- Home
- Life
- Sweet Corn: ఇంట్లోనే కుండీలో స్వీట్ కార్న్ మొక్కలు ఇలా పెంచేయండి.. మొక్కజొన్న కండెలు పండుతాయి
Sweet Corn: ఇంట్లోనే కుండీలో స్వీట్ కార్న్ మొక్కలు ఇలా పెంచేయండి.. మొక్కజొన్న కండెలు పండుతాయి
Sweet Corn: స్వీట్ కార్న్ అంటే ఎవరికి మాత్రం ఇష్టముండదు. వర్షాకాలంలో వేడివేడి మొక్కజొన్న కండెలు తింటే ఆ రుచే వేరు. మొక్కజొన్నలను మీ ఇంటి బాల్కనీ లేదా టెర్రస్పై కుండీల్లోనే ఈజీగా పెంచేయచ్చు.
ఇంట్లోనే మొక్కజొన్న పంట
స్వీట్ కార్న్ ఉడకబెట్టుకుని తిన్నా, కాల్చుకుని తిన్నా రుచిగానే ఉంటుంది. మొక్కజొన్న పండించడానికి పెద్ద పొలం అవసరం లేదు. మీ బాల్కనీ లేదా టెర్రస్పై కుండీల్లోనే వీటిని పండించవచ్చు. మొక్కజొన్న పెంచడానికి ముందుగా సరైన కుండీ ఎంపిక చేసుకోవాలి. మొక్కజొన్న మొక్క వేర్లు లోతుగా వెళ్తాయి. కాబట్టి, కనీసం 16 నుంచి 18 అంగుళాల లోతు, అంతే వెడల్పు ఉన్న కుండీ తీసుకోవాలి లేదా పెద్ద సైజు 'గ్రో బ్యాగ్' ఎంచుకున్నా మంచిదే. మొక్కజొన్నలో ఫలదీకరణ బాగా జరగాలంటే, కనీసం 4 నుంచి 6 మొక్కలను ఒకేచోట పెంచడం మంచిది.
ఇలా మట్టి కలపండి
మొక్కజొన్న పెరగాలంటే మంచి మట్టి అవసరం. పోషకాలు నిండిన మట్టిని ముందుగానే తయారుచేసుకోవాలి. మట్టిలో సమాన భాగాలుగా పశువుల ఎరువు లేదా వర్మీ కంపోస్ట్ (వానపాముల ఎరువు) కలపాలి. కుండీలో నీరు నిలిచిపోకుండా అడుగున రంధ్రం ఉండేలా చూసుకోండి. మొక్కజొన్న విత్తనాలను మట్టిలో 1 నుంచి 2 అంగుళాల లోతులో నాటాలి. రెండు విత్తనాల మధ్య కనీసం 6 అంగుళాల దూరం ఉండేలా చూసుకోవాలి. విత్తనాలు నాటిన వెంటనే తేలికగా నీళ్లు చల్లాలి.
ఎండ ముఖ్యం
మొక్కజొన్న మొక్కకు రోజులో కనీసం 6 నుంచి 8 గంటల పాటు నేరుగా ఎండతగలాలి. కాబట్ట ఎండ తగిలే చోట కుండీని పెట్టాలి. మట్టిలో తేమ ఉండేలా చూసుకోవాలి. కానీ నీరు నిలవకూడదు. నీరు ఎక్కువైతే వేర్లు కుళ్లిపోవచ్చు. మొక్క కాస్త పెరిగాక ప్రతి 20 నుంచి 30 రోజులకు ఒకసారి సేంద్రియ ఎరువు వేయాలి. మొక్క చుట్టూ పెరిగే కలుపు మొక్కలను తీసేయాలి. మొక్కజొన్నకు నత్రజని (Nitrogen) అవసరం ఎక్కువ కాబట్టి, ద్రవరూప ఎరువులు వాడితే మొక్క బలంగా పెరుగుతుంది. విత్తనాలు నాటిన 2 నుంచి 3 నెలల్లో మొక్కజొన్న కండెలు తయారవుతాయి. కండె పైభాగంలో ఉండే పట్టులాంటి పీచు గోధుమ రంగులోకి మారినప్పుడు దాని కోసుకోవచ్చు.
