Korean Drama: కొరియన్ డ్రామాలు అంటే ఎందుకంత పిచ్చి.? అసలు కారణం ఏంటో తెలుసా.?
Korean Drama: కొరియన్ డ్రామాలు ఇప్పుడు భారత్లోనే కాదు, ప్రపంచవ్యాప్తంగా భారీ ఫ్యాన్ బేస్ను సంపాదించుకున్నాయి. యువత ఎక్కువ అట్రాక్ట్ అవుతున్నారు. ఇంతకీ కొరియన్ డ్రామాలను ఎందుకు ఇష్టపడుతున్నారో ఎప్పుడైనా ఆలోచించారా.?
మనసుకు దగ్గరగా అనిపించే కుటుంబ విలువలు
కొరియన్ డ్రామాల్లో కుటుంబ బంధాలు, తల్లిదండ్రుల పట్ల గౌరవం, త్యాగం, ప్రేమ, బాధ్యత వంటి అంశాలకు పెద్దపీట వేస్తారు. ఇవన్నీ భారతీయ సంస్కృతికి చాలా దగ్గరగా ఉంటాయి. కఠినమైన తల్లిదండ్రులు, చెప్పుకోలేని ప్రేమ, అన్నదమ్ముల బాధ్యతలు, సమాజ ఒత్తిళ్లు లాంటి అంశాల్లో ప్రేక్షకులు తమ జీవితాన్నే చూసుకుంటారు. అందుకే ఈ కథలు మనసుకు దగ్గరగా అనిపిస్తాయి.
చిన్నది కానీ బలమైన కథనం
పాశ్చాత్య సిరీస్లలా అనేక సీజన్లులాగా సాగకుండా, ఎక్కువగా కొరియన్ డ్రామాలు ఒకే సీజన్లో పూర్తవుతాయి. సాధారణంగా 16 నుంచి 20 ఎపిసోడ్లలో కథకు స్పష్టమైన ఆరంభం, మధ్య, ముగింపు ఉంటాయి. దీంతో కథ ఎక్కడా బోర్ కొట్టదు. ప్రేక్షకుడి ఆసక్తి చివరి వరకు అలాగే ఉంటుంది.
లోతైన భావోద్వేగాల ప్రదర్శన
కొరియన్ డ్రామాల అసలు బలం భావోద్వేగాలు. ప్రేమ, విరహం, ఒంటరితనం, బాధ, మళ్లీ నిలబడే ధైర్యం వంటి భావాలను చాలా సహజంగా చూపిస్తారు. మానసిక నిపుణులు కూడా ఈ డ్రామాలు భావోద్వేగ సాంత్వన ఇస్తాయని చెబుతారు. ముఖ్యంగా ఒత్తిడి, ఒంటరితనం ఎదుర్కొంటున్న వారికి ఇవి రిలీఫ్లా మారతాయి.
హై క్వాలిటీ విజువల్స్, హృదయాన్ని తాకే మ్యూజిక్
కొరియన్ డ్రామాల ప్రొడక్షన్ క్వాలిటీ చాలా ఉన్నతంగా ఉంటుంది. ప్రతి సీన్ని చాలా అందంగా చిత్రీకరిస్తారు. సాఫ్ట్ లైటింగ్, సహజమైన లొకేషన్లు, సినిమాటిక్ ఫీలింగ్ వీటి ప్రత్యేకతగా చెప్పొచ్చు. అదే విధంగా బ్యాక్గ్రౌండ్ మ్యూజిక్, ఒరిజినల్ సౌండ్ ట్రాక్స్ కథలో భాగంలా అనిపిస్తాయి. కొన్ని పాటలు అయితే ఎపిసోడ్ ముగిసిన తర్వాత కూడా మనసులో మోగుతూనే ఉంటాయి.
అన్ని వయసులకూ అనుకూలమైన క్లీన్ కంటెంట్
చాలా వెస్ట్రన్ షోలలో బోల్డ్ సీన్స్ ఎక్కువగా ఉంటాయి. కానీ కొరియన్ డ్రామాల్లో శారీరక దృశ్యాల కంటే భావోద్వేగ సమీపతకే ప్రాధాన్యం ఇస్తారు. చూపులు, మాటలు, చిన్న క్షణాల ద్వారా ప్రేమను చూపిస్తారు. అందుకే ఇవి కుటుంబంతో కలిసి చూసేందుకు కూడా సౌకర్యంగా ఉంటాయి. ఇది ప్రేక్షకుల సంఖ్య పెరగడానికి ప్రధాన కారణం.
కేవలం వినోదమే కాదు
కొరియన్ డ్రామాలు కేవలం కథలు చెప్పడం మాత్రమే కాదు. అక్కడి ఫ్యాషన్, ఆహారం, కేఫ్ కల్చర్, రోజువారీ జీవనశైలి కూడా ప్రేక్షకులను ఆకర్షిస్తుంది. దీంతో చాలామంది కొరియన్ భాష, ఆహారం, జీవన విధానంపై ఆసక్తి చూపడం మొదలుపెడుతున్నారు. ఈ విధంగా కొరియన్ డ్రామాలు సాఫ్ట్ కల్చరల్ అంబాసిడర్లా మారాయి. మొత్తానికి, మనసును తాకే కథలు, విలువలు, భావోద్వేగాలు, క్లీన్ కంటెంట్ అన్నీ కలిసి కొరియన్ డ్రామాలను ఈ స్థాయిలో ప్రజాదరణ పొందేలా చేశాయి.
