బురారీ సామూహిక మరణాల కేసులో ట్విస్ట్

ఢిల్లీలోని బురారీలో గత జూలైలో ఒకే కుటుంబానికి చెందిన 11 మంది సామూహిక మరణాల సంఘటన తీవ్ర సంచలనం సృష్టించిన విషయం తెలిసిందే. తాజాగా ఈ ఘటనలో కొత్త విషయం  వెలుగు చూసింది.

న్యూఢిల్లీ: ఢిల్లీలోని బురారీలో గత జూలైలో ఒకే కుటుంబానికి చెందిన 11 మంది సామూహిక మరణాల సంఘటన తీవ్ర సంచలనం సృష్టించిన విషయం తెలిసిందే. తాజాగా ఈ ఘటనలో కొత్త విషయం  వెలుగు చూసింది. ఈ సంఘటనకు సంబంధించి మానసిక శాస్త్రవేత్తల అటాప్సీ రిపోర్టు వెలుగు చూసింది. 

ఈ రిపోర్టు ప్రకారం వారంతా ఆత్మహత్య చేసుకోలేదని, అనుష్టానం చేస్తున్న సందర్భంలో ఏదో దుర్ఘటన జరిగి  మరణించి ఉంటారని తేలింది. ఢిల్లీ పోలీసులు గతంలో దీనిపై సైకలాజికల్ అటాప్సీ చేయించాలని సీబిఐని కోరారు. దీంతో సీబీఐకి చెందిన సెంట్రల్ ఫోరెన్సిక్ సైన్స్ ల్యాబ‌రేట‌రీ దర్యాప్తులో భాగంగా మృతులకు సంబంధించిన డెయిరీల‌ను ప‌రిశీలించింది. 

స్నేహితుల, బంధువుల వాంగ్మూలాలను కూడా పరిగణనలోకి తీసుకున్నారు. వారు మోక్షం కోసం చేయాల్సిన కార్యక్రమాల గురించి త‌మ‌ డెయిరీల్లో రాసుకున్న అంశాల‌ను గుర్తించినట్లు సీబీఐ అధికారులు తెలిపారు. మృతుల్లో ఒక‌రైన ల‌లిత్ చందావ‌త్‌కు చ‌నిపోయిన త‌న తండ్రి నుంచి ఆదేశాలు వ‌చ్చేవ‌ని నమ్మి అత‌ని ఆదేశాలు కుటుంబ‌స‌భ్యులు పాటించేవార‌ని తెలుస్తోంది. దీనిలో బాగంగా కుటుంబ‌స‌భ్యులు ఇంట్లో ఓ వేడుక‌ను నిర్వహించారు. 

దాని కోస‌మే వాళ్ల త‌మ చేతులు, కాళ్లను క‌ట్టుకున్నార‌ని, ముఖాన్ని వస్త్రంతో క‌ప్పేసుకున్నార‌ని సీబీఐ అధికారులు చెప్పారు. ల‌లిత్ చందావ‌త్ ఇంట్లో మొత్తం 10 మంది ఇంటి సీలింగ్‌కు ఉరి వేసుకుని మ‌ర‌ణించ‌గా, ఆయ‌న త‌ల్లి 77 ఏళ్ల నార‌య‌ణ దేవి మాత్రం ఓ గదిలో నిర్జీవంగా ప‌డి ఉన్న విషయాన్ని పోలీసులు కనుగొని దర్యాప్తు సాగించారు.

ఈ వార్తాకథనాలు చదవండి