Railways Luggage Rules : ఏ క్లాస్ ప్రయాణికులు ఎంత లగేజ్ తీసుకెళ్లవచ్చు..? రైల్వే రూల్స్ ఇవే

రైళ్లలో లగేజీ తీసుకెళ్లడానికి కొత్త మార్గదర్శకాలను జారీ చేసింది ఇండియన్ రైల్వే. వివిధ తరగతులకు వేర్వేరు బరువు పరిమితులను నిర్ణయించింది. ఈ వివరాలను ఇక్కడ తెలుసుకుందాం.

Image Credit : Gemini AI

రైళ్లలోనూ లగేజీ బరువు చూసుకోవాల్సిందే..

మీరు తరచుగా రైళ్లలో ప్రయాణిస్తుంటే, ఈ వార్త మీకు చాలా ఉపయోగపడుతుంది. అవును.. విమాన ప్రయాణాల మాదిరిగానే, ఇకపై రైలులో లగేజీ తీసుకెళ్లే ముందు దాని బరువును తప్పనిసరిగా చూసుకోవాలి.

Image Credit : Getty

రైల్వే లగేజీపై పరిమితి ఉందా..?

ప్రయాణికుల సౌకర్యం, భద్రతను దృష్టిలో ఉంచుకుని భారతీయ రైల్వే ఇటీవల రైళ్లలో గరిష్ఠంగా ఎంత లగేజీ తీసుకెళ్లవచ్చనే దానిపై మార్గదర్శకాలు జారీ చేసింది. ఉచితంగా అనుమతించిన పరిమాణం కంటే ఎక్కువ లగేజీ తీసుకెళ్తే ప్రయాణికులు అదనపు ఛార్జీలు చెల్లించాల్సి ఉంటుందని రైల్వే మంత్రిత్వ శాఖ మరోసారి స్పష్టం చేసింది.

ఈ నిబంధనలు ఇప్పటికే అమల్లో ఉన్నాయని రైల్వే మంత్రి అశ్విని వైష్ణవ్ ఇటీవల లోక్‌సభలో ఒక లిఖితపూర్వక సమాధానంలో స్పష్టం చేశారు. ప్రతి తరగతికి లగేజీ పరిమితి, గరిష్ఠ పరిమితి, అదనపు ఛార్జీలను నిర్దిష్టంగా పేర్కొన్నారు.

అనుమతించిన పరిమితికి మించి లగేజీ తీసుకెళ్లే ప్రయాణికులకు నిబంధనల ప్రకారం జరిమానా విధించవచ్చని రైల్వే అధికారులు స్పష్టం చేశారు. రద్దీని నియంత్రించి, సురక్షితమైన, సౌకర్యవంతమైన ప్రయాణాన్ని అందించేందుకు ప్రతి తరగతి కోచ్‌కు వేర్వేరు పరిమితులు నిర్ణయించారు.

Image Credit : chat gpt

ఉచిత లగేజీకి పరిమితి..

ఉచితంగా అనుమతించే లగేజీకి కూడా గరిష్ఠ పరిమితి ఉంటుందని రైల్వే మంత్రి లోక్‌సభలో స్పష్టం చేశారు. ప్రయాణికులు రుసుము చెల్లించినప్పటికీ, తమ తరగతికి నిర్దేశించిన గరిష్ఠ పరిమితికి మించి వస్తువులను తీసుకెళ్లడానికి వీల్లేదు.

ఉచిత పరిమితిని దాటిన ప్రయాణికులు అదనపు లగేజీని బుక్ చేసుకోవచ్చు. వారు తమ కోచ్‌లోనే ఆ లగేజీని తీసుకెళ్లడానికి నిర్దేశించిన రేటుకు ఒకటిన్నర రెట్లు రుసుము చెల్లించాల్సి ఉంటుంది.

Image Credit : Gemini

ఏ కోచ్ లో ఎంత లగేజీ తీసుకెళ్లవచ్చు..?

వివిధ క్లాసుల్లో లగేజీ గరిష్ఠ పరిమితులు ఇలా ఉన్నాయి

ఏసీ ఫస్ట్ క్లాస్: తలకు 70 కిలోల వరకు

ఏసీ టూ టైర్: తలకు 50 కిలోల వరకు.

ఏసీ త్రీ టైర్, చైర్ కార్: తలకు 40 కిలోల వరకు.

స్లీపర్ క్లాస్: తలకు 40 కిలోల వరకు.

సెకండ్ క్లాస్: తలకు 35 కిలోల వరకు.

లగేజీ పరిమాణం ఎంతుండాలి..?

లగేజీ పరిమాణాన్ని కూడా రైల్వే శాఖ నిర్ధారించింది. ప్రయాణికులు తమ కోచ్‌లలోకి ట్రంకులు, సూట్‌కేసులు లేదా పెట్టెలను మాత్రమే తీసుకెళ్లగలరు. వాటి గరిష్ఠ పరిమాణం 100 సెం.మీ x 60 సెం.మీ x 25 సెం.మీ మించకూడదు. ఇంతకంటే పెద్ద లగేజీని కోచ్‌లోకి అనుమతించరు.

నిర్ణీత పరిమాణం కంటే పెద్ద లగేజీని తప్పనిసరిగా బుక్ చేసి బ్రేక్ వ్యాన్ లేదా పార్సెల్ వ్యాన్‌కు పంపాలి. అంతకంటే పెద్ద వస్తువులను వ్యక్తిగత లగేజీగా పరిగణించరు, వాటిని కోచ్‌లోకి అనుమతించరు. వాటిని విడిగా బుక్ చేసి బ్రేక్ వ్యాన్‌లో మాత్రమే పంపాలి.

Image Credit : Gemini AI

అదనపు లగేజీ ఎక్కడ పెట్టాలి?

నిర్ణీత పరిమితికి మించిన లగేజీని బ్రేక్ వ్యాన్ (SLR)లో మాత్రమే తీసుకెళ్లాలి. రైల్వే నిర్దేశించిన గరిష్ఠ బుకింగ్ పరిమితిని తప్పనిసరిగా పాటించాలి. ప్రయాణికుల సౌకర్యం, భద్రతను దృష్టిలో ఉంచుకుని ఈ నిబంధనలు రూపొందించినట్లు రైల్వే అధికారులు తెలిపారు. ప్రయాణికులు ఈ నిబంధనలు పాటిస్తే ప్రయాణంలో ఎలాంటి ఇబ్బందులు ఉండవని, ప్రయాణానికి ముందే తమ లగేజీ బరువును తూకం వేసుకోవాలని కోరారు.