G20 Summit 2023 : ఇప్పటి వరకు భారత్‌కు చేరుకున్న దేశాధినేతలు, అతిథులు వీరే (వీడియో)
దేశ రాజధాని ఢిల్లీ వేదికగా జీ20 సమావేశాలు ప్రారంభంకానున్నాయి. అతిథులు ఒక్కొక్కరిగా భారత్‌కు చేరుకుంటున్నారు. ఇప్పటి వరకు ఢిల్లీకి చేరుకున్న అతిథులకు సంబంధించి కేంద్ర మంత్రి అనురాగ్ ఠాకూర్ కార్యాలయం ట్విట్టర్ ద్వారా ఓ వీడియోను పంచుకుంది.
మరికొద్దిగంటల్లో దేశ రాజధాని ఢిల్లీ వేదికగా జీ20 సమావేశాలు ప్రారంభంకానున్నాయి. అతిథులు ఒక్కొక్కరిగా భారత్‌కు చేరుకుంటున్నారు. వీరంతా ఢిల్లీలోని ప్రముఖ ఫైవ్ స్టార్ హోటళ్లలో బస చేస్తున్నారు. జీ20 సమ్మిట్ నేపథ్యంలో దేశ రాజధాని శత్రు దుర్బేద్ధ్యంగా మారిపోయింది. సాయుధ బలగాలు డేగ కళ్లతో పహారా కాస్తున్నాయి. ఇదిలావుండగా ఇప్పటి వరకు ఢిల్లీకి చేరుకున్న అతిథులకు సంబంధించి కేంద్ర మంత్రి అనురాగ్ ఠాకూర్ కార్యాలయం ట్విట్టర్ ద్వారా ఓ వీడియోను పంచుకుంది. ఈ వీడియో సోషల్ మీడియాలో వైరల్ అవుతోంది.
సదరు వీడియోలో ఇప్పటి వరకు భారత్‌కు చేరుకున్న దేశాధినేతలు, వారికి చేసిన స్వాగత ఏర్పాట్లను తెలియజేశారు. వారు ఎవరెవరంటే.. జియోర్జియా మెలోని (ఇటలీ ప్రధాని ) , అల్బార్టో ఫెర్నాండెజ్ (అర్జంటీనా అధ్యక్షుడు), అజలీ అస్సౌమని (ఆఫ్రికన్ యూనియన్ ఛైర్‌పర్సన్), ఉర్సులా వొన్‌దేర్ లియాన్ (యూరోపియన్ కమీషన్ ప్రెసిడెంట్), క్రిస్టాలినా జియోర్జివా (ఐఎంఎఫ్ చీఫ్), ఛార్లెస్ మిచెల్ (యూరోపియన్ కౌన్సిల్ ప్రెసిడెంట్), నోజీ ఓకాంజో అయీలా (డబ్ల్యూటీవో డైరెక్టర్ జనరల్), రఖాయిల్ సాంచెజ్ (మెక్సికో ఆర్ధిక మంత్రి), మథియాస్ కార్మాన్ (ఓఈసీడీ సెక్రటరీ జనరల్)
కాగా.. మరికొన్ని గంటల్లో జీ20 సమావేశాలు ప్రారంభం కానున్న వేళ ప్రధాని నరేంద్ర మోదీ ఎక్స్(ట్విట్టర్) వేదికగా ఓ సందేశాన్ని పోస్టు చేశారు. న్యూఢిల్లీలోని ఐకానిక్ భారత్ మండపంలో 2023 సెప్టెంబర్ 9,10 తేదీల్లో 18వ జీ20 సదస్సుకు ఆతిథ్యం ఇవ్వడం పట్ల భారతదేశం సంతోషంగా ఉందని తెలిపారు. జీ20 సదస్సు భారత్‌లో జరగడం ఇదే తొలిసారి అని పేర్కొన్నారు. రాబోయే రెండు రోజుల్లో ప్రపంచ నాయకులతో ఉత్పాదక చర్చల కోసం తాను ఎదురుచూస్తున్నానని తెలిపారు.
