణలో రాణా ఏం చెప్తున్నాడు.? 

2008 ముంబై దాడుల కుట్ర గురించి NIA రాణాను వివరంగా ప్రశ్నిస్తోంది. ఫోన్‌లో మాట్లాడింది రానా అని నిరూపించడానికి ఏజెన్సీ రానా వాయిస్ శాంపిల్, చేతిరాత శాంపిల్‌ను తీసుకోవడానికి సన్నాహాలు చేస్తోంది. అవసరమైతే, రానాపై శాస్త్రీయ పరీక్షలు కూడా నిర్వహించవచ్చు. ఈ పరీక్ష ఏజెన్సీ దర్యాప్తును బలోపేతం చేస్తుంది. రాణా వాయిస్ శాంపిల్ ఇవ్వడానికి నిరాకరిస్తే, NIA కోర్టులో దరఖాస్తు దాఖలు చేయవచ్చు. నిందితుడి అనుమతితో మాత్రమే వాయిస్ శాంపిల్ తీసుకుంటారు, కానీ అతను నిరాకరిస్తే, ఈ శాంపిల్ దర్యాప్తుకు అవసరమని ఏజెన్సీ కోర్టుకు తెలియజేయవచ్చు.

అయితే రాణాను తొలి రౌండ్‌లో ప్రశ్నించినప్పుడు అధికారులు సంతృప్తికరమైన సమాచారాన్ని పొందలేకపోయారు. దాదాపు మూడు గంటల పాటు విచారించారని, ఆ సమయంలో అతను "నాకు గుర్తులేదు",  "నాకు తెలియదు" వంటి సమాధానాలను పదే పదే ఇచ్చాడని తెలుస్తోంది. విచారణ సమయంలో, దర్యాప్తు అధికారులు రాణా నుంచి అతని కుటుంబం, స్నేహితులు, పరిచయస్తుల గురించి సమాచారం పొందడానికి ప్రయత్నించారు, కానీ అతను ఆ ప్రశ్నకు సమాధానం చెప్పకుండా తప్పించుకుంటూనే ఉన్నాడు. రాణా ఉద్దేశపూర్వకంగా సహకరించడం లేదని అధికారులు చెబుతున్నారు. పాకిస్తాన్ కేంద్రంగా పనిచేస్తున్న ఉగ్రవాద సంస్థ లష్కరే తోయిబా, ఐఎస్ఐలతో కలిసి ముంబై దాడుల కుట్రలో రాణా పాల్గొన్నట్లు భారత్‌ భావిస్తోంది.