ఆ ఆరుగురు ఎవరో: కాంగ్రెస్ పార్టీ జాబితా విడుదలలో ఉత్కంఠ

 కాంగ్రెస్‌ పార్టీ మరో ఆరు స్థానాలకు అభ్యర్థులను  ఆదివారం నాడు ప్రకటించే అవకాశం ఉంది.

హైదరాబాద్: కాంగ్రెస్‌ పార్టీ మరో ఆరు స్థానాలకు అభ్యర్థులను  ఆదివారం నాడు ప్రకటించే అవకాశం ఉంది. కాంగ్రెస్ పార్టీ అగ్రనేతల  మధ్య సమన్వయం కుదరని కారణంగా ఈ సీట్ల జాబితాను ప్రకటించలేదు.

 ఉమ్మడి మహాబూబ్‌నగర్ జిల్లాలోని  నారాయణపేట, దేవరకద్ర, ఉమ్మడి మెదక్ జిల్లాలోని నారాయణఖేడ్, ఉమ్మడి కరీంనగర్ జిల్లాలోని కోరుట్ల,హూజూరాబాద్, ఉమ్మడి నల్గొండ జిల్లాలోని మిర్యాలగూడ అసెంబ్లీ స్థానాలకు   పోటీ చేసే అభ్యర్థులను ప్రకటించలేదు.

ఉమ్మడి  మహాబూబ్‌నగర్‌ జిల్లాలోని నారాయణపేట, దేవరకద్ర అసెంబ్లీ సెగ్మెంట్లకు  ఇంకా అభ్యర్థులను ప్రకటించలేదు. కాంగ్రెస్ పార్టీ సీనియర్ నేత, మాజీ కేంద్ర మంత్రి జైపాల్ రెడ్డి, మాజీ మంత్రి డీకే అరుణ‌ల మధ్య ఏకాభిప్రాయం కుదరని కారణంగా  ఈ రెండు స్థానాలకు అభ్యర్థులను  ఖరారు చేయలేదు.

 ఉమ్మడి కరీంనగర్ జిల్లాలోని కోరుట్ల అసెంబ్లీ స్థానానికి  కొమిరెడ్డి రాములు, జువ్వాడి నర్సింగరావులు టికెట్టు  కోసం ప్రయత్నిస్తున్నారు. వీరిద్దరూ కూడ టికెట్టు విషయం వెనకడుగు వేయడం లేదు.  దీంతో ఎవరికి టికెట్టు కేటాయించాలనే విషయమై కాంగ్రెస్ పార్టీ నాయకత్వం మల్లాగుల్లాలు పడుతోంది.

ఇక ఉమ్మడి నల్గొండ జిల్లాలోని మిర్యాలగూడ అసెంబ్లీ స్థానాన్ని తన కొడుకు రఘువీర్ రెడ్డికి కేటాయించాలని మాజీ మంత్రి, సీనియర్ నేత జానారెడ్డి కోరుతున్నారు. అయితే పొత్తులో భాగంగా ఈ సీటు కోసం టీజేఎస్ పట్టుబడుతోంది. టీజేఎస్ ను కాంగ్రెస్ పార్టీ నాయకత్వం మిర్యాలగూడ కోసం ఒత్తిడి తెచ్చేందుకు ఢిల్లీలో జానారెడ్డి లాబీయింగ్ నిర్వహించారు. 

ఇదే జిల్లాలోని హుజూరాబాద్  అసెంబ్లీ స్థానం నుండి  కౌశిక్‌రెడ్డి  టికెట్టు ఆశిస్తున్నాడు. ఈ స్థానాన్ని  ఇంత వరకు కాంగ్రెస్ పార్టీ నాయకత్వం ఇంకా ఫైనల్ చేయలేదు. ఉమ్మడి మెదక్ జిల్లాలోని నారాయణఖేడ్ అసెంబ్లీ స్థానం నుండి  మాజీ ఎంపీ  సురేష్ షెట్కార్  టికెట్టు ఆశిస్తున్నాడు.  నామినేషన్లు దాఖలు చేసేందుకు  సోమవారం నాడు చివరి తేది కావడంతో ఈ ఆరు స్థానాల అభ్యర్థుల జాబితాను ప్రకటించనున్నారు.

సంబంధిత వార్తలు