Orange City: మన దేశంలో నారింజ నగరం అని ఏ సిటీని పిలుస్తారు? అలా ఎందుకు పిలుస్తారు?
Orange City: మనదేశంలో కొన్ని సిటీలకు ప్రత్యేకమైన పేర్లు ఉన్నాయి. అలాంటి వాటిల్లో నారింజ నగరం కూడా ఒకటి. ఇది మన అందరికీ తెలిసిన నగరమే. ఎన్నో సంవత్సరాల చరిత్ర కలిగిన నగరం ఇది. ఆ నగరమేదో తెలుసా?
నారింజ నగరం ఏది?
మనదేశంలో ఎన్నో నగరాలకు చారిత్రాత్మక సాక్ష్యాలు, పురాతన సాంప్రదాయాలు ఉన్నాయి. భారతదేశంలోని ప్రతి నగరం సొతత ప్రత్యేకతతో వెలిగిపోతుంది. అలాంటి వాటిల్లో నాగపూర్ ఒకటి. మహారాష్ట్రలో ఉన్న ఈ నగరాన్ని నారింజ నగరంగా పిలుస్తారు. ఈ ఆరంజ్ సిటీ కి చాలా ప్రత్యేకత ఉంది. అసలు నాగపూర్ కు ఆరంజ్ సిటీ అనే పేరు ఎందుకు వచ్చింది?
200 ఏళ్ల నుంచి..
నాగపూర్ లో నారింజ వాసన కొతేమీ కాదు. రెండు వందల ఏళ్ల నుంచి నాగపూర్ నారింజ వాసనతో నిండిపోయింది. భోంస్లే రాజవంశస్తులు మొదటిసారి అక్కడ నారింజ సాగును ప్రారంభించారని చెబుతారు. ఈ పండు అక్కడి వాతావరణం, నేల వల్ల విపరీతంగా కాసేది. శీతాకాలంలో పగలు, రాత్రి ఉష్ణోగ్రతలో విపరీతమైన హెచ్చుతగ్గులు ఉండడం వల్ల నారింజ సాగుకు అనుకూలమైన వాతావరణం ఉండేది. దీంతో ఎక్కడా లేని విధంగా ఇక్కడ నారింజ సాగు అధికంగా జరిగేది. దీంతో నాగపూర్ కు నారింజ సాగు ఒక ప్రత్యేకతను తీసుకొచ్చింది. నాగపురి నారింజ పేరుతో పండ్ల అమ్మకాలు సాగాయి.
నారింజ పండ్ల స్పెషాలిటీ
నాగపూర్ నారింజలు ఎంతో ప్రత్యేకమైనవి. అందుకే భారత ప్రభుత్వం జిఐ ట్యాగ్ ను కూడా అందించింది. ఈ నారింజలు ప్రపంచవ్యాప్తంగా సరఫరా అవుతాయి. ఈ పండ్ల తొక్క చాలా సన్నగా ఉంటుంది. అందుకే వాటిలో రసం ఎక్కువగా ఉంటుంది. అద్భుతంగా తీపి, పుల్లని రుచి కలిగి ఉంటాయి. ఇవి త్వరగా చెడిపోవు. కాబట్టి దేశవ్యాప్తంగా లేదా విదేశాలకు సులువుగా ఎగుమతి చేయవచ్చు. ఆకర్షణీయమైన రంగుతో పాటు ఈ నారింజ పండ్లు విటమిన్ సి, యాంటీ ఆక్సిడెంట్లతో నిండి ఉంటాయి. తినే కొద్ది ఇంకా తినాలనిపించేలా ఉంటాయి ఈ నారింజ పండ్లు.
నారింజ పండుగ
దేశంలో నారింజ సాగుకు, పంపిణీకి, వ్యాపారానికి నాగపూర్ అతిపెద్ద కేంద్రంగా మారిపోయింది. నగరంలో పెద్దపెద్ద మార్కెట్లు, శీతల గిడ్డంగి సౌకర్యాలు, బలమైన ఎగుమతి నెట్ వర్క్ వంటివి ఏర్పడ్డాయి. అందుకే నాగపూర్ ను ఆరెంజ్ సిటీగా పిలుచుకోవడం మొదలుపెట్టారు. నాగపూర్ ఆర్థిక వ్యవస్థ కూడా ఈ పండు చుట్టూనే తిరుగుతోంది. నగరం చుట్టుపక్కల నారింజ పండ్ల తోటలు అధికంగా కనిపిస్తాయి. టన్నుల కొద్దిగా నారింజలను ప్రతిరోజూ అమ్ముతూ ఉంటారు. ఎంతోమంది రైతులకు, వ్యాపారులకు జీవన ఉపాధి ఈ నారింజ పండ్లే. అందుకే ఆ నగరవాసులు ఏడాదికి ఒకసారి నాగపూర్ నారింజ పండుగను నిర్వహించుకుంటారు.
