IVF విధానంలో పుట్టబోయే బిడ్డ లింగాన్ని ముందే తెలుసుకోవచ్చా? నిబంధనలు ఏమంటున్నాయి?
IVF: ప్రస్తుతం సంతానలేమి సమస్యలు పెరుగుతున్నాయి. దీంతో చాలా మంది దంపతులు IVF (ఇన్ విట్రో ఫెర్టిలైజేషన్) వంటి ఆధునిక వైద్య పద్ధతులను ఆశ్రయిస్తున్నారు. అయితే IVF ద్వారా పుట్టబోయే బిడ్డ అబ్బాయా? అమ్మాయా? అని ముందే తెలుసుకోవచ్చాని కొందరు నమ్ముతుంటారు
IVF అంటే ఏమిటి?
IVF (In Vitro Fertilization) అనేది సంతానలేమి సమస్యలకు ఉపయోగించే ప్రత్యేక వైద్య విధానం. ఇందులో మహిళ అండాలను, పురుషుడి వీర్యకణాలను ప్రయోగశాలలో కలిపి పిండాన్ని (Embryo) తయారు చేస్తారు. ఆ తర్వాత ఆ పిండాన్ని మహిళ గర్భాశయంలో ప్రవేశపెడతారు. పిండం విజయవంతంగా అభివృద్ధి చెందితే గర్భం దాల్చే అవకాశం ఉంటుంది. సహజంగా గర్భం దాల్చలేని దంపతులకు ఈ పద్ధతి ఎంతో ఉపయోగపడుతోంది.
ఎప్పుడు IVF అవసరం అవుతుంది?
చాలా కాలం ప్రయత్నించినప్పటికీ గర్భం దాల్చకపోతే వైద్యులు IVFను సూచిస్తారు. ముఖ్యంగా మహిళల్లో ఫాలోపియన్ ట్యూబులు బ్లాక్ కావడం, వయస్సు పెరగడం వల్ల అండాల సంఖ్య తగ్గడం, పురుషుల్లో వీర్యకణాల సంఖ్య లేదా నాణ్యత తగ్గడం వంటి సమస్యల కారణంగా సంతానలేమి ఏర్పడుతుంది. ఇలాంటి పరిస్థితుల్లో ఇతర చికిత్సలు ఫలితం ఇవ్వకపోతే చివరి మార్గంగా IVFను ఎంపిక చేస్తారు. గత కొన్నేళ్లుగా భారతదేశంలో IVF కేంద్రాలు, ఈ చికిత్స పొందుతున్న దంపతుల సంఖ్య గణనీయంగా పెరిగింది.
IVFలో బిడ్డ లింగాన్ని తెలుసుకోవచ్చా?
వైద్య నిపుణుల ప్రకారం, IVF ప్రక్రియలో పిండంపై జన్యు పరీక్షలు (Genetic Testing) నిర్వహించే అవకాశం ఉంటుంది. ఈ పరీక్షల ద్వారా భవిష్యత్తులో బిడ్డకు వచ్చే కొన్ని జన్యు సంబంధిత వ్యాధులను గుర్తించవచ్చు. ఈ పరీక్షల సమయంలో పిండానికి సంబంధించిన క్రోమోజోమ్ వివరాలు కూడా తెలిసే అవకాశం ఉంటుంది. దీంతో బిడ్డ లింగం గురించి సమాచారం తెలుసుకోవడం సాంకేతికంగా సాధ్యమే. అయితే ఆ సమాచారాన్ని లింగ నిర్ధారణ కోసం ఉపయోగించడం భారతదేశంలో చట్టవిరుద్ధం.
భారతదేశంలో లింగ నిర్ధారణ ఎందుకు నిషేధం?
భారతదేశంలో చాలా కాలంగా అబ్బాయిలకు ఎక్కువ ప్రాధాన్యం ఇవ్వడం, అమ్మాయిల పట్ల వివక్ష చూపడం వంటి సామాజిక సమస్యలు ఉన్నాయి. ఈ కారణంగా కొన్ని ప్రాంతాల్లో స్త్రీ-పురుష నిష్పత్తిలో అసమతుల్యత కూడా ఏర్పడింది. అలాంటి పరిస్థితులను నివారించేందుకు పుట్టబోయే బిడ్డ లింగాన్ని ముందే తెలుసుకోవడం లేదా ఎంపిక చేసుకోవడం చట్టపరంగా నిషేధించారు. IVF సహా ఏ వైద్య పద్ధతిలోనైనా లింగ నిర్ధారణ చేయడం లేదా వెల్లడించడం నేరంగా పరిగణిస్తారు.
PCPNDT చట్టం ఏమి చెబుతోంది?
భారతదేశంలో PCPNDT (ప్రీ-కన్సెప్షన్ అండ్ ప్రీ నాటల్ డయాగ్నోస్టిక్ టెక్నిక్స్) యాక్ట్ అమల్లో ఉంది. ఈ చట్టం ప్రకారం గర్భధారణకు ముందు లేదా గర్భధారణ సమయంలో బిడ్డ లింగాన్ని గుర్తించడం, వెల్లడించడం, ప్రచారం చేయడం పూర్తిగా నిషేధితం. ఈ నిబంధనలను ఉల్లంఘించిన వైద్యులు, ఆసుపత్రులు లేదా వ్యక్తులపై కఠిన చర్యలు తీసుకునే అవకాశం ఉంది. జరిమానాలు, జైలు శిక్ష వంటి శిక్షలు కూడా విధించవచ్చు.
నిపుణుల అభిప్రాయం ఏంటంటే.?
వైద్య నిపుణుల అభిప్రాయం ప్రకారం IVF వంటి సాంకేతికతలను సంతానలేమి సమస్యలను పరిష్కరించడానికి మాత్రమే ఉపయోగించాలి. బిడ్డ లింగాన్ని ఎంపిక చేసుకోవడానికి లేదా తెలుసుకోవడానికి ఈ పద్ధతులను ఉపయోగించడం నైతికంగా, చట్టపరంగా సరైంది కాదని వారు స్పష్టం చేస్తున్నారు. అందువల్ల IVF ద్వారా సంతానం పొందడం సాధ్యమైనప్పటికీ, భారతదేశంలో బిడ్డ లింగాన్ని ముందే తెలుసుకోవడం లేదా ఎంపిక చేసుకోవడం చట్టబద్ధం కాదు.
