Ranjith Case: డైరెక్టర్ రెంజిత్పై ఇది మూడో లైంగిక వేధింపుల ఆరోపణ. గతంలోనూ ఆయనపై ఇలాంటివే రెండు కేసులు నమోదయ్యాయి. ఓ బెంగాలీ నటి తనతో అసభ్యంగా ప్రవర్తించాడని ఆరోపించగా, బెంగళూరులో ఓ యువకుడు తనపై దాడి జరిగిందని ఫిర్యాదు చేశాడు.
Ranjith Case: ప్రముఖ మలయాళ డైరెక్టర్ రెంజిత్పై మరో లైంగిక వేధింపుల కేసు నమోదైంది. ఆయనపై ఇలాంటి ఆరోపణలతో కేసు నమోదు కావడం ఇది మూడోసారి. గతంలోనూ ఆయనపై ఇద్దరు వేర్వేరుగా ఇలాంటి ఆరోపణలే చేశారు. 2009లో 'పలేరి మాణిక్యం' సినిమా షూటింగ్ సమయంలో కొచ్చిలోని గెస్ట్ హౌస్లో రెంజిత్ తనతో అసభ్యంగా ప్రవర్తించారని, లైంగిక దాడికి ప్రయత్నించారని ఓ బెంగాలీ నటి 2024లో ఆరోపించారు. ఈ ఘటనపై పోలీసులు విచారణ జరిపి కోర్టులో ఛార్జ్షీట్ కూడా దాఖలు చేశారు. అయితే, ఈ కేసును గత అక్టోబర్లో హైకోర్టు కొట్టివేసింది. 2009లో జరిగిన ఘటనపై కేసు నమోదు చేయడానికి మెజిస్ట్రేట్ కోర్టుకు ఉన్న కాలపరిమితి ముగిసిపోయిందని హైకోర్టు తన తీర్పులో పేర్కొంది.
ఇక 2012లో బెంగళూరులోని ఓ ఫైవ్ స్టార్ హోటల్లో డైరెక్టర్ రెంజిత్ తనపై లైంగిక దాడికి పాల్పడ్డాడని కోజికోడ్కు చెందిన ఓ యువకుడు ఫిర్యాదు చేశాడు. 'బావుట్టియుడే నామత్తిల్' సినిమా సెట్లో పరిచయమైన తనను రెంజిత్ బెంగళూరుకు పిలిపించి వేధించాడని, దుస్తులు లేని చిత్రాలు కూడా తీశాడని ఆ యువకుడు వాంగ్మూలం ఇచ్చాడు. ఈ ఆరోపణలపై ఎర్నాకుళం నార్త్ పోలీసులు రెంజిత్పై నాన్-బెయిలబుల్ సెక్షన్ల కింద కేసు నమోదు చేశారు. అయితే, ఫిర్యాదు చేయడానికి 12 ఏళ్లు ఆలస్యమైందన్న కారణంతో కర్ణాటక హైకోర్టు 2025 జులైలో ఈ కేసును కూడా రద్దు చేసింది. ఈ రెండు కేసుల తర్వాత ఇప్పుడు మూడోసారి ఓ నటి కారవాన్లో తనపై లైంగిక దాడి జరిగిందని ఫిర్యాదు చేయడంతో పోలీసులు పకడ్బందీగా దర్యాప్తు చేస్తున్నారు.
