హుజూర్‌నగర్ ఉప ఎన్నికలు: సీపీఐ మద్దతు కోరిన కాంగ్రెస్

హుజూర్‌నగర్ అసెంబ్లీ స్థానానికి జరిగే ఉప ఎన్నికల్లో  మద్దతు కోసం  సీపీఐ నేతలను కాంగ్రెస్ పార్టీ నేతలు కోరారు. 

హుజూర్‌నగర్ అసెంబ్లీ స్థానంలో సీపీఐ మద్దతు కోసం అధికార, విపక్ష పార్టీలు ప్రయత్నాలను ప్రారంభించాయి. తమకు మద్దతివ్వాలని టీఆర్ఎస్ నేతలు కోరిన మీదట కాంగ్రెస్ నేతలు కూడ సీపీఐ నేతల మద్దతు కోసం ప్రయత్నాలను ప్రారంభించారు.

హుజూర్‌నగర్ ఉపఎన్నిక: కాంగ్రెస్‌కు ఓటేస్తే టీఆర్ఎస్‌కి వేసినట్లే.. లక్ష్మణ్ వ్యాఖ్యలు...హుజూర్‌నగర్: హుజూర్‌నగర్ అసెంబ్లీ ఉప ఎన్నికల్లో మద్దతివ్వాలని సీపీఐ నేతలను కాంగ్రెస్ పార్టీ నేతలు కోరారు. సోమవారం నాడు కాంగ్రెస్ పార్టీ ప్రతినిధి బృందం మగ్దూం భవనంలో భేటీ అయ్యారు.

ఈ ఏడాది అక్టోబర్ 21వ తేదీన హుజూర్‌నగర్ అసెంబ్లీ స్థానానికి జరిగే ఉప ఎన్నికల్లో తమ పార్టీకి మద్దతు ఇవ్వాలని కాంగ్రెస్ పార్టీ ప్రతినిధులు సీపీఐ నేతలను కోరారు.

సోమవారం నాడు పీసీసీ కోశాధికారి గూడూరు నారాయణరెడ్డి నేతృత్వంలో ఆ పార్టీ నేతలు కొండా విశ్వేశ్వర్ రెడ్డి, కోదంరెడ్డి, ప్రసాద్ తదితరులు సీపీఐ రాష్ట్ర సమితి కార్యదర్శి చాడ వెంకట్ రెడ్డితో భేటీ అయ్యారు. హుజూర్‌నగర్ అసెంబ్లీ ఎన్నికల్లో తమ పార్టీకి మద్దతు ఇవ్వాలని కోరారు. 

అయితే అక్టోబర్ 1వ తేదీన సీపీఐ రాష్ట్ర కార్యవర్గ సమావేశం ఏర్పాటు చేశామని,ఈ సమావేశంలో తమ నిర్ణయాన్ని ప్రకటించనున్నట్టుగా సీపీఐ రాష్ట్ర కార్యదర్శి చాడ వెంకట్ రెడ్డి కాంగ్రెస్ నేతలకు సూచించారు.