Trade war: యుద్ధానికి అర్థం మారిందా.? దేశాల మధ్య ట్రేడ్ వార్ జరగనుందా? భారత్పై దీని ప్రభావం ఏంటి?
ఏమంటూ డొనాల్డ్ ట్రంప్ అమెరికా అధ్యక్షుడిగా బాధ్యతలు స్వీకరించాడో ఆ రోజు నుంచి ఏదో ఒక వివాదం చెలరేగుతూనే ఉంది. మొన్నటి వరకు అమెరికాలో అక్రమంగా ఉంటున్న వారిని తిరిగి పంపించే పని పెట్టుకున్న ట్రంప్ ఇప్పుడు టారిఫ్ల రచ్చకు తెర తీశాడు. ప్రపంచ దేశాలపై ఎడాపెడా సుంకాలను పెంచేశాడు. ప్రతీకార సుంకం పేరుతో ప్రపంచంపై బాంబు పెల్చేశాడు. దీంతో ప్రపంచ దేశాల స్టాక్ మార్కెట్లు కుప్పకూలిపోయాయి. ఈ తరుణంలో ప్రపంచ దేశాల నడుమ ట్రేడ్ వార్ జరగనుందా.? అన్న ప్రశ్న వస్తోంది. ట్రంప్ దెబ్బకు ఏం జరగనుంది.? ఇప్పుడు తెలుసుకుందాం..
సూటిగా... స్పష్టంగా... క్లుప్తంగా .. ఆర్థిక విషయాలు చాలామందికి అర్థం కాని పజిల్స్ . దీనితో మసి పూసి మారేడు కాయ చేసేవారు ఎక్కువ ! ఇదిగో మీ క్లారిటీ కోసం ! ట్రేడ్ వార్ జరుగనుందా? నలబై ఏళ్ళ క్రితం అమెరికా వాడు శాసించాడు, ప్రపంచం పాటించింది . ప్రపంచ బ్యాంకు , ఇంటర్నేషనల్ మానిటరీ ఫండ్ , వరల్డ్ ట్రేడ్ ఆర్గనైజషన్ , గాట్.. ఇలా ఎన్నో పద్ధతులు ద్వారా ప్రపంచ దేశాలను శాసించాడు, నిర్బంధించాడు. అప్పటిదాకా దేశాలు.. రక్షిత విధానాలు అనుసరించేవి . తమ అవసరాలను దేశీయంగా తీర్చుకొనేవి . అమెరికా వాడి చలవ వల్ల ఆర్థిక పగ్గాలను ఎత్తేశాయి. దీనితో ప్రపంచ ఆర్థిక వ్యవస్థ సాధ్యమయ్యింది .
ముందుగా ఒక మాట. దీని వల్ల ఓవర్ అల్ గా మన దేశానికి లాభం కలిగిన మాట వాస్తవం. సంపద పెరిగింది, సంక్షేమ కార్యక్రమాలు సాధ్యమయ్యాయి. అమెరికా వాడిది మాజీ జమీందార్ స్థితి . పని చేసేవాళ్ళు తక్కువ . సంపద కంటే ఖర్చులు ఎక్కువ. దీనితో చైనా లాంటి దేశాల నుంచి దిగుమతులు ఎక్కువయ్యాయి. అమెరికా వాడి అప్పులు పెరిగాయి . ఒక్క మాటలో చెప్పాలంటే అమెరికా ఆర్థిక వ్యవస్థ ఆసుపత్రిలో చేరింది. ఒక ఊళ్లో" గతం ఘనం వర్తమానం బిన్నం" టైపు మాజీ జమీందార్.. అప్పులు తెచ్చి బతుకుతున్నాడు. పాత అప్పులు కొత్త అప్పులతో తీరుస్తున్నాడు. తిరుపతిలో ఆ మధ్య చాల మంది రొటేషన్ కింగులు దివాళా తీసి ఐపి పెట్టేశారు. అమెరికా వాడి స్థితి కూడా ఇదే. న్యూ యార్క్ లో వాడి విదేశీ అప్పు గడియారం నిరంతరాయంగా పరుగెడుతుటుంది .
ట్రంప్ వ్యాపారస్తుడు, జరగబోయేది తెలుసు. దీంతో తేనే తుట్ ను కదిలించాడు. ఇతర దేశాల దిగుమతులపై పై టారిఫ్ పెంచాడు . చైనా నుంచి దిగుమతి చేసుకొనే ఉత్పత్తుల పై ఏకంగా 100 శాతం అంటున్నాడు. అంటే ఒక ఆపిల్ ఫోన్ అనుకొందాము . దాని రేట్ లక్ష అయితే , ఇప్పుడు రూ. 2 లక్షలు అయినా ఆశ్చర్యపోవాల్సిన అవసరం లేదు. ఇది చిలికి చిలికి గల వాన అవుతుందా ? అవును అని ఖచ్చితంగా చెప్పలేము . అవకాశాలు ఉన్నాయి. అప్పుడు అన్ని దేశాలు ఇలా దిగుమతులపై టాక్స్ లు పెంచుతాయి . అప్పుడేమవుతుంది ? ఒక్క మాటలో చెప్పాలంటే దేశం 1990 ముందు రోజులకు వెళ్లి పోతుంది. అప్పుడెలా ఉంటుంది ? ఈ నలబై సంవత్సరాల్లో ఆర్థిక సంస్కరణలు , ప్రపంచీకరణ ఎవరిని ఎలా ప్రభావితం చేసింది ? ఇప్పుడు దానికి రివర్స్ జరుగుతుంది . ముందుగా ఒక మాట . మీకు విషయం స్థూలంగా అర్థం కావడానికి బాగా సింప్లీఫై చేస్తున్నా. నేను కింద చెప్పిన ప్రతి పాయింట్ కు మినహాయింపులు ఉంటాయి అని గమనించగలరు .