న్యూఢిల్లీ జీ20 సదస్సు మానవ-కేంద్రీకృత, సమ్మిళిత అభివృద్ధిలో కొత్త మార్గాన్ని నిర్దేశిస్తుందని తన గట్టి నమ్మకం అని ప్రధాని మోదీ పేర్కొన్నారు. ‘‘మన సాంస్కృతిక నైతికతతో పాతుకుపోయిన భారతదేశం జీ20 ప్రెసిడెన్సీ థీమ్ 'వసుధైవ కుటుంబం - ఒక భూమి, ఒక కుటుంబం, ఒక భవిష్యత్తు'.. ప్రపంచం మొత్తం ఒకే కుటుంబం అనే మన ప్రపంచ దృష్టికోణంతో లోతుగా ప్రతిధ్వనిస్తుంది. భారతదేశం జీ20 ప్రెసిడెన్సీ అందరినీ కలుపుకొని, ప్రతిష్టాత్మకంగా, నిర్ణయాత్మకంగా, కార్యాచరణ-ఆధారితంగా ఉంది. మేము గ్లోబల్ సౌత్ అభివృద్ధి ఆందోళనలను చురుకుగా వినిపించాము’’ అని ప్రధాని మోదీ పేర్కొన్నారు.
భారతదేశం కూడా మానవ-కేంద్రీకృతమైన పురోగతికి గొప్ప ప్రాధాన్యతనిస్తుందని మోదీ తెలిపారు. నిరుపేదలకు, క్యూలో ఉన్న చివరి వ్యక్తికి సేవ చేయాలనే గాంధీజీ లక్ష్యాన్ని అనుకరించడం చాలా ముఖ్యమని చెప్పారు. జీ20 సదస్సు సందర్భంగా తాను ప్రపంచ సమాజానికి సంబంధించిన అనేక ప్రధాన అంశాలను కవర్ చేస్తూ ‘ఒక భూమి’, ‘ఒక కుటుంబం’, ‘ఒక భవిష్యత్తు’ సెషన్‌లకు అధ్యక్షత వహించనున్నట్టుగా వెల్లడించారు. బలమైన, స్థిరమైన, కలుపుకొనిపోవడం, సమతుల్య వృద్ధిని పెంచడం వీటిలో ఉన్నాయి.
‘‘మేము ఎస్‌డీజీల పురోగతిని వేగవంతం చేయడానికి, సుస్థిర భవిష్యత్తు కోసం గ్రీన్ డెవలప్‌మెంట్ ఒడంబడికను, 21వ శతాబ్దానికి బహుపాక్షిక సంస్థలను బలోపేతం చేయడానికి ప్రయత్నిస్తున్నాము. సాంకేతిక పరివర్తన, డిజిటల్ పబ్లిక్ ఇన్‌ఫ్రాస్ట్రక్చర్ వంటి భవిష్యత్ రంగాలకు మేము అపారమైన ప్రాధాన్యతనిస్తాము. మేము మరింత లింగ సమానత్వం, మహిళా సాధికారత, ప్రపంచ శాంతిని నిర్ధారించడానికి సమిష్టిగా కృషి చేస్తాము.
స్నేహం, సహకారం యొక్క బంధాలను మరింతగా పెంపొందించుకోవడానికి నేను పలువురు నాయకులు, ప్రతినిధి బృందాల అధిపతులతో ద్వైపాక్షిక సమావేశాలను కూడా నిర్వహిస్తాను. మా అతిథులు భారతీయ ఆతిథ్యాన్ని ఆస్వాదిస్తారని నాకు నమ్మకం ఉంది. రాష్ట్రపతి సెప్టెంబర్ 9న విందు ఇవ్వనున్నారు. 10న రాజ్‌ఘాట్‌లో గాంధీజీ చిత్రపటానికి నేతలు నివాళులర్పిస్తారు. అదే రోజున ముగింపు వేడుకలో ఆరోగ్యకరమైన ‘వన్ ఎర్త్’ కోసం సుస్థిరమైన, సమానమైన ‘వన్ ఫ్యూచర్’, కలిసి ‘ఒక కుటుంబం’ లాగా ఉండటంపై జీ20 నాయకులు వారి సామూహిక దృష్టిని పంచుకుంటారు.’’ అని మోదీ తెలిపారు.
