Milk Packet Colors: పాల ప్యాకెట్ కలర్ కోడ్... ఏ రంగు ప్యాకెట్ లో ఏ పాలు ఉంటాయి..?
Milk Packet Colors: మార్కెట్లో రంగు రంగుల పాల ప్యాకెట్స్ ఉంటాయి. అన్ని పాల ప్యాకెట్లు ఒకే రంగులో ఎందుకు ఉండవు? వాటి వెనక ఉన్న సీక్రెట్ ఏంటో తెలుసా? ఎవరు ఏ రంగు ప్యాకెట్ లో పాలు తాగాలి? ఏవి ఆరోగ్యానికి మంచిది?
Milk Packets
మనకు మార్కెట్లో రంగు రంగుల్లో పాల ప్యాకెట్లు కనిపిస్తూ ఉంటాయి. కొన్ని పాల ప్యాకెట్స్ బ్లూ కలర్ లో ఉంటే, మరి కొన్ని గ్రీన్, ఆరెంజ్ రంగుల్లో ఉండటం ఎప్పుడైనా గమనించారా? ఒక్కో కంపెనీ ఒక్కో రంగు పాల ప్యాకెట్ అమ్ముతుంది అని చాలా మంది అనుకుంటారు. కానీ, ఈ పాల ప్యాకెట్ కలర్ వెనక చాలా పెద్ద కథే ఉంది.
పాల ప్యాకెట్ కలర్ ని బట్టి.. ఆ ప్యాకెట్ లో ఎలాంటి పాలు ఉన్నాయి అని తెలుసుకోవచ్చు. ముఖ్యంగా, ఆ పాలల్లో ఫ్యాట్ ఎంత ఉందో వినియోగదారులు గుర్తించేందుకు వీలుగా ఈ రంగుల్లో పాల ప్యాకెట్లు అమ్ముతారు. పాల ప్యాకెట్ రంగును ఆధారంగా చేసుకొని సరైన పాలు కొనుగోలు చేయడంలో సహాయపడతాయి.
ఏ రంగు ప్యాకెట్ లో ఎలాంటి పాలు ఉంటాయి..?
పాల ప్యాకెట్ నీలి రంగులో ఉంది అంటే.. ఆ ప్యాకెట్ లో ‘టోన్డ్ మిల్క్’ ఉంటాయి. వీటిలో 3 శాతం కంటే తక్కువ ఫ్యాట్ ఉంటుంది. పాలల్లో నుంచి ఫ్యాట్ తీసేసి.. ఆ పాలను ఈ కలర్ ప్యాకెట్ లో అమ్ముతారు.
అదే ఆరెంజ్ రంగులో లేదా మెజెంటా రంగులో ఉండే పాల ప్యాకెట్ లో ఫుల్ క్రీమ్ పాలు ఉంటాయి. అంటే.. ఈ పాలల్లో మీగడ చాలా ఎక్కువగా ఉంటుంది. తక్కువలో తక్కువ 6 శాతం ఫ్యాట్ ఉంటుంది.
ఆకుపచ్చ పాల ప్యాకెట్ లో తాజా పాలు ఉంటాయి. అంటే, ఈ పాలల్లో 4.5 శాతం ఫ్యాట్స్, 8.5 శాతం SNF ఉంటాయి. ఇక, మన దేశంలో చాలా కంపెనీలు.. ఫ్యాట్ తక్కువగా ఉన్న పాలను పసుపు రంగు ప్యాకెట్లలో కూడా అమ్ముతుంటారు.
ఈ రంగులు ఎందుకు..?
పాలు కొనుక్కునే వినియోగదారులు.. ప్యాకెట్ మీద రాసి ఉన్న అక్షరాలు చూసి అందులో ఎలాంటి పాలు ఉంటాయి అని చదవాల్సిన అవసరం లేకుండా, కేవలం కలర్ చూసి.. ఏ పాలు కావాలో కొనుక్కోవడానికి సులువుగా ఉండేందుకు ఇలా రంగులు కేటాయించారు.
మన దేశంలోనే కాకుండా, ఇతర దేశాల్లో కూడా పాల రకాలను గుర్తించడానికి రంగులు ఉపయోగిస్తారు. బ్రిటన్, అనేక యూరోపియన్ దేశాలలో, ఫుల్ క్రీమ్ ఉన్న పాలు నీలిరంగు ప్యాకెట్ లో, పాక్షికంగా ఫ్యాట్ తీసిన పాలు ఆకు పచ్చ రంగులో లభిస్తాయి. ఇంటర్నేషనల్ డైరీ ఫుడ్స్ అసోసియేషన్ ప్రకారం, అమెరికాలో ఫుల్ క్రీమ్ పాలు ఎరుపు రంగులో, తక్కువ ఫ్యాట్ ఉన్న పాలు బ్లూ కలర్ లో లభిస్తాయి.
ఏ పాలు ఎవరు తీసుకోవాలి..?
మన దేశంలో ప్రజలు ఏదో ఒక రూపంలో పాలను తమ డైట్ లో భాగం చేసుకుంటూనే ఉంటారు. మీకు పల్చటి పాలు కావాలంటే స్కిమ్డ్ లేదా, టోన్డ్ మిల్క్ కొనుగోలు చేయాలి. అదే చిక్కటి పాలు కావాలంటే.. ఫుల్ క్రీమ్ మిల్క్ ఎంచుకోవచ్చు. హెల్త్ లైన్ ప్రకారం... ఫుల్ క్రీమ్ పిల్లలకు, క్రీడాకారులకు మంచిది. ఎందుకంటే ఇందులో విటమిన్ డి, ఒమేగా 3 ఫ్యాటీ యాసిడ్స్ అధికంగా ఉంటాయి. బరువు తగ్గాలి అనుకునేవారికి, గుండె సమస్యలు ఉన్నవారు స్కిమ్డ్, టోన్డ్ మిల్క్ తీసుకోవడం మంచిది.
