తప్పుడు ప్రచారమే: ఇంటర్ మార్కుల అవకతవకలపై గ్లోబరీన్ సీఈఓ

ఇంటర్ పరీక్షల్లో తాము ఎలాంటి అవకతవకలకు పాల్పడలేదని....ఈ విషయంలో తాము ఏ విచారణకైనా తాము సిద్దంగా ఉన్నామని  గ్లోబరీనా సంస్థ సీఈఓ వీఎస్ఎన్ రాజు స్పష్టం చేశారు.

హైదరాబాద్: ఇంటర్ పరీక్షల్లో తాము ఎలాంటి అవకతవకలకు పాల్పడలేదని....ఈ విషయంలో తాము ఏ విచారణకైనా తాము సిద్దంగా ఉన్నామని  గ్లోబరీనా సంస్థ సీఈఓ వీఎస్ఎన్ రాజు స్పష్టం చేశారు.

మంగళవారం నాడు గ్లోబరీనా సంస్థ సీఈఓ ఓ తెలుగు న్యూస్ చానెల్‌‌కు ఆయన ఇంటర్వ్యూ ఇచ్చారు. ఈ ఇంటర్వ్యూలో  తమ సంస్థపై వచ్చిన ఆరోపణలను ఆయన ఖండించారు.

తమ సంస్థకు ఇంటర్ బోర్డు టెండర్ దక్కడం వెనుక ఏ రాజకీయ నాయకుడి హస్తం లేదన్నారు. తమకు టెండర్ ఇవ్వాలని కూడ ప్రభుత్వంలోని పెద్దలు సిఫారసు కూడ చేయలేదన్నారు.

టెక్నికల్‌ బిడ్‌లో, ఫైనాన్స్ బిడ్‌లో తమ సంస్థ నెంబర్‌వన్‌గా నిలిచినందున ఈ టెండర్‌ను తమకు ఇంటర్ బోర్డు కేటాయించిన విషయాన్ని ఆయన గుర్తు చేశారు. దేశంలోని పలు యూనివర్శిటీలతో  తమ సంస్థ ఒప్పందం కుదుర్చుకొన్న విషయాన్ని ఆయన ప్రస్తావించారు.

మీడియాలో తమ సంస్థపై రెండు రోజులుగా అవాస్తవాలు వస్తున్నాయని ఆయన ఆరోపణలు చేశారు. తమ సంస్థపై తప్పుడు ప్రచారం చేస్తున్నారని ఆయన అభిప్రాయపడ్డారు.

మాగ్నటిక్ సంస్థతో పాటు తమ సంస్థ కూడ ఈ బిడ్‌లో పాల్గొన్న విషయాన్ని ఆయన గుర్తు చేశారు. మాగ్నటిక్ సంస్థ కంటే తమ సంస్థ తక్కువ రేట్ కోడ్ చేయడం వల్ల  ఈ టెండర్ దక్కిందన్నారు.

దేశంలోని 26 యూనివర్శిటీలతో తమ సంస్థ ఒప్పందం కుదుర్చుకొన్నట్టు ఆయన గుర్తు చేశారు. ఏ సంస్థతో కూడ తమకు బ్లాక్ మార్కు రాలేదన్నారు.

కాకినాడ జేఎన్టీయూలో తమ సంస్థ బాగా సర్వీస్ చేసిందనే విషయమై సర్టిఫికెట్ కూడ ఇచ్చిందని ఆయన గుర్తు  చేశారు. కాకినాడ జేఎన్టీయూలో తమ సంస్థపై దుష్ప్రచారం చేశారని ఆయన అభిప్రాయపడ్డారు.

జేఎన్టీయూ కాకినాడ సబ్బవరం పోలీస్ స్టేష‌న్‌లో ఫిర్యాదు చేసినట్టుగా తనకు తెలియదన్నారు. ఇప్పటివరకు తనకు ఎలాంటి నోటీసులు రాలేదన్నారు. యూనివర్శిటీ అంతర్గతంగా నోటీసులు జారీ చేసి ఉండవచ్చన్నారు. 

జేఎన్టీయూ కాకినాడ విషయంలో  రెండు మాసాల్లో  తీర్పు వచ్చే అవకాశం ఉందన్నారు. తమ సంస్థకు 18 ఏళ్ల అనుభవం ఉందని  ఆయన చెప్పారు.తమ సంస్థ నుండి ఎలాంటి సాంకేతిక సమస్యలు తలెత్తలేదని ఆయన అభిప్రాయపడ్డారు.ఇంటర్ బోర్డు తమకు సహకరించిందన్నారు. ఏమైనా సమస్యలు ఉంటే  ఇంటర్ బోర్డు దృష్టికి  తీసుకురావాలని  ఆయన సూచించారు.

సంబంధిత వార్తలు