కన్నెపొర చిరిగినంత మాత్రాన ఆమెదే తప్పు అంటే ఎలా.? హైకోర్టు సంచలన తీర్పు
Law: అత్యాచార కేసుల విచారణలో బాధితురాలి హెల్త్ రిపోర్ట్ ఆధారంగా తీసుకుని ఆమె వాంగ్మూలాన్ని తిరస్కరించలేమని అలహాబాద్ హైకోర్టు స్పష్టం చేసింది. హైమెన్ (కన్నెపొర) చిరిగిపోయి ఉందనే ఒక్క కారణంతో బాధితురాలి వ్యక్తిత్వాన్ని ప్రశ్నించడం సరికాదని పేర్కొంది.
44 ఏళ్ల నాటి అత్యాచార కేసులో తీర్పు
ఈ కేసు 1982లో ఉత్తరప్రదేశ్లోని ఓ గ్రామంలో జరిగిన ఘటనకు సంబంధించినది. పొలానికి వెళ్లిన 15 ఏళ్ల బాలికపై ఇద్దరు వ్యక్తులు దాడి చేసి అత్యాచారానికి పాల్పడ్డారని ఆరోపణలు నమోదయ్యాయి. బాధితురాలు ప్రతిఘటించడంతో ఆమెపై దాడి కూడా చేసినట్లు కేసు నమోదైంది. ఈ కేసును విచారించిన ట్రయల్ కోర్టు 1983లో ఇద్దరు నిందితులకు మూడేళ్ల జైలు శిక్ష విధించింది. అనంతరం వారిలో ఒకరు హైకోర్టును ఆశ్రయిస్తూ అప్పీల్ దాఖలు చేశారు.
హెల్త్ రిపోర్ట్ ఆధారంగా నిందితుడి వాదన
అప్పీల్ విచారణలో నిందితుడి తరఫు న్యాయవాది హెల్త్ రిపోర్ట్ ను ప్రస్తావించారు. బాధితురాలి హైమెన్ ఇప్పటికే చిరిగిపోయి ఉందని, అందువల్ల ఆమె చెప్పిన వాంగ్మూలంపై సందేహం వ్యక్తం చేయాలని కోర్టును కోరారు. ఈ అంశాన్ని ఆధారంగా తీసుకుని నిందితుడికి అనుమాన ప్రయోజనం కల్పించాలని వాదించారు.
హైమెన్ చిరగడానికి అనేక కారణాలు ఉంటాయి: కోర్టు
ఈ వాదనను తిరస్కరించిన హైకోర్టు కీలక వ్యాఖ్యలు చేసింది. హైమెన్ చిరగడం అంటే తప్పనిసరిగా లైంగిక సంబంధం జరిగినట్టే అని భావించడం శాస్త్రీయంగా సరైనది కాదని పేర్కొంది. క్రీడలు ఆడటం, సైక్లింగ్ చేయడం, జిమ్నాస్టిక్స్, గుర్రపు స్వారీ, కఠినమైన శారీరక శ్రమ లేదా ప్రమాదవశాత్తూ గాయపడటం వంటి అనేక కారణాలతో కూడా హైమెన్ చిరిగే అవకాశం ఉంటుందని కోర్టు వివరించింది. కొంతమంది మహిళల్లో పుట్టుకతోనే హైమెన్ లేకపోవచ్చు లేదా అది ఎక్కువగా సాగిపోయే స్వభావం కలిగి ఉండవచ్చని కూడా గుర్తు చేసింది. అత్యాచారం వంటి ఘటనలు ఎక్కువగా ఏకాంత ప్రదేశాల్లో జరుగుతాయని, అందువల్ల ప్రత్యక్ష సాక్షులు లేకపోవడం సహజమేనని కోర్టు వ్యాఖ్యానించింది. బాధితురాలి వాంగ్మూలం విశ్వసనీయంగా ఉన్నప్పుడు కేవలం హెల్త్ రిపోర్ట్ ఆధారంగా దానిని తోసిపుచ్చలేమని స్పష్టం చేసింది.
బెయిల్ రద్దు.. 10 రోజుల్లో లొంగిపోవాలని ఆదేశం
ఈ కేసులో అప్పీల్ను కొట్టివేసిన హైకోర్టు, ట్రయల్ కోర్టు విధించిన మూడేళ్ల జైలు శిక్షను యథాతథంగా కొనసాగించింది. ఇప్పటివరకు బెయిల్పై ఉన్న నిందితుడి బెయిల్ను కూడా రద్దు చేసింది. మిగిలిన శిక్షను అనుభవించేందుకు 10 రోజుల్లోగా ట్రయల్ కోర్టు ముందు లొంగిపోవాలని నిందితుడిని ఆదేశించింది. కోర్టు తన తీర్పులో మరో కీలక అంశాన్ని ప్రస్తావించింది. అత్యాచారం అనేది చట్టపరమైన నిర్వచనం కలిగిన నేరం. అది కేవలం వైద్య పరీక్షల ఆధారంగా మాత్రమే నిర్ధారించే విషయం కాదని, అందువల్ల బాధితురాలి విశ్వసనీయ వాంగ్మూలానికి తగిన ప్రాధాన్యం ఇవ్వాలని స్పష్టం చేసింది.
