Stroke symptoms : పక్షవాతం వచ్చే ముందు కనిపించే లక్షణాలేంటో తెలుసా..?
Stroke symptoms : చాలా సార్లు మన శరీరం వ్యాధులకు సంకేతాలను ఇస్తుంది. కానీ అవగాహన లేకపోవడం వల్ల మనం వాటిని పెద్దగా పట్టించుకోము. అలాగే పక్షవాతం వచ్చే ముందు కూడా కొన్ని సంకేతాలు కనిపిస్తాయి. ఆ లక్షణాలను అస్సలు నిర్లక్ష్యం చేయకూడదు.ఇంతకీ ఆ లక్షణాలేంటీ?
ముఖ కదలికలో మార్పు
పక్షవాతం (స్ట్రోక్) అత్యంత సాధారణ లక్షణాలలో ముఖ కదలికలో మార్పు. స్ట్రోక్ సంభవించినప్పుడు ముఖం వేలాడి పోతుంది. స్ట్రోక్కు గురైన వ్యక్తి నవ్వలేకపోవచ్చు, కన్ను, నొరు వంగిపోతాయి. మాట్లాడటం, మాట అర్ధం చేసుకోవడంలో ఇబ్బంది ఉంటుంది. ఇది పక్షవాతం సంకేతం.
ఆకస్మిక బలహీనత లేదా తిమ్మిరి
శరీరంలో ఒక వైపు, ముఖ్యంగా చేయి లేదా కాలులో అకస్మాత్తుగా బలహీనత లేదా తిమ్మిరిగా అనిపించడం కూడా స్ట్రోక్కు ముఖ్యమైన సంకేతం. ఉదాహరణకు చేయి బలహీనంగా మారడం లేదా కాలును ఎత్తినప్పుడు అదుపు కోల్పోవడం వంటి లక్షణాలు కనిపిస్తాయి. కొన్నిసార్లు ఈ బలహీనత లేదా తిమ్మిరి క్రమంగా కాకుండా, అకస్మాత్తుగా వస్తుంది.
తీవ్రమైన తలనొప్పి: హెమరేజిక్ స్ట్రోక్ వచ్చిన వారిలో అకస్మాత్తుగా తీవ్రమైన తలనొప్పి వస్తుంది. మెదడులోని రక్తనాళం పగిలినప్పుడు హెమరేజిక్ స్ట్రోక్ వస్తుంది.
గోల్డెన్ అవర్
పైన పేర్కొన్న స్ట్రోక్ లక్షణాలేవైనా కనిపించిన వెంటనే వైద్య సహాయం పొందడం అత్యంత ముఖ్యం. ఎందుకంటే ప్రారంభ 3 గంటలలోపు చికిత్స అందితే మెదడు దెబ్బతినడం తగ్గి, కోలుకునే అవకాశం పెరుగుతుంది. స్ట్రోక్ లక్షణాలు మొదలైన తరువాత మొదటి 3 నుండి 4 గంటల వ్యవధిని "గోల్డెన్ అవర్" లేదా "గోల్డెన్ పీరియడ్" అని పిలుస్తారు.
ఈ సమయంలో వైద్య చికిత్స అందితే:
- మస్తిష్కానికి తీవ్ర నష్టం జరగదు.
- వ్యాధి తీవ్రత తగ్గుతుంది,
- రికవరీ త్వరగా జరుగుతుంది,
- పేషెంట్ తిరిగి సాధారణ జీవితం సాగించే అవకాశాలు పెరుగుతాయి.
ఏమి చేయాలి?
ముఖం వంగిపోవడం, చేయి లేదా కాలు బలహీనంగా మారడం, మాట్లాడలేకపోవడం, ఆకస్మాత్తుగా తిమ్మిరి ఇవి కనిపించిన వెంటనే అంబులెన్స్కు కాల్ చేయండి లేదా సమీప ఆసుపత్రికి తీసుకెళ్లండి.
- కొన్ని సందర్భాల్లో లక్షణాలు కొద్దిసేపటి తరువాత మాయమవుతాయి. ఇది తాత్కాలిక ఇస్కీమిక్ దాడి (TIA) కావచ్చు. అయితే ఇది ఒక హెచ్చరిక సంకేతం. భవిష్యత్తులో తీవ్రమైన స్ట్రోక్ వచ్చే ప్రమాదం ఎక్కువ. అందువల్ల లక్షణాలు తగ్గినా వైద్య పరీక్ష తప్పనిసరి.
