T20 World Cup : సంజూ అభిమానులకు బ్యాడ్ న్యూస్? వరల్డ్ కప్ ప్లేస్ పై ఇషాన్ కన్నేశాడురోయ్ !
Ishan Kishan vs Sanju Samson : భారత్, న్యూజిలాండ్ T20 సిరీస్ నేపథ్యంలో ఇషాన్ కిషన్, సంజూ శాంసన్ లు హాట్ టాపిక్ గా మారారు. వీరిద్దరి ప్రస్తుత ఫామ్, గణాంకాల ఆధారంగా రాబోయే టీ20 ప్రపంచ కప్ జట్టులో ఎవరికి స్థానం దక్కుతుందో ఇక్కడ తెలుసుకుందాం.
ఇషాన్ కిషన్ vs సంజూ శాంసన్: ప్రపంచ కప్కు ముందు ఎవరి స్థానం పదిలం?
భారత్, న్యూజిలాండ్ జట్ల మధ్య జరుగుతున్న ప్రతిష్ఠాత్మక టీ20 సిరీస్ చివరి దశకు చేరుకుంది. ఈ సిరీస్లో భాగంగా విశాఖపట్నంలోని డాక్టర్ వై.ఎస్.రాజశేఖర రెడ్డి ఏసీఏ-వీడీసీఏ క్రికెట్ స్టేడియంలో నాలుగో టీ20 మ్యాచ్ ఇద్దరు ప్లేయర్లకు కీలకం కానుంది. ఇప్పటికే టీమిండియా ఈ సిరీస్లో 3-0 తేడాతో ఆధిక్యంలో నిలిచి, సిరీస్ను కైవసం చేసుకుంది.
భారత బ్యాటింగ్ విభాగం నుంచి బౌలింగ్ వరకు అందరూ ప్రపంచ కప్కు ముందు అద్భుతమైన ఫామ్లో కనిపిస్తున్నారు. ఈ నేపథ్యంలో జట్టు తన విజయ పరంపరను విశాఖలోనూ కొనసాగించాలని భావిస్తోంది. అయితే, ప్రస్తుతం అందరి చూపు వికెట్ కీపర్ బ్యాటర్లయిన ఇషాన్ కిషన్, సంజూ శాంసన్ల పైనే ఉంది. వీరిద్దరిలో ఎవరు బెస్ట్? గణాంకాలు ఎవరికి అనుకూలంగా ఉన్నాయి?
సంజూ శాంసన్ ఫామ్పై ఆందోళన
న్యూజిలాండ్ సిరీస్లో టీమిండియా ఆధిపత్యం చెలాయిస్తున్నప్పటికీ, సంజూ శాంసన్ ఫామ్ మాత్రం జట్టు యాజమాన్యానికి పెద్ద ఆందోళన కలిగించే అంశంగా మారింది. ఈ సిరీస్లో జరిగిన మొదటి మూడు మ్యాచ్లలో సంజూ శాంసన్ ఆశించిన స్థాయిలో రాణించలేకపోయారు. వరుసగా మూడు మ్యాచ్లలోనూ ఆయన అవుట్ ఆఫ్ ఫామ్లో కనిపించారు. రాబోయే టీ20 ప్రపంచ కప్ దృష్ట్యా, సంజూ ఇలాగే విఫలమైతే అది ఆయన కెరీర్కు, జట్టు కూర్పుకు ప్రమాదకరంగా మారే అవకాశం ఉంది.
మరోవైపు, టీమిండియా యువ ఓపెనర్ ఇషాన్ కిషన్ ప్రస్తుతం అద్భుతమైన ఫామ్లో ఉన్నారు. ఒకవేళ సంజూ శాంసన్ తన వైఫల్యాలను ఇలాగే కొనసాగిస్తే, ఓపెనింగ్ బ్యాటర్గా ఆయన స్థానాన్ని ఇషాన్ కిషన్ భర్తీ చేసే అవకాశాలు మెండుగా ఉన్నాయని క్రీడా విశ్లేషకులు భావిస్తున్నారు. ఈ నేపథ్యంలో విశాఖ మ్యాచ్ సంజూకు చాలా కీలకం కానుంది.
టీ20ల్లో సంజూ శాంసన్ గణాంకాలు ఎలా ఉన్నాయి?
టీమిండియా తరఫున టీ20 ఫార్మాట్లో సంజూ శాంసన్ గణాంకాలు చాలా మెరుగ్గా ఉన్నాయి. అందుకే సెలెక్టర్లు ఆయనకు వరుసగా అవకాశాలు ఇస్తూ వస్తున్నారు. ముఖ్యంగా టీ20 అంతర్జాతీయ క్రికెట్లో సంజూ శాంసన్ మూడు సెంచరీలు సాధించడం విశేషం. స్టార్ ఓపెనర్ శుభ్మన్ గిల్ ఫామ్ కోల్పోవడంతో సంజూకు ఓపెనింగ్ చేసే అవకాశం దక్కింది. కానీ, ఇప్పటి వరకు జరిగిన మ్యాచ్లలో ఆయన ఆ అవకాశాన్ని పూర్తిగా సద్వినియోగం చేసుకోలేకపోయారు.
