మూడేళ్ల కూతురిని కాపాడేందుకు చిరుతపులితోనే పోరాడిన దంపతులు.. ఎక్కడంటే ?

ఉత్తరప్రదేశ్ కు చెందిన ఓ జంట తమ కూతురును కాపాడేందుకు ఏకంగా చిరుత పులితోనే పోరాడారు. తల్లిదండ్రుల దాడికి తట్టుకోలేని ఆ పులి చిన్నారిని అక్కడే వదిలేసి అడవిలోకి పారిపోయింది. 

leopard

తమ మూడేళ్ల కూతురును కాపాడేందుకు దంపతులు ఓ చిరుత పులితోనే పోరాడారు. చివరికి విజయం సాధించారు. గాయాలపాలైన బాలికను హాస్పిటల్ కు తరలించారు. ఈ ఘటన ఉత్తరప్రదేశ్ లో జరిగింది. వివరాలు ఇలా ఉన్నాయి. బిజ్నోర్ జిల్లాకు చెందిన మదన్ సింగ్ (30), అతడి భార్య సునీతాదేవి (27) వ్యవసాయ పొలంలో పనిచేస్తున్నారు. ఈ సమయంలో ఆ పొలానికి సమీపంలోనే వారి మూడేళ్ల కూతురు గాయత్రి ఆడుకుంటోంది.

అయితే అదే సమయంలో ఆ చిరుత కూతురుపై దాడి చేసింది. దీంతో ఆ చిన్నారి గుక్కపెట్టి ఏడ్చింది. పాప ఏడుపు విన్న తల్లిదండ్రులు వేగంగా అటు వైపు పరుగెత్తుకొచ్చారు. ఆ సమయంలో చిరుత పులి గాయత్రిని లాక్కెళుతోంది. దీనిని గమనించిన ఆ దంపతులు పులి వెంటపడ్డారు.

తండ్రి పులిని పట్టుకొని దాడి చేయడం ప్రారంభించారు. బాలిక తల్లి గట్టిగా అరుస్తూ, కేకలు పెట్టింది. దీంతో ఆ క్రూర జంతువు భయపడింది. బాలికను అక్కడే వదిలేసి పారిపోయింది. అయితే చిరుత దాడిలో బాలికకు గాయాలు అయ్యాయి. తల్లిదండ్రులు ఆ బాలికను వెంటనే చికిత్స కోసం హాస్పిటల్ కు తరలించారు. 

కాగా.. ఆ ప్రాంతంలో పులుల సంచారం ఎక్కువగా ఉండటంతో పొలాల్లోకి ఒంటరిగా వెళ్లొద్దని బిజ్నోర్ డివిజనల్ ఫారెస్ట్ ఆఫీసర్ ఏకే సింగ్ ప్రజలకు విజ్ఞప్తి చేశారని ‘టైమ్స్ ఆఫ్ ఇండియా’ నివేదించింది. ఇటీవలి కాలంలో చిరుత దాడులు జరిగిన సున్నితమైన ప్రాంతాల్లో బోనులు ఏర్పాటు చేశామని తెలిపారు. పులిని పట్టుకునేందుకు పదకొండు బృందాలను ఏర్పాటు చేశామని చెప్పారు.

ఇదిలా ఉండగా.. ఉత్తరప్రదేశ్ లో ఇలాంటి పులి దాడి ఘటనలు జరగడం ఇదే తొలిసారి కాదు. గత నెలలో అఫ్జల్ గఢ్ ప్రాంతంలో ఓ పులి దాడి చేయడంతో ఇద్దరు మైనర్ చిన్నారులు సహా నలుగురు మరణించారు.