నాలుగు రోజులు ఆస్పత్రిలో ఉంటే...కోడెలను బాబు పలకరించలేదు: అంబటి

ఆగస్టు 23న కోడెల గుండెపోటుతో ఆసుపత్రిలో చేరారని .. అయితే అది ఆత్మహత్యాయత్నమేనని అంబటి ఆరోపించారు. ఆ సమయంలో చంద్రబాబు కనీసం ఒక్కసారి కూడా శివప్రసాద్‌ను పరామర్శించలేదని ఆయన ఎద్దేవా చేశారు.

కోడెల మరణాన్ని వైసీపీ ప్రభుత్వంపై రుద్ది, రాజకీయ లబ్ధిని పొందాలని చంద్రబాబు నాయుడు ప్రయత్నిస్తున్నారని ఆరోపించారు వైసీపీ ఎమ్మెల్యే అంబటి రాంబాబు.

మంగళవారం తాడేపల్లిలో మీడియాతో మాట్లాడిన ఆయన.. కోడెల మరణించిన నాటి నుంచి బాబు నాలుగు సార్లు మీడియా ముందుకు వచ్చారని ఎద్దేవా చేశారు. సోమవారం అర్ధరాత్రి సమయంలోనూ మీడియా సమావేశం పెట్టి చెప్పిన విషయాలే మళ్లీ మళ్లీ చెబుతున్నారని రాంబాబు మండిపడ్డారు.

రాజకీయ ప్రత్యర్థులుగా కోడెల మరణం తనను ఎంతో కలచివేసిందన్నారు. ఎన్నో రాజకీయ వివాదాలను ఎదుర్కొని, చివరికి సీబీఐ విచారణకు సైతం ఎదురొడ్డి నిలిచిన కోడెల ఎప్పుడూ బెదరలేదని అంబటి గుర్తుచేశారు.

ఎంతో దూకుడుగా ఉండే శివప్రసాద్ ఆత్మహత్య చేసుకున్నారంటూ ఆశ్చర్యంగా ఉందని.. అందుకు దారి తీసిన పరిస్థితులు ఏంటన్న దానిపై చర్చ జరగాలని రాంబాబు డిమాండ్ చేశారు.

కోడెల కుటుంబంపై కే ట్యాక్స్ కేసులు పెట్టింది తెలుగుదేశం నేతలేనని అంబటి ఆరోపించారు. కోడెల ఆత్మహత్యకు ఆయన కుటుంబసభ్యులతో పాటు టీడీపీయే కారణమన్నారు. ఇన్ని కేసులు ఆయనపై పెడితే ఏ ఒక్క తెలుగుదేశం పార్టీ నేత సైతం ఎందుకు మాట్లాడలేదని అంబటి ప్రశ్నించారు.

23 మంది వైసీపీ ఎమ్మెల్యేలను టీడీపీలోకి లాగినప్పుడు కానీ, వారిలో నలుగురికి మంత్రి పదవులు ఇచ్చినప్పుడు కూడా చంద్రబాబు పక్షానే కోడెల పనిచేశారని రాంబాబు గుర్తు చేశారు.

ఆగస్టు 23న కోడెల గుండెపోటుతో ఆసుపత్రిలో చేరారని .. అయితే అది ఆత్మహత్యాయత్నమేనని అంబటి ఆరోపించారు. ఆ సమయంలో చంద్రబాబు కనీసం ఒక్కసారి కూడా శివప్రసాద్‌ను పరామర్శించలేదని ఆయన ఎద్దేవా చేశారు.

ఆసుపత్రికి రావాలని జీవీ ఆంజనేయులు, మరో మాజీ మంత్రి కోరితే.. టీడీపీ అధినేత రానని చెప్పారని రాంబాబు తెలిపారు. దీంతో తీవ్ర మానసిక క్షోభకు గురైన కోడెల శివప్రసాదరావు ఆత్మహత్యకు పాల్పడ్డారని అంబటి పేర్కొన్నారు.

సత్తెనపల్లిలో రాయపాటి రంగబాబుని ప్రోత్సహించి కోడెలను అణచివేయాలని చంద్రబాబు ఎత్తుగడ వేశారని అంబటి రాంబాబు ఆరోపించారు.