Cooper Connolly : జీటీని దంచికొట్టిన పంజాబ్ కింగ్స్ సెన్సేషన్.. ఎవరీ కూపర్ కానోలీ?
Who is Cooper Connolly : ఐపీఎల్ అరంగేట్రంలోనే కూపర్ కానోలీ సంచలనం సృష్టించాడు. గుజరాత్ టైటాన్స్తో జరిగిన ఉత్కంఠ పోరులో 72 పరుగులతో అజేయంగా నిలిచి పంజాబ్ కింగ్స్కు అద్భుత విజయాన్ని అందించాడు.
ఐపీఎల్ అరంగేట్రంలోనే కూపర్ కానోలీ విధ్వంసం
ఐపీఎల్ 2026 సీజన్లో పంజాబ్ కింగ్స్ సరికొత్త సంచలనానికి తెరలేపింది. ముల్లన్పూర్లోని మహారాజ యాదవీంద్ర సింగ్ అంతర్జాతీయ క్రికెట్ స్టేడియంలో మంగళవారం జరిగిన ఉత్కంఠభరిత పోరులో గుజరాత్ టైటాన్స్ను పంజాబ్ కింగ్స్ 3 వికెట్ల తేడాతో ఓడించింది.
ఈ విజయంలో ఐపీఎల్ అరంగేట్రం ప్లేయర్, ఆస్ట్రేలియా యంగ్ ఆల్రౌండర్ కూపర్ కానోలీ కీలక పాత్ర పోషించాడు. 163 పరుగుల లక్ష్యంతో బరిలోకి దిగిన పంజాబ్, ఒకానొక సమయంలో వరుస వికెట్లు కోల్పోయి కష్టాల్లో పడినా, కానోలీ (44 బంతుల్లో 72 నాటౌట్) అజేయ పోరాటంతో జట్టును విజయతీరాలకు చేర్చాడు.
కష్టాల్లో పంజాబ్.. ఆదుకున్న కానోలీ
లక్ష్య ఛేదనలో పంజాబ్ కింగ్స్ ఆరంభంలోనే ప్రియాన్ష్ ఆర్య వికెట్ కోల్పోయింది. అయితే, మూడో స్థానంలో బ్యాటింగ్కు వచ్చిన కూపర్ కానోలీ, ఓపెనర్ ప్రభ్సిమ్రన్ సింగ్తో కలిసి రెండో వికెట్కు 76 పరుగుల విలువైన భాగస్వామ్యాన్ని నెలకొల్పాడు. ప్రభ్సిమ్రన్ (24 బంతుల్లో 37) ధాటిగా ఆడి అవుటైన తర్వాత పంజాబ్ బ్యాటింగ్ లైనప్ ఒక్కసారిగా కుప్పకూలింది.
83/1తో పటిష్టంగా ఉన్న జట్టు, ప్రసిద్ధ్ కృష్ణ ధాటికి 118 పరుగులకే 6 వికెట్లు కోల్పోయి పీకల్లోతు కష్టాల్లో పడింది. కెప్టెన్ శ్రేయస్ అయ్యర్, మార్కస్ స్టోయినిస్ వంటి స్టార్ ప్లేయర్లు విఫలమైనా, కానోలీ పట్టుదలతో క్రీజులో నిలబడ్డాడు. చివరలో జేవియర్ బార్ట్లెట్ సహకారంతో మరో 5 బంతులు మిగిలి ఉండగానే పంజాబ్ను గెలిపించాడు.
ఎవరీ కూపర్ కానోలీ?
ఆస్ట్రేలియాలోని పెర్త్లో జన్మించిన 22 ఏళ్ల కూపర్ కానోలీ ఎడమచేతి వాటం బ్యాటర్, స్పిన్ బౌలర్. 2022 అండర్-19 ప్రపంచకప్లో ఆస్ట్రేలియా జట్టుకు కెప్టెన్గా వ్యవహరించిన కానోలీకి బిగ్ మ్యాచ్లలో రాణించే అలవాటు ఉంది. బిగ్ బాష్ లీగ్ 2022-23 ఫైనల్లో కేవలం 11 బంతుల్లో 25 పరుగులు చేసి పెర్త్ స్కార్చర్స్ను విజేతగా నిలిపాడు. అలాగే తన ఫస్ట్ క్లాస్ అరంగేట్రంలోనే షెఫీల్డ్ షీల్డ్ ఫైనల్లో 90 పరుగులు చేసి సత్తా చాటాడు. ఇప్పటికే ఆస్ట్రేలియా తరపున టెస్టులు, వన్డేలు, టీ20లు ఆడిన ఇతడిని ఈ వేలంలో పంజాబ్ కింగ్స్ రూ. 3 కోట్లకు సొంతం చేసుకుంది.