ఇప్పుడు సంజూ ముందున్న ఏకైక మార్గం తనను తాను నిరూపించుకోవడమే. విశాఖ మ్యాచ్లో కూడా ఆయన విఫలమైతే, రాబోయే రోజుల్లో ఆయనకు సమస్యలు మరింత పెరిగే అవకాశం ఉంది.
సంజూ శాంసన్ బ్యాటింగ్ రికార్డులు ఎలా ఉన్నాయి?
సంజూ శాంసన్ తన టీ20 కెరీర్లో ఇప్పటివరకు టీమిండియా తరఫున 55 మ్యాచ్లు ఆడారు. ఇందులో 47 ఇన్నింగ్స్లలో బ్యాటింగ్ చేసిన ఆయన 147.89 అనే అద్భుతమైన స్ట్రైక్ రేట్తో 1048 పరుగులు సాధించారు. ఈ క్రమంలో ఆయన బ్యాట్ నుండి 3 సెంచరీలు, 3 అర్ధ సెంచరీలు వచ్చాయి. టీ20ల్లో ఆయన అత్యధిక స్కోరు 111 పరుగులు. అంతేకాకుండా, సంజూ 4 సార్లు నాటౌట్గా నిలిచారు. గణాంకాల పరంగా చూస్తే సంజూ స్ట్రైక్ రేట్, సెంచరీలు ఆయన సామర్థ్యాన్ని తెలియజేస్తున్నాయి.
ఇషాన్ కిషన్ అదిరిపోయే రీఎంట్రీ
మరోవైపు, కొంతకాలం పాటు భారత జట్టుకు దూరంగా ఉన్న ఇషాన్ కిషన్, సయ్యద్ ముస్తాక్ అలీ ట్రోఫీలో విధ్వంసకర ప్రదర్శనతో తిరిగి జట్టులోకి వచ్చారు. ఈ టోర్నీలో ఆయన చూపిన తెగువ కారణంగా, రాబోయే టీ20 ప్రపంచ కప్ జట్టులో టీమిండియా వైస్ కెప్టెన్ శుభ్మన్ గిల్ స్థానంలో ఇషాన్ కిషన్ను ఎంపిక చేశారు. జట్టు తనపై ఉంచిన నమ్మకాన్ని ఇషాన్ కిషన్ వమ్ము చేయలేదు. న్యూజిలాండ్తో జరిగిన రెండో మ్యాచ్లో అద్భుతమైన ఇన్నింగ్స్ ఆడి, తను ఎంతటి దృఢమైన మైండ్సెట్తో జట్టులోకి తిరిగి వచ్చారో నిరూపించారు.
ఇషాన్ కిషన్ టీ20 గణాంకాలు ఎలా ఉన్నాయి?
ఇషాన్ కిషన్ టీ20 కెరీర్ విషయానికి వస్తే, ఆయన ఇప్పటివరకు భారత జట్టు తరఫున 35 మ్యాచ్లు ఆడారు. ఈ 35 ఇన్నింగ్స్లలో 131.90 స్ట్రైక్ రేట్తో మొత్తం 908 పరుగులు సాధించారు. ఇందులో 7 హాఫ్ సెంచరీలు ఉన్నాయి. టీ20ల్లో ఇషాన్ అత్యధిక స్కోరు 89 పరుగులు. సెంచరీలు లేనప్పటికీ, కన్సిస్టెన్సీ పరంగా, ప్రస్తుత ఫామ్ పరంగా ఇషాన్ కిషన్ ప్రస్తుతం సంజూ కంటే మెరుగ్గా కనిపిస్తున్నారు.
ఫైనల్ ఓటు ఎవరికి? సంజూనా.. కిషనా?
కేవలం గణాంకాల పరంగా చూస్తే.. స్ట్రైక్ రేట్, సెంచరీల విషయంలో ఇషాన్ కిషన్ కంటే సంజూ శాంసన్ ముందున్నారు. అలాగే, ఇషాన్ కంటే సంజూ ఎక్కువ మ్యాచ్లు ఆడారు. కానీ, ప్రస్తుతం సంజూ ఫామ్లో లేకపోవడమే అతిపెద్ద సమస్య. మిగిలిన రెండు మ్యాచ్లలో సంజూ రాణించకపోతే, రాబోయే టీ20 ప్రపంచ కప్లో ఆయన బెంచ్కే పరిమితం కావచ్చు. అదే సమయంలో, తన బ్యాట్తో సత్తా చాటుతున్న ఇషాన్ కిషన్కు ఓపెనింగ్ బాధ్యతలు అప్పగించే అవకాశాలు ఎక్కువగా ఉన్నాయి.
