Railway Track: రైలు పట్టాలపై కంకర రాళ్లు ఎందుకు ఉంటాయో ఎప్పుడైనా ఆలోచించారా?
Railway Track: రైలులో ప్రయాణం చేసిన ప్రతి ఒక్కరూ ట్రైన్ పట్టాల మధ్య, పక్కన పరచి ఉన్న కంకర రాళ్లను చూసే ఉంటారు. కానీ అవి అక్కడ ఎందుకు ఉంటాయో ఎప్పుడైనా ఆలోచించారా? అసలు ఈ రాళ్ల వెనుక ఉన్న సైన్స్ ఏంటో తెలుసా? లేటేందుకు తెలుసుకుందాం పదండి.
రైలు పట్టాలపై రాళ్లు ఎందుకు?
రైలు పట్టాలపై మనం కంకర రాళ్లను చూసే ఉంటాం. వాటిని ఎందుకు అలా పరిచారు అనే డౌట్ చాలామందిలో ఉంటుంది. నిజానికి రైల్వే వ్యవస్థలో ఈ కంకర రాళ్లు అత్యంత కీలక పాత్ర పోషిస్తాయి. రైలు పట్టాలపై ఉండే ఈ కంకర రాళ్లను “బ్యాలస్ట్” అని పిలుస్తారు. ఇవి రైల్వే ట్రాక్‌కు బలమైన పునాదిలా పనిచేస్తాయి. సాధారణంగా ఒక రైలు వందల టన్నుల వరకు బరువు ఉంటుంది. ఆ భారీ బరువు మొత్తం పట్టాలపై పడకుండా.. ఆ ఒత్తిడిని సమానంగా నేలపై పంపిణీ చేయడానికి కంకర రాళ్లు సహాయపడతాయి. ఈ రాళ్లు లేకపోతే ట్రాక్‌పై పడే ఒత్తిడి వల్ల నేల కుంగిపోవడం లేదా పట్టాలు వంకరగా మారే ప్రమాదం ఉంటుంది.
స్థిరమైన స్థానం
రైల్వే ట్రాక్‌ను స్థిరమైన స్థానంలో ఉంచడానికి కూడా ఈ రాళ్లు పనిచేస్తాయి. రైళ్లు అధిక వేగంతో ప్రయాణిస్తున్నప్పుడు భారీ వైబ్రేషన్లు వస్తాయి. అలాంటి టైంలో పట్టాలు కదలకుండా ఉండాలి. కంకర రాళ్లు స్లీపర్లను గట్టిగా పట్టుకొని ట్రాక్ నిర్మాణాన్ని స్థిరంగా ఉంచుతాయి. ఇవి లేకపోతే ట్రాక్ కొద్దికొద్దిగా కదిలి ప్రమాదాలు జరిగే అవకాశం ఉంటుంది.
నీరు నిల్వ ఉండకుండా
వర్షం నీరు ట్రాక్‌ల మధ్య నిల్వ ఉండకుండా బయటకు వెళ్లేలా ఈ రాళ్లు సహాయపడతాయి. సాధారణ మట్టి లేదా ఇసుకతో ట్రాక్ నిర్మిస్తే వర్షాకాలంలో నీరు నిలిచిపోయి నేల కుంగిపోతుంది. కానీ కంకర రాళ్ల మధ్య ఖాళీలు ఉండటం వల్ల నీరు సులభంగా కిందికి జారిపోయి.. దానివల్ల ట్రాక్‌ల పునాది దెబ్బతినకుండా ఉంటుంది.
మొక్కలు పెరగకుండా
అలాగే ఈ రాళ్లు ట్రాక్ చుట్టూ మొక్కలు, ఇతర పిచ్చి చెట్లు పెరగకుండా సహాయపడతాయి. సాధారణ నేల ఉంటే గడ్డి, మొక్కలు వేగంగా పెరిగి ట్రాక్‌లను ప్రభావితం చేసే అవకాశం ఉంటుంది. మొక్కల వేర్లు ట్రాక్ నిర్మాణాన్ని బలహీనపరచవచ్చు. కంకర రాళ్లు ఉండటం వల్ల మొక్కలు పెరిగే అవకాశం చాలా తక్కువగా ఉంటుంది.
ప్రత్యేకమైన రాళ్లు
అంతేకాదు రైలు ప్రయాణ సమయంలో ఏర్పడే వైబ్రేషన్లు, శబ్దాన్ని తగ్గించడంలో కూడా కంకర రాళ్లు కీలక పాత్ర పోషిస్తాయి. రైలు చక్రాలు పట్టాలపై తిరిగేటప్పుడు ఉత్పత్తి అయ్యే శక్తిని ఈ రాళ్లు కొంతవరకు గ్రహిస్తాయి. దీని వల్ల ట్రాక్‌పై ఒత్తిడి తగ్గడమే కాకుండా ప్రయాణం సాఫీగా ఉంటుంది. అంతేకాదు ఈ రాళ్లను ప్రత్యేకంగా ఎంపిక చేస్తారు. సాధారణ రాళ్లు కాకుండా బలంగా, గట్టిగా ఉండే గ్రానైట్ వంటి రాళ్లను ఉపయోగిస్తారు.
