ISRO : శాటిలైట్ కాదు దాన్ని మోసుకెళ్లిన రాకెట్ ఎందుకంత కీలకం.. ఏమిటీ LVM3 లాంచ్ వెహికిల్?

ISRO : అంతరిక్ష పరిశోధనలకు కేరాఫ్ అడ్రస్ గా మారింది ఇస్రో. అమెరికా వంటి అగ్రరాజ్యంలోని కంపెనీలు నాసాను కాదని ఇస్రోను ఆశ్రయిస్తున్నాయి. తాజాగా మరో అమెరికన్ శాటిలైట్ ప్రయోగాన్ని సక్సెస్ ఫుల్ గా పూర్తిచేసింది ఇస్రో. 

Image Credit : X/ISRO

ఇస్రో కు మరో సక్సెస్

Blue Bird Block-2 : ఇస్రో... గ్లోబల్ స్థాయిలో ఈ ఇండియన్ స్పేస్ ఏజెన్సీ పేరు గట్టిగా వినిపిస్తోంది. ఇప్పటికే ఎన్నో క్లిష్టమైన ప్రయోగాలను సక్సెస్ ఫుల్ గా పూర్తిచేసిన ఈ భారత అంతరిక్ష పరిశోధనా సంస్థ మరో అద్భుతం చేసింది. అగ్రరాజ్యం అమెరికాకు చెందిన ఓ భారీ ఉపగ్రహాన్ని ఇస్రో సక్సెస్ ఫుల్ గా నింగిలోకి పంపింది... ఇది కమర్షియల్ ప్రయోగమే అయినా అంతరిక్ష పరిశోదనల్లో దేశం ఏ స్థాయికి చేరుకుందో తెలియజేస్తోంది. అమెరికా కంపెనీ ఇస్రోకు తమ శాటిలైట్ బాధ్యతలు అప్పగించిందంటేనే ప్రపంచంలో మన సత్తా ఏంటో అర్థమవుతోంది.

Image Credit : X/ISRO

ఏమిటీ బాహుబలి రాకెట్?

భారత అంతరిక్ష పరిశోధన సంస్థ ఖాతాలో ఇప్పటికే అనేక విజయాలు ఉన్నాయి... ఇందులోకి మరోటి చేరింది. అమెరికన్ సంస్థకు చెందిన 'బ్లూ బర్డ్ బ్లాక్-2' శాటిలైన్ ను నింగిలోకి మోసుకెళ్లింది 'LVM3-M6' రాకెట్. అయితే ఈ శాటిలైట్ కంటే దీన్ని సక్సెస్ ఫుల్ గా కక్ష్యలోకి చేర్చిన రాకెటే మనకెంతో ప్రత్యేకం. ఎందుకంటే ఇది భవిష్యత్ ఇండియా చేపట్టే మానవసహిత 'చంద్రయాన్' యాత్రకు ఉపయోగించే రాకెట్. ఇప్పటికే ఈ రాకెట్ ద్వారానే ఇస్రో చంద్రయాన్-3 మిషన్ ను పూర్తిచేసింది.

Image Credit : X/ISRO

ఇస్రో ఇప్పటివరకు ఉపయోగించిన రాకెట్స్ ఇవే..

అంతరిక్ష పరిశోధనల్లో అమెరికా, రష్యా, చైనా వంటి అగ్రదేశాలతో పోటీ పడుతోంది భారత్. ఇస్రో చేపట్టిన ప్రతి ప్రయోగం సక్సెస్ అవుతోంది... ఈ విజయాల్లో అత్యంత కీలక పాత్ర పోషిస్తున్నాయి లాంచ్ వెహికిల్స్ (రాకెట్స్). ఇప్పటివరకు ఇస్రో అనేక లాంచ్ వెహికిల్స్ ఉపయోగించింది... ప్రస్తుతం అత్యాధునికి LMV3 ఉపయోగిస్తోంది.

మొదట PSLV (పోలార్ శాటిలైట్ లాంచ్ వెహికల్) ను అంతరిక్ష ప్రయోగాల కోసం ఉపయోగించేది ఇస్రో. ఆ తర్వాత మరింత అధునాతన GSLV (జియో సింక్రోనస్ శాటిలైట్ లాంచ్ వెహికల్) ను రూపొందించింది. ప్రస్తుతం ఈ GSLV రాకెట్ ను మరింత శక్తిమంతంగా మార్చి LVM3 ని తయారుచేశారు. ఇది భారతదేశపు అత్యంత శక్తిమంతమైన రాకెట్. దీన్ని తాజాగా 'బ్లూ బర్డ్ బ్లాక్-2' వంటి శాటిలైట్స్ ప్రయోగానికే కాదు చంద్రయాన్ వంటి ప్రతిష్ఠాత్మక ప్రయోగాలకు ఉపయోగిస్తోంది ఇస్రో.

Image Credit : X/ISRO

బ్లూ బర్డ్ బ్లాక్-2 శాటిలైట్ ప్రత్యేకతలివే..

అమెరికన్ సంస్థ AST Space Mobile కు చెందినదే ఈ 'బ్లూ బర్డ్ బ్లాక్-2' శాటిలైట్. దీన్ని ఆంధ్ర ప్రదేశ్ లోని సతీష్ ధావన్ అంతరిక్ష కేంద్రం (షార్) రెండో లాంచ్ ప్యాడ్ నుండి నింగిలోకి పంపించారు. ఏకంగా 6,100 కిలోల బరువును ఈ శాటిలైట్ ను బాహుబలి రాకెట్ గా పిలుచుకునే 'LVM3' మోసుకెళ్లింది. ఇంత భారీ శాటిలైట్ ను ఇస్రో మొదటిసారి ప్రయోగించింది... అందుకే బ్లూ బర్డ్ బ్లాక్-2 ప్రయోగంపై ఉత్కంఠ నెలకొంది. కానీ ఇస్రో సక్సెస్ ఫుల్ గా శాటిలైట్ ను కక్ష్యలోకి చేర్చి మరో అరుదైన ఘనత సాధించింది.

'బ్లూ బర్డ్ బ్లాక్-2' శాటిలైట్ మొబైల్స్ కి నేరుగా హై-స్పీడ్ సెల్యూలార్ బ్రాడ్ బ్యాండ్ సేవలను అందిస్తుంది. అంటే మొబైల్ నెట్ వర్క్ ఉండని కొండకోనలు, ఎడారి ప్రాంతాలు, సముద్రాల మధ్యలో, దట్టమైన అడవుల్లో కూడా ఈ శాటిలైట్ సేవల ద్వారా ఇంటర్నెట్, వాయిస్ కాల్స్, వీడియో కాల్స్ సేవలు అందుబాటులో ఉంటాయి. AST మొబైల్ కంపెనీ వివిధ మొబైల్ ఆపరేటర్లతో కలిసి ప్రపంచ నలుమూలల్లో ఇంటర్నెట్ సేవలను అందుబాటులోకి తీసుకువచ్చేందుకు ఆ శాటిలైట్ ను ప్రయోగించింది.

ఈ బ్లూ బర్డ్ బ్లాక్-2 శాటిలైట్ కక్ష్యలోకి చేరడం అమెరికన్ కంపెనీ సక్సెస్ అయితే... దీన్ని సక్సెస్ ఫుల్ గా LVM3 రాకెట్ మోసుకెళ్లడం మన విజయం. ఈ లాంచ్ వెహికిల్స్ నిప్పులుగక్కుతూ నింగిలోకి దూసుకెళుతుంటే భారతీయుల మనసులు ఉప్పొంగాయి. ఈ ప్రయోగం విజయవంతం కావడంతో ప్రధాని నరేంద్ర మోదీ ఇస్రోను అభినందించారు. అంతరిక్ష రంగంలో దేశం అందనంత ఎత్తుకు ఎదుగుతోందని... ఇది 'ఆత్మనిర్భర్ భారత్' కు నిదర్శనమని ప్రధాని పేర్కొన్నారు.

Image Credit : X@Blobifie

LVM3 ప్రయోగం సాగిందిలా...

యావత్ ప్రపంచం ఎంతో ఉత్కంఠగా ఎదురుచూస్తున్న 'LVM3' ప్రయోగానికి ఇవాళ (బుధవారం) ఉదయం కౌంట్ డౌన్ ప్రారంభయ్యింది. మొదట ఉదయం 8 గంటల 54 నిమిషాలకు 'బ్లూ బర్డ్ బ్లాక్-2' శాటిలైట్ తో 'LVM3' నింగిలోకి దూసుకెళ్లాలి. కానీ సాంకేతిక కారణాలతో 90 సెకన్లు ఆలస్యం అయ్యింది. ఈ సమయంలో అసలు ప్రయోగం జరుగుతుందా..? అనే ఆందోళన నెలకొంది.

అయితే సాంకేతిక సమస్యను సరిచేసి తిరిగి 8 గంటల 55 నిమిషాల 30 సెకన్లకు రాకెట్ ను ప్రయోగించారు. నిప్పులు కక్కుతూ నింగిలోకి దూసుకెళ్లిన రాకెట్ ఏకంగా 520 కిలోమీటర్ల ఎత్తులోకి శాటిలైట్ ను చేర్చింది. అనంతరం వ్యోమనౌక నుండి విడిపోయిన శాటిలైట్ కక్ష్యలోకి చేరింది.