- Home
- National
- TVK Vijay: విజయ్ గెలుపులో వాళ్లే కీలక పాత్ర పోషించారా? కుటుంబ రాజకీయాలకు చెక్ పెట్టారా
TVK Vijay: విజయ్ గెలుపులో వాళ్లే కీలక పాత్ర పోషించారా? కుటుంబ రాజకీయాలకు చెక్ పెట్టారా
TVK Vijay: తమిళనాడు ఎన్నికల ఫలితాలు ఆసక్తిని పెంచుతున్నాయి. విజయ్ నేతృత్వంలోని TVK పార్టీ 100కిపైగా సీట్లలో ఆధిక్యంతో దూసుకుపోతోంది. రాష్ట్ర రాజకీయాల్లో పెద్ద మార్పునకు దారి తీసిన అంశాల్లో జెన్ జీ ఓటర్లు కీలక పాత్ర పోషించినట్లు తెలుస్తోంది.
తమిళనాడులో యువ ఓటర్ల భారీ ప్రభావం
ఈసారి తమిళనాడు ఎన్నికల్లో యువత కీలక పాత్ర పోషించింది. రాష్ట్రంలో మొత్తం ఓటర్లలో సుమారు 1.22 కోట్ల మంది 18 నుంచి 29 సంవత్సరాల మధ్య ఉన్నవారు. అంటే దాదాపు 21 శాతం ఓటర్లు యువతే. వీరిలోనే 14.5 లక్షల మంది మొదటిసారి ఓటు వేసినవారు. ఈ సంఖ్య చిన్నది కాదు. ముఖ్యంగా తక్కువ తేడాతో నిర్ణయించే సీట్లలో ఈ యువ ఓటర్లే ఫలితాలను మలుపు తిప్పే స్థాయిలో ఉన్నారు.
సంప్రదాయ ఓటింగ్కు బ్రేక్ – ‘మార్పు’ వైపు యువత
ఈసారి యువ ఓటర్లు కుటుంబ రాజకీయాలకు దూరంగా వెళ్లి తమ నిర్ణయాన్ని స్వయంగా తీసుకున్నట్టు స్పష్టంగా కనిపించింది. గతంలో తల్లిదండ్రులు ఎవరికి ఓటేస్తే వారికే ఓటేయడం సాధారణం. కానీ ఇప్పుడు పరిస్థితి మారింది. చాలా మంది యువత “మార్పు కావాలి” అనే భావనతో ఓటేశారు. ఉద్యోగాలు, భద్రత, మహిళల సురక్ష, అవినీతి వంటి అంశాలు వారి నిర్ణయాలను ప్రభావితం చేశాయి.
విజయ్ ఎఫెక్ట్ – యువతలో భారీ ఆకర్షణ
విజయ్ రాజకీయాల్లోకి రావడం ఈ ఎన్నికల్లో గేమ్ ఛేంజర్గా మారింది. అతని ఇమేజ్, స్టైల్, సందేశం యువతను బలంగా ఆకర్షించాయి. చాలామంది ఓటర్లు అతని స్టైల్లోనే పోలింగ్ బూత్లకు రావడం, సోషల్ మీడియాలో తమ ఓటింగ్ అనుభవాన్ని పంచుకోవడం ప్రత్యేక ఆకర్షణగా నిలిచింది. ముఖ్యంగా మొదటిసారి ఓటు వేసిన వారు విజయ్ పార్టీని ఓ కొత్త ఆశగా చూస్తున్నారని స్పష్టమైంది.
సమస్యల ఆధారంగా ఓటింగ్
ఈసారి యువత ఓటింగ్లో ఒక పెద్ద మార్పు కనిపించింది. పార్టీ లేదా కులం కాకుండా సమస్యల ఆధారంగా ఓటు వేయడం పెరిగింది. కొన్ని ప్రాంతాల్లో ప్రధాన పార్టీలకు బదులుగా కొత్త పార్టీలకు అవకాశం ఇవ్వాలనే భావన కూడా కనిపించింది. అంటే రాజకీయాల్లో కొత్త ఆలోచనలకు యువత దారి తీస్తున్నట్టు తెలుస్తోంది.
Gen Z తమిళనాడు రాజకీయాలను శాసిస్తున్నారా?
ప్రస్తుతం ఫలితాల ట్రెండ్ చూస్తే ఒక విషయం స్పష్టంగా అర్థమవుతోంది. ఈసారి ఎన్నికల్లో యువ ఓటర్లే కీలక పాత్ర పోషించారు. ముఖ్యంగా క్లోజ్ ఫైట్ ఉన్న సీట్లలో వారి ఓట్లు నిర్ణయాత్మకంగా మారాయి. విజయ్ పార్టీకి వస్తున్న ఆధిక్యం కూడా ఈ యువ ఓటర్ల మద్ధతు వల్లే సాధ్యమైందని విశ్లేషకులు భావిస్తున్నారు. ఇది కేవలం ఒక ఎన్నిక ఫలితం మాత్రమే కాదు, భవిష్యత్తు రాజకీయాలకు సంకేతం కూడా. ఇకపై తమిళనాడు రాజకీయాల్లో యువత మద్ధతు లేకుండా ఎవ్వరూ ముందుకు వెళ్లలేరని ఈ ఎన్నికలు స్పష్టం చేస్తున్నాయని నిపుణులు అభిప్రాయపడుతున్నారు.
