అరకు ఘటన: కిడారి కోసం ఆ భవనంలోనే, ఆ రోజు ఇలా....

అరకు నియోజకవర్గ పరిధిలో ఎమ్మెల్యే కిడారి సర్వేశ్వరరావు, మాజీ ఎమ్మెల్యే సోమల కోసం లివిటిపుట్టు గ్రామంలో నిర్మాణంలో ఉన్న భవనంలో సాయుధులైన  మావోయిస్టులు ఎదురుచూసినట్టుగా పోలీసులు గుర్తించారు. 

అరకు:అరకు నియోజకవర్గ పరిధిలో ఎమ్మెల్యే కిడారి సర్వేశ్వరరావు, మాజీ ఎమ్మెల్యే సోమల కోసం లివిటిపుట్టు గ్రామంలో నిర్మాణంలో ఉన్న భవనంలో సాయుధులైన  మావోయిస్టులు ఎదురుచూసినట్టుగా పోలీసులు గుర్తించారు. ఎమ్మెల్యే వాహనశ్రేణిని గుర్తించి రోడ్డుకు పక్కగా ఉన్న చెట్ల పొదల నుండి ఒక్కసారిగా రోడ్డుపైకి వచ్చి తుపాకులను గురిపెట్టారని పోలీసులు అనుమానిస్తున్నారు.

డుబ్రిగుంట మండలం కూండ్రం పంచాయితీ పరిధిలోని సర్రాయి గ్రామంలో గ్రామ వికాసం కార్యక్రమంలో పాల్గొనాలని ఎమ్మెల్యే  సర్వేశ్వరరావును ఆ గ్రామానికి చెందిన కార్యకర్తలు కోరారు. వారం రోజుల క్రితమే ఈ కార్యక్రమం ఖరారైంది.

ఈ విషయం మావోలకు  చేరింది. దీంతో  ఎమ్మెల్యే సర్వేశ్వరరావు కోసం  మావోలు ఎదురుచూసినట్టుగా  పోలీసులు అభిప్రాయపడుతున్నారు.  లివిటిపుట్టులో 30 కుటుంబాల్లో 200 మంది నివశిస్తున్నారు. గ్రామస్తుల్లో చాలామంది క్రైస్తవులు. వీరిలో కొంతమంది ప్రతి ఆదివారం ఉదయం సమీపంలోని భల్లుగూడ, స్వర్ణాయిగూడ, కొరంజుగూడల్లో ప్రార్థనలకు వెళ్లి సాయంత్రానికి తిరిగివస్తారు. మిగిలిన వారు పశువుల పెంపకం, వ్యవసాయ పనులు, అటవీ పనులకు వెళ్తారు.

ఎమ్మెల్యే, మాజీ ఎమ్మెల్యేల హత్య జరిగిన రోజు కూడ  గ్రామంలో ఎక్కువమంది చర్చిలకు వెళ్లారు.దీంతో గ్రామ మధ్యలోనే నిర్మాణంలో ఉన్న భవనంలో మావోయిస్టులు సమావేశమయ్యారు. ఎమ్మెల్యే వాహనం కోసం ఎదురుచూశారు.ఈ భవనంలో కూర్చొని చూస్తే రోడ్డుపై వెళ్లే వాహనాలు కూడ  కన్పిస్తాయి.

అంతేకాదు సుమారు అరకిలోమీటరు దూరం నుండి వాహనాలు వచ్చే విషయాన్ని కూడ సులువుగా గుర్తించే వెసులుబాటు కూడ ఉంది. దీంతో ఈ భవనాన్ని మావోలు అనువుగా ఎంచుకొన్నారు. అంతేకాదు  ఈ ప్రాంతం మావోల సంచారం లేదని పోలీసులు చెబుతుండేవారు. దీంతో ఈ ప్రాంతమైతే  పోలీసులు కూడ ఎక్కువగా దృష్టి ఉండదని మావోలు భావించి ఉంటారనే అభిప్రాయాలు కూడ లేకపోలేదు.

సంబంధిత వార్తలు