ఈ అలవాట్లే మీ ఎముకలకు బలం లేకుండా చేస్తాయి.. ఇప్పటినుంచైనా జాగ్రత్తగా ఉండండి..
మన శరీరం ఆరోగ్యంగా ఉండాలంటే ముందు మన ఎముకలు బలంగా ఉండాలి. ఒకవేళ ఎముకలు బలహీనంగా ఉంటే మొత్తం శరీర ఆరోగ్యం దెబ్బతింటుంది.
ఆరోగ్యాన్ని పాడు చేసే ఆహారాలు, కొన్ని చెడు అలవాట్ల వల్ల ఎముకలు బలహీనపడతాయి. ఎముకలను మన శరీరానికి మద్దతు వ్యవస్థ అని అంటారు. ఎందుకంటే ఎముకలు లేకుంటే మన శరీరం ఇలా నిలబడలేదు. ఈ ఎముకలే మప శరీరానికి ఒక నిర్మాణాన్ని అందిస్తాయి. అందుకే ఎముకలను చాలా జాగ్రత్తగా ఉంచుకోవాలి. అయితే కొన్ని అలవాట్లు ఎముకలను బలహీనంగా చేస్తాయి. అవేంటో తెలుసుకుందాం..
తగినంత సూర్యకాంతి లభించకపోవడం
చాలా మంది డే సమయాన్నంతా ఇంట్లోనో లేకపోతే కార్యాలయాల్లోనే గడుపుతుంటారు. కానీ ఎముకలు ఆరోగ్యంగా ఉండాలంటే సూర్యరశ్మి ద్వారా అందే విటమిన్ డి చాలా అవసరం. ఈ విటమిన్ డి శరీరంలో లేకపోతే ఎముకల ఆరోగ్యం దెబ్బతింటుంది. ఎముకలు బలహీనపడతాయి. ఈ విటమిన్ డి లోపించడం వల్ల ఎముకలకు క్యాల్షియం సరిగ్గా అందదు. సూర్యరశ్మితో పాటుగా ఈ విటమిన్ ను పొందడానికి బలవర్థకమైన పాలు, రసం లేదా తృణధాన్యాలను తీసుకోవచ్చు.
తక్కువ బరువు
స్థూలకాయం ఆరోగ్యానికి ఏ విధంగా చెడ్డదో.. తక్కువ బరువు కూడా మంచిది కాదు. ఎత్తుకు, వయసుకు తగ్గ బరువుంటేనే మీరు ఆరోగ్యంగా ఉంటారు. ఒకవేళ మీరు బరువు తక్కువగా ఉంటే కూడా ఎముకలపై ప్రతికూల ప్రభావం పడుతుంది. ఆరోగ్య నిపుణుల అభిప్రాయం ప్రకారం.. 18.5 లేదా అంతకంటే తక్కువ బిఎమ్ఐ ఉన్న వ్యక్తులకు ఎముకల పగుళ్లు, ఎముకల నష్టానికి దారితీస్తుంది.
ఉప్పు ఎక్కువగా తినడం
ఉప్పు మన శరీరానికి అవసరమే. కానీ మోతాదుకు మించి అస్సలు తినకూడదు. ఉప్పు ఎక్కువగా తింటే మీ ఆరోగ్యంపై ప్రతికూల ప్రభావం పడుతుంది. అందుకే దీనిని సమతుల్య మొత్తంలోనే తీసుకోవాలి. ఉప్పు ఎక్కువగా తీసుకోవడం వల్ల ఎముకలలో కాల్షియం తగ్గుతుంది. దీంతో ఎముకలు బలహీనపడతాయి.
office
ఎప్పుడూ కూర్చునే ఉండటం
ఆఫీసులో వర్క్ చేసే వారు.. ఇంట్లో ఖాళీగా ఉండే వారు.. కొన్ని ఇతర పనులు చేసే వారు కూడా ఎప్పుడూ కూర్చొనే ఉంటారు. ఇవి పనిలో భాగమే అయినా.. గంటల తరబడి కూర్చోవడం వల్ల ఎముకల ఆరోగ్యం దెబ్బతింటుంది. మీ ఎముకలు ఆరోగ్యంగా ఉండాలంటే శరీర కదలికలు చాలా అవసరం. శరీరం నిరంతరం కదులుతూ ఉంటేనే మీరు అన్ని విధాలా ఆరోగ్యంగా ఉంటారు. మీరు రోజంతా కూర్చొనే ఉంటే, ఎముకల ఆరోగ్యం కోసం ఖచ్చితంగా వ్యాయామం చేయాల్సిందే.
జంతు ప్రోటీన్ తీసుకోవడం
ఈ రోజుల్లో ప్రోటీన్ ఫుడ్ ను తీసుకుంటున్నవారి సంఖ్య బాగా పెరిగిపోయింది. ముఖ్యంగా జంతు ప్రోటీన్ నే ఎక్కువగా తీసుకుంటున్నారు. కానీ జంతు ప్రోటీన్ ను ఎక్కువగా తీసుకోవడం వల్ల ఎముకలు దెబ్బతింటాయి. అలాగే మూత్రంలో కాల్షియం లోపానికి కూడా దారితీస్తుంది.
శీతల పానీయాలు
చిన్న పిల్లల నుంచి ముసలి వాళ్ల వరకు కూల్ డ్రింక్స్ ను ఇష్టంగా తాగుతుంటారు. కానీ ఇది ఆరోగ్యానికి అస్సలు మంచిది కాదు. వాస్తవానికి వీటిలో ఎక్కువ మొత్తంలో చక్కెర, కెఫిన్ ఉంటుంది. ఇది మాత్రమే కాదు ఫాస్ఫారిక్ ఆమ్లాన్ని ప్రిజర్వేటివ్ గా ఉపయోగిస్తారు. ఫలితంగా కాల్షియం ఎముక నుంచి నేరుగా బయటకు రావడం ప్రారంభమవుతుంది.