కోడెల సూసైడ్, సీఎం జగన్ పై చంద్రబాబు సంచలన వ్యాఖ్యలు

కోడెల తప్పు చేసి చనిపోలేదని వేధింపులకు గురై చనిపోయారని ఆరోపించారు. కోడెల ఆత్మహత్య ప్రభుత్వ హత్య అంటూ మండిపడ్డారు. కోడెల ఆత్మహత్యపై సీబీఐ విచారణ జరిపించాలని చంద్రబాబు డిమాండ్ చేశారు. 

గుంటూరు: ఆంధ్రప్రదేశ్ ముఖ్యమంత్రి వైయస్ జగన్మోహన్ రెడ్డిపై తీవ్ర వ్యాఖ్యలు చేశారు మాజీ సీఎం, టీడీపీ అధినేత చంద్రబాబు నాయుడు. కోట్లాది రూపాయలు దోచుకుని ప్రతీ శుక్రవారం కోర్టుకు వెళ్లే వ్యక్తి లక్ష రూపాయలు విలువ చేసే ఫర్నీచర్ పై కేసులు పెట్టడం శోచనీయమంటూ మండిపడ్డారు.

రూ.43వేల కోట్లు దోచుకున్నారని సీబీఐ అభియోగాలున్న వ్యక్తి,11 చార్జిషీట్లలో ముద్దాయి, ప్రతి శుక్రవారం కోర్టుకు హాజరు కావాల్సిన వ్యక్తి... కేవలం రూ.లక్ష, రెండు లక్షలు విలువైన ఫర్నిచర్‌ విషయంలో కోడెల శివప్రసాదరావుపై కేసులు పెట్టడం, ఆయనపై అవినీతి ఆరోపణలు చేయడం దారుణమన్నారు.

పల్నాటి పులి అని పిలువబడ్డ ఒక సీనియర్ రాజకీయ నేతకే ఇలాంటి పరిస్థితి తెచ్చారంటే ఇలాంటి ఉన్మాదంతో కూడుకున్న పాలనలో రాష్ట్రం పరిస్థితి ఏంటని నిలదీశారు. ఎంతమందిని చంపుకుంటూ పోతారు అంటూ ఆగ్రహం వ్యక్తం చేశారు. 

కోడెల తప్పు చేసి చనిపోలేదని వేధింపులకు గురై చనిపోయారని ఆరోపించారు. కోడెల ఆత్మహత్య ప్రభుత్వ హత్య అంటూ మండిపడ్డారు. కోడెల ఆత్మహత్యపై సీబీఐ విచారణ జరిపించాలని చంద్రబాబు డిమాండ్ చేశారు. 

కోడెల శివప్రసాదరావు మృతదేహాన్ని కడసారి చూసేందుకు కూడా ప్రభుత్వం అవకాశం ఇవ్వడం లేదని చంద్రబాబు ఆరోపించారు. ప్రభుత్వ లాంఛనాలతో అంత్యక్రియలు అంటూనే 144 సెక్షన్ ఎందుకు పెట్టారని నిలదీశారు. అలాగే సెక్షన్ 30 అమలు చేస్తున్నారంటూ మండిపడ్డారు.  

ఒకవైపు కోడెల అంత్యక్రియలపై ఆంక్షలు పెట్టి, మరోవైపు ప్రభుత్వ లాంఛనాలతో అంత్యక్రియలు అనడం దుర్మార్గమన్నారు. ఇదంతా తమ దుశ్చర్యలను కప్పిపుచ్చుకోడానికే ప్రభుత్వం చేస్తున్న కుట్ర అంటూ నిలదీశారు. 

వైసీపీ ప్రభుత్వం, వైసీపీ నేతలు ఎన్ని నాటకాలు వేసినా, ఎన్ని అసత్య ప్రచారాలు చేసినా ప్రజలకు ఈ ప్రభుత్వ నిజస్వరూపం తెలిసిందంటూ ట్విట్టర్ వేదికగా తీవ్ర విమర్శలు చేశారు చంద్రబాబు నాయుడు. 

ఈ వార్తలు కూడా చదవండి