Pappu Storage: వేసవిలో వండిన పప్పు రాత్రికల్లా పాడైపోతుందా? ఈ చిన్న చిట్కాతో తాజాగా ఉంటుంది
Pappu Storage: వేసవిలో ఎండలకు వండిన పప్పు త్వరగా పాడైపోయే అవకాశం ఉంది. దీనివల్ల పప్పును పడేయాల్సి వస్తుంది. ఇలా ఆహారం వృధా కాకుండా వండిన పప్పు తాజాగా ఉండాలంటే కొన్ని చిట్కాలను పాటించాలి.
పప్పు త్వరగా ఎందుకు పాడవుతుంది?
తెలుగువారికి పప్పు, ఆవకాయ కాంబినేషన్ అంటే ఎంత ఇష్టమో. వేసవిలోనే ఆవకాయ తయారవుతుంది. ఇక పప్పు వండుకోకుండా ఎలా ఉంటారు? వారంలో రెండు మూడు సార్లు పప్పు తినేవారు ఉన్నారు. అయితే ఉదయం వండిన పప్పు రాత్రికల్లా వాసన వచ్చేస్తుంది. పప్పులో నీటి శాతం ఎక్కువగా ఉండడం వల్ల అది త్వరగా పాడైపోతుంది. ఉదయం వండి పప్పు రాత్రికి కూడా తాజాగా ఉండాలంటే చిన్న చిన్న చిట్కాలు పాటిస్తే సరిపోతుంది. వేసవిలో అధిక ఉష్ణోగ్రత కారణంగా బ్యాక్టీరియా త్వరగా పెరుగుతుంది. దీనివల్లే పప్పు ధాన్యాలు త్వరగా పాడైపోతాయి. పప్పులను మూత పెట్టకుండా నిల్వ ఉంచితే మరింత త్వరగా పాడవుతాయి. ఇక మూత పెట్టకపోతే పప్పు పై దుమ్ము ,బ్యాక్టీరియా చేరుతాయి.
పప్పు నిల్వ ఉంచే చిట్కా
చాలా మంది పప్పును ఉదయం వండాక పదేపదే వేడి చేస్తూ ఉంటారు. దీనివల్ల దాని రుచి మాత్రమే కాదు నాణ్యత కూడా తగ్గిపోతుంది. కాబట్టి వండిన పప్పును ఎక్కువ కాలం పాటు తాజాగా ఉంచాలంటే ఏం చేయాలో తెలుసుకోండి. పప్పు వండిన తర్వాత ఎక్కువసేపు బయట ఉంచవద్దు. అది గది ఉష్ణోగ్రతకు చేరాక వెంటనే ఒక డబ్బాలో వేసి ఫ్రిజ్లో నిల్వ చేసుకుంటే పప్పు రాత్రి వరకు తాజాగా ఉంటుంది. ఇక పప్పును వేసుకునేటప్పుడు శుభ్రమైన పొడి చెంచానే వాడండి. తడి చెంచా పెడితే బ్యాక్టీరియా పెరిగే అవకాశం ఎక్కువ. అలాగే పప్పు తినాలనుకుంటే పదేపదే వేడి చేయకండి. అన్నం వేడిగా వండుకుంటే పప్పు చల్లగా ఉన్నా కూడా రుచి బాగానే ఉంటుంది.
ఎంత కావాలో అంతే వండుకోండి
ఎండల్లో ఆహారాన్ని బయట వదిలేస్తే తరచుగా పాడైపోతుంది. కాబట్టి ఎంత వండాలో అంతే పరిమాణంలోనే వండుకోవడం మంచిది. వేసవిలో టార్చర్ కాకుండా ఆహారాన్ని మాత్రమే తినాలి. నిల్వ ఉన్న ఆహారం తినడం వల్ల ఫుడ్ పాయిజనింగ్ జరిగే అవకాశం ఉంది. ముఖ్యంగా పప్పు వంటివి త్వరగా పాడతాయి. వీటి వల్ల ఫుడ్ పాయిజనింగ్ త్వరగా అవుతుంది. కాబట్టి పైన చెప్పినట్లుగా పప్పును చల్లారగానే ఫ్రిజ్లో పెట్టి.. పొడి స్పూన్ తోనే వేసుకునేందుకు ప్రయత్నించండి. మధ్యాహ్నం ఎంత పప్పు తింటారో అంత మాత్రమే దానిలోంచి తీసి వేరే గిన్నెలో వేసి వాడుకోండి. ఇక రాత్రికి మిగిలిన పప్పును తినేయవచ్చు.
