Tulsi Plant: పీరియడ్ టైంలో తులసి మొక్కను ముట్టుకుంటే ఏమవుతుంది?
Tulsi Plant: పీరియడ్స్ టైంలో తులసి మొక్కను తాకకూడదని పెద్దలు చెబుతారు. ముట్టుకుంటే ఏమవుతుంది. దీని వెనుక ఉన్న సామాజిక, సాంప్రదాయ, శాస్త్రీయ కారణాలేంటో ఇక్కడ తెలుసుకుందాం.
పీరియడ్స్ సమయంలో తులసి మొక్కను తాకకూడదా?
భారతీయ సంస్కృతిలో తులసి మొక్కకు చాలా ప్రాముఖ్యత ఉంది. దాదాపు ప్రతి హిందువుల ఇంట్లోనూ తులసి మొక్క కనిపిస్తుంది. దానికి రోజూ పూజలు చేసి దీపాలు పెడతారు. కార్తీక మాసంలో అయితే విశేష పూజలుంటాయి. అయితే మహిళలు బహిష్టు సమయంలో తులసి మొక్కను తాకకూడదని, అలా తాకితే మొక్క ఎండిపోతుందని లేదా అది అపవిత్రం అని మన పెద్దలు చెబుతుంటారు.
సాంప్రదాయ నమ్మకాలు
హిందూ ధర్మం ప్రకారం తులసి కేవలం మొక్క మాత్రమే కాదు, లక్ష్మీదేవి స్వరూపంగా కొలుస్తారు. పీరియడ్స్ సమయంలో మహిళలను దూరం పెడతారు. పాతకాలపు ఆచారాల వల్ల దైవ కార్యక్రమాల్లోకి చేర్చుకోరు. ఆ సమయంలో దేవాలయాలకు ఎలా వెళ్లకూడదో, తులసి దేవతామూర్తి కాబట్టి తాకనిచ్చేవారు కాదు.
ముట్టుకుంటే మొక్కలు ఎండిపోతాయా
మహిళ బహిష్టుకు మొక్కలు ఎండిపోవడానికి ఎలాంటి శాస్త్రీయ ఆధారాల్లేవు. మొక్కల ఎదుగుదల మట్టిలోని పోషకాలు, నీరు, సూర్యరశ్మిపై ఆధారపడి ఉంటుంది. మనిషిలోని హార్మోన్సు...మొక్కలపై ప్రభావం చూపిస్తుందనే అంశం రుజువు కాలేదు.
పీరియడ్ టైంలో దూరం పెట్టడానికి రీజన్
పూర్వ కాలంలో మహిళలు ఇంట్లోనూ, పొలాల్లోనూ చాలా కష్టపడేవారు. పీరియడ్స్ సమయంలో వచ్చే కడుపు నొప్పి, నీరసం, అసౌకర్యం నుంచి ఉపశమనం కలిగించడానికి 'అంటు' పేరుతో వారిని దూరం పెట్టేవారు. దాని వల్ల ఇంటి పనులు, నీళ్లు తోడటం వంటి పనుల నుంచి ఉపశమనం దొరికింది. అప్పట్లో ఇన్ఫెక్షన్లు సోకకుండా ఉండటానికి కొన్ని కఠినమైన నియమాలను పాటించేవారు. అందుకే దైవకార్యక్రమాలకు దూరంగా పెట్టేవారు.
తులసి మొక్క ప్రత్యేకతలు
తులసి మొక్కలో అద్భుతమైన ఔషధ గుణాలు ఉన్నాయి. పీరియడ్స్ సమయంలో మహిళల రోగనిరోధక శక్తి కొంచెం తగ్గే అవకాశం ఉంటుంది. తులసి ఆకుల వాసన పీల్చడం మంచిదే గానీ..పెద్దలు దానిని ముట్టకూడదని చెప్తారు. పొరపాటున తాకినంత మాత్రాన మొక్కకు హాని జరుగుతుందని లేదా ఏదో అపచారం జరిగిందని భయపడాల్సిన అవసరం లేదు. భక్తి అనేది మనసులో ఉండేది, అది శరీర ధర్మాలకు అతీతమైనది.
