ఫ్రిడ్జ్‌లో పండ్లు, కూరగాయలు పాడవకుండా ఎక్కువ రోజులు ఉండాలంటే ఇలా చేయండి

 చాలా మంది ఫ్రిజ్ లో పండ్లు, కూరగాయలతో పాటుగా పప్పులు, చింతపండు ఇలా ఎన్నింటితోనో నింపేస్తుంటారు. అయితే ఫ్రిజ్ లో పెట్టిన పండ్లు, కూరగాయలు పాడవకుండా ఎక్కువ రోజులు రావాలంటే ఏం చేయాలో ఇప్పుడు తెలుసుకుందాం పదండి. 

ఫ్రిడ్జ్ నిల్వ చిట్కాలు

ఇప్పుడు ప్రతి ఒక్కరి ఇంట్లో ఫ్రిజ్ ఖచ్చితంగా ఉంటుంది. ఫ్రిడ్జ్ కూడా అత్యవసర వస్తువుల్లో ఒకటిగా మారిపోయింది. ఫ్రిజ్ లో పండ్లు, కూరగాయలతో పాటుగా మిగిలిపోయిన అన్నం, కూరలు, చపాతీలను పెడుతుంటారు. 

అయితే చాలా మందికి ఫ్రిజ్ లో ఎక్కువ ఏ వస్తువులను పెట్టాలో మాత్రం తెలియదు. దీనివల్లే ఫ్రిజ్ లో ఉన్న పండ్లు, కూరగాయలు తొందరగా పాడవుతుంటాయి. కాబట్టి ఎక్కడ, ఎలా పెడితే పండ్లు, కూరగాయలు ఎక్కువ రోజులు నిల్వ ఉంటాయో ఇప్పుడు తెలుసుకుందాం పదండి. 

ఫ్రిజ్ లో వస్తువులను పెట్టే ముందు కాలాలను బట్టి జాగ్రత్తగా ఉండాలి. అలాగే ఫ్రీజర్‌లో ఐస్ ఎక్కువగా ఏర్పడితే ఫ్రిడ్జ్ మధ్యలో ఉన్న బటన్‌ను మర్చిపోకుండా నొక్కండి. దీనివల్ల ఐస్ ఏర్పడదు. అలాగే ఫ్రీజర్ తలుపు కూడా విరిగిపోదు.

ఇకపోతే పండ్లను, కూరగాయలను ఫ్రిజ్ లో పెట్టేటప్పుడు ప్లాస్టిక్ బ్యాగ్‌లను అస్సలు ఉపయోగించకండి. ఎందుకంటే వీటిలో పెడితే పండ్లు, కూరగాయలు తొందరగా పాడవుతాయి. ప్లాస్టిక్ బ్యాగులకు బదులుగా కాటన్ బ్యాగ్ లేదా మృదువైన కాటన్ గుడ్డలో పండ్లను, కూరగాయలను వేర్వేరుగా పెట్టి నిల్వ చేయండి. ఎందుకంటే కాటన్ తేమను పీల్చుకుంటుంది. దీంతో అవి ఎన్ని రోజులైనా పాడవకుండా ఉంటాయి. 

కొత్తిమీర, పచ్చిమిర్చి, కరివేపాకు ఎక్కువ రోజులు నిల్వ ఉండాలంటే వాటి కాడలను తీసివేసి కాటన్ బ్యాగ్‌లో ఉంచండి. అవి ఎక్కువ కాలం తాజాగా ఉంటాయి. వాసన కూడా మారవు. 

అల్లంలో మట్టి ఉంటే దాన్ని నీళ్లతో బాగా కడిగి అలాగే తెరిచి పెట్టండి. వీటిని మూసి ఉంచితే దానిపై ఫంగస్ ఏర్పడుతుంది.

కొబ్బరిని ఫ్రిడ్జ్‌లో అలాగే పెడితే పాడవుతుంది. కాబట్టి కొబ్బరిని తురిమి దాన్ని ఒక డబ్బాలో వేసి మూత పెట్టండి. దీనివల్ల వంట చేసేటప్పుడు అత్యవసర సమయాల్లో కూడా ఉపయోగించొచ్చు.

చీజ్, వెన్న వంటి పాల ఉత్పత్తులను అలాగే ఫ్రిడ్జ్‌లో పెట్టకూడదు. వీటిని అల్యూమినియం ఫాయిల్‌లో చుట్టి, ఒక డబ్బాలో వేయండి.

అలాగే ఇడ్లీ, దోశ పిండిని ఫ్రిడ్జ్‌లో ఉంచేటప్పుడు మూత లేకుండా ఉంచకండి. దానికి సంబంధించిన డబ్బాలో వేసి బాగా మూత పెట్టండి. ఫ్రిడ్జ్‌లో మిగిలిపోయిన ఆహారాన్ని ఉంచేటప్పుడు మూత పెట్టడం అలవాటు చేసుకోండి. దాన్ని మరుసటి రోజే ఉపయోగించేలా చేయండి.

ఇకపోతే పండ్లను  ఫ్రిడ్జ్‌లో ఉంచేటప్పుడు వాటిని మూసి ఉంచితే త్వరగా పాడవుతాయి. కాబట్టి వాటిని అలాగే గాలి ఆడేలా ఉంచండి. లేదా రంధ్రాలు ఉన్న డబ్బాలో అయినా వేయొచ్చు. 

మల్లెపూలు వంటి ఏ పువ్వులనైనా ఫ్రిడ్జ్‌లో ఉంచేటప్పుడు వాటిని అలాగే ఉంచకూడదు. వీటిని ఒక కవర్‌లో లేదా గాలి బయటకు పోకుండా ఉండే ఒక డబ్బాలో ఉంచండి. లేకపోతే వాటి నుండి వచ్చే వాసన ఫ్రిడ్జ్‌లోని అన్ని ఆహార పదార్థాలకు వ్యాపిస్తుంది.

ఫ్రిడ్జ్‌లో స్టీల్ పాత్రలను అసలే ఉంచకూడదు. ప్లాస్టిక్ డబ్బాలను పేర్చి ఉంచకండి.  ఫ్రిడ్జ్‌లో ఎక్కువ స్థలం ఉందని అనవసరమైన వస్తువులను అసలే పెట్టకూడదు. 

ఫ్రిడ్జ్ చుట్టూ తగినంత ఖాళీ స్థలం ఉండేలా చూసుకోండి. ముఖ్యంగా గాలి ఆడే ప్రదేశాల్లో ఫ్రిడ్జ్ ఉంచడం చాలా మంచిది.

ఫ్రిడ్జ్‌ని వారానికి ఒకసారైనా శుభ్రం  చేయడం అవసరం. అప్పుడే మీ ఫ్రిడ్జ్ చెడిపోకుండా ఎక్కువ కాలం బాగుంటుంది. అలాగే అందులో అనవసరమైనవి లేదా ఎక్కువ రోజులు ఉన్న వస్తువులు ఏమైనా ఉంటే వాటిని పారేయండి.

అలాగే ఫ్రిడ్జ్ వెనుక భాగంలో ఉన్న డబ్బాలోని నీళ్లను తరచుగా ఖాళీ చేసి శుభ్రం చేయండి. లేకపోతే అందులో దోమలు చేరతాయి. దీనివల్ల వ్యాధులు వ్యాపించే ప్రమాదం ఉంది.

నిమ్మకాయను ఒక డబ్బాలో వేసి ఫ్రిడ్జ్ మూలలో ఉంచితే మీ ఫ్రిడ్జ్ ఎల్లప్పుడూ వాసనగా ఉంటుంది.