చాహల్ స్పిన్ మ్యాజిక్.. గుజరాత్ షాక్
అంతకుముందు టాస్ ఓడి మొదట బ్యాటింగ్ చేసిన గుజరాత్ టైటాన్స్ నిర్ణీత 20 ఓవర్లలో 6 వికెట్ల నష్టానికి 162 పరుగులు చేసింది. కెప్టెన్ శుభ్మన్ గిల్ (27 బంతుల్లో 39), జోస్ బట్లర్ (33 బంతుల్లో 38) శుభారంభం ఇచ్చినా, మిడిల్ ఓవర్లలో యుజ్వేంద్ర చాహల్ తన స్పిన్ మాయాజాలంతో గుజరాత్ను కట్టడి చేశాడు. చాహల్ 4 ఓవర్లలో 28 పరుగులిచ్చి 2 కీలక వికెట్లు తీయగా, వైశాఖ్ విజయ్ కుమార్ 3 వికెట్లతో రాణించాడు. గుజరాత్ బ్యాటర్లు ఎవరూ భారీ స్కోరు చేయలేకపోవడంతో ఆ జట్టు మోస్తరు స్కోరుకే పరిమితమైంది.
రషీద్ ఖాన్కు షాకిచ్చిన కానోలీ 103 మీటర్ల సిక్సర్
ఈ మ్యాచ్లో కూపర్ కానోలీ కొట్టిన ఒక సిక్సర్ సోషల్ మీడియాలో వైరల్ అవుతోంది. ఇన్నింగ్స్ 8వ ఓవర్లో ప్రపంచ స్థాయి స్పిన్నర్ రషీద్ ఖాన్ బౌలింగ్లో కానోలీ ఏకంగా 103 మీటర్ల భారీ సిక్సర్ను బాదాడు. ఆ షాట్కు రషీద్ ఖాన్ సైతం అవాక్కయి చూస్తూ ఉండిపోయాడు. తన ఇన్నింగ్స్లో మొత్తం 5 ఫోర్లు, 5 సిక్సర్లు బాదిన కానలీ, 34 బంతుల్లోనే హాఫ్ సెంచరీ పూర్తి చేసుకున్నాడు. మెక్స్వెల్కు సరైన వారసుడిగా భావిస్తున్న కానోలీ, తన అరంగేట్రంలోనే ప్లేయర్ ఆఫ్ ది మ్యాచ్ అవార్డును గెలుచుకున్నాడు.
𝟏𝟎𝟑 𝐌𝐄𝐓𝐑𝐄𝐒 𝐨𝐟 𝐦𝐚𝐲𝐡𝐞𝐦 🤯
Cooper Connolly rocks back, frees the arms and sends it soaring into the second tier 🚀#TATAIPL 2026 | #PBKSvGT | LIVE NOW 👉 https://t.co/8O2J6XJtcmpic.twitter.com/jXyDDu3Ohs— Star Sports (@StarSportsIndia) March 31, 2026
బౌలర్ల వైఫల్యం.. అర్ష్దీప్ సింగ్ చెత్త రికార్డు
మరోవైపు పంజాబ్ స్టార్ బౌలర్ అర్ష్దీప్ సింగ్ ఈ మ్యాచ్లో ఒక చెత్త రికార్డును మూటగట్టుకున్నాడు. గుజరాత్ ఇన్నింగ్స్ చివరి ఓవర్ వేసిన అర్ష్దీప్, ఏకంగా 4 వైడ్లు, ఒక నో-బాల్ వేసి ఆ ఓవర్ను పూర్తి చేయడానికి 11 బంతులు తీసుకున్నాడు. ఐపీఎల్ చరిత్రలో ఒకే ఓవర్లో 11 బంతులు వేసిన ఆరో బౌలర్గా అర్ష్దీప్ నిలిచాడు. గుజరాత్ బౌలర్లలో ప్రసిద్ధ్ కృష్ణ 3 వికెట్లు తీసి గట్టి పోటీ ఇచ్చినా, కానోలీ వీరోచిత ఇన్నింగ్స్ ముందు గుజరాత్ తలవంచక తప్పలేదు. ఈ విజయంతో పంజాబ్ కింగ్స్ సీజన్లో శుభారంభం చేసింది